شه‌مێ دێرو و حه‌سه‌ن كو ب دایە شه‌مێ هێته نیاسین ئێكه ژ وان ئافره‌تێن كو زورترین قوربانی د مالا وان دا دناڤ كومكوژیا شنگال و ئێزدی دا هه‌یه كو هژماران 33 كه‌س، ئه‌و دبێژیت داخواز دكه‌ین كو ئێخسیرێن وان ل كه‌مپا هولێ بهێنه رزگاركرن و شنگال ژی ئارام بیت و خەلک ڤەگەرن جهـ و وارێن خوە.
دایە شه‌مێ بۆ "وشه" گوت، ئه‌ڤه نەهـ سال ل سه‌ر كومكوژیا شنگالێ دا بورین و هێشتا برینێن مه سارێژ نه‌بوینه و هه‌ر روندك و حه‌سره‌تا بۆ كه‌سوكارێن خوه د هێلین، 33 كه‌س ل مالا من هاتینه كومكوژكرن ژلایێ تیرورستێن داعش ل شنگالێ و هژماره‌كا دی هاتینه گرتن و هێشتا نه‌هاتینه رزگاركرن.
زێده‌تر گۆت، خێزانا من ته‌راوبه‌رابوو، هه‌ڤژین و سێ كچ و شه‌ش كور، ل گه‌ل ئه‌ندامێن خێزانا من كو دبنه 33 كه‌س هاتینه كومكوژكرن، ئه‌گه‌را سه‌ره‌كی یا شه‌هیدكرنا ئه‌ندامێن خێزانا من ئه‌و بوو كو ئێزدی بون و داعشێ دخواست ئاینێ وان بگوهریت، ئه‌وان ژی خوه ده‌ستڤه نه‌به‌ردا.
شه‌مێ د درێژاهیا ئاخفتنێن خودا دیاركر ژی كو ره‌وشا وان نوكه ل كه‌مپا چه‌م مشكو ل دهۆكێ د نه‌خوشیان دایه و گۆت ژی، داخوازێ ل حوكمه‌تا هه‌رێما كوردستانێ و حوكمه‌تا عیراقێ ژی دكه‌ین كو مه ڤه‌گه‌رینن شنگالێ و ده‌ڤه‌را مه ئارام بكه‌ن، یان ژی دناڤ ڤان كه‌مپان دا خانیان دروست بكه‌ن، ژبه‌ركو ره‌وشا مه دناڤ ڤان كه‌مپان دا زۆر نه‌خوشه و گه‌رمه و خزمه‌تگۆزاری وه‌كو پێدڤی نینن و جهێ مه به‌رته‌نگه.
شه‌مێ كو نوكه ل كه‌مپا چه‌م مشكو ل سنورێ زاخۆ دژیت و ناڤ سال دا چویه، زێده‌تر گۆت، داخوازا مه‌یا سه‌ره‌كی ئه‌وه كو ئه‌و كچ و ژن و كورێن كو هه‌تا نوكه چاره‌نڤیسێ وان نه‌دیاره و هاتینه ئێخسیركرن بهێنه ڤه‌گه‌راندنڤه ب تایبه‌تی ئه‌وێن كه‌مپا هولی ل سوریێ ژبه‌ركو زۆر كه‌س ل وێرێ نه و ره‌وشا وان و گیانێ وان د مه‌ترسیێ دایه.
شەمێ ئەڤ سالە سەرپەرشتیا چەند رێورسمێن نەهـ سالیا جینوسایدا ئێزدیان ل دهوک و زاخۆ کر ب تایبەتی ل کەمپا چەم مشکو ل زاخۆ.