لە عێراق پارە و خەم و خەمۆكی و خۆكوشتن زۆرە، وەك چۆن گەندەڵی و بێپلانی و خراپیی ئیدارەدان و بێكاری و بێئومێدی لەوپەڕیەتی، ئەوانە هەمووی وایان كردووە گەنج بە بێدەنگی پەنا بۆ ئەو بژارانە ببات كە لەبەردەمی ماون، لە وڵاتێك نە هەڵبژاردن و نە ناڕەزایەتیی ئاشتییانە سوودی بۆ گۆڕانكاری و رادەربڕین هەیە، ئەوان خۆیان لەبەردەم دوو بژارە دەبیننەوە، كۆچكردن و خۆكوشتن.
لە عێراق پەرەسەندنی رارایی وای كردووە خۆكوشتن ببێتە دیاردە و رۆژانە لە شارە جیاجیاكانی عێراق هەوڵ و هەواڵی خۆكوشتن دەبیسترێت، بەتایبەتی گەنج و ژن، كە بەرجەستەی قووڵیی تەنگژە كۆمەڵایەتی و ئابووری و دەروونییەكانی ناو كۆمەڵگە دەكات، فەوزی ئەكرەم پەرلەمانتاری پێشووی عێراق دەڵێت، تێكڕای رۆژانەی هەوڵی خۆكوشتن لە عێراق پێنج حاڵەتە، ئەوەش بەرجەستەی تەنگژەیەكی بێدەنگ دەكات ساڵ دوای ساڵ فرەوانتر دەبێت بێ دۆزینەوەی چارەسەرێكی ریشەیی بۆی.
روونی كردەوە، ئێستە خۆكوشتن وەك حاڵەتی تاك نەماوە و بووەتە دیاردەیەك ساڵانە تێكڕاكەی زیاد دەكات، 70%ی قوربانیانیش گەنجانن لە خوار تەمەنی 30 ساڵ، كە زۆرینەن لە عێراق، ئەو نەوانەی لە سایەی ناسەقامگیری و نەبوونی خزمەتگوزاری و هەلی كار گەوەر بوونە، پاشخانی ئەو دیاردە راستەوخۆ پێوەستە بە ئابوورییەكی خراپ، كە بەپێی راپۆرتەكان رێژەی بێكاری لەناو گەنجان 27%ی تێپەڕ كردووە، جیا لە تەشەنەكردنی هەژاری، دیاردەكە تەنیا لە ناو گەنجان نەماوە و گەیشتووەتە منداڵانیش.
ئەكرەم دووپاتی كردەوە، چەند هۆكارێك هەن بۆ هەوڵی خۆكوشتن، لەوانە كۆمەڵایەتی و خەمۆكی و هەژاری و بێكاری و گوشاری خوێندن و ئاڵوودەبوون بە مادەی هۆشبەر، كە رێژەكەی لە ناو گەنجان لە شارە گەورەكان زۆر زیادی كردووە، ئەوانە وایان كردووە هەوڵی خۆكوشتن زیاد بكات، لە سایەی لاوازیی چاودێریی تەندروستی و هۆشیاركردنەوە.