بەرێ سیلێ ئێکە ژ سەیرانگەهێن ئامێدیێ و تایبەتە ب خێزانێن ئامێدیانڤە، پتری 100 سالە دهێتەکرن، ئەڤ سالە ژی دێ هێتەکرن، بەلێ سێنگل نەشێن بچنە سەیرانا بەرێ سیلێ.
مێهڤان ئامێدیی، ئێک ژ ئامادەکارێن سەیرانا بەرێ سیلێ ل ئامێدیێ بۆ "وشە" گوت، سەیرانا بەرێ سیلێ وەکو نەریتەکێ سالانە ل سەیرانگەها بەرێ سیلێ ل نێزیک باژێرێ ئامێدیێ بۆ ئامێدیان دهێتەکرن و دیروکا وێ دزڤریت بۆ سەردەمێ میرگەها بەهدینان ل ئامێدیێ، ئانکو پتری 100 سالە بەردەوام دهێتەکرن و بویە کەلتور و فولکلورێ ئامێدیێ.
زێدەتر گوت، ئەڤ سالە ژی دچارچوڤێ چەند پێرابونێن ئەمنی سەیرانا بەرێ سیلێ دێ بۆ ئامێدیان هێتە رێکخستن و تنێ خێزانان ماف هەیە بچنە سەیرانێ، ئانکو زوگورد و سێنگلا ماف نینە بچنە سەیرانێ ، هەر کەسێ بخوازیت بچیتە سەیرانێ دڤێت ل گەل خێزانا خۆ بچیت، ژبەرکو مە دڤێت کەشەکێ خوش و دلڤەکەر بۆ خێزانان دابین کەین.
ناڤبری دیارکر ژی کو سەیران دێ ل شەڤا 30-4-2026ێ و روژا 1-5-2026ێ هێتەکرن و گوتژی، هەموو بەرهەڤیێن هونەری و تەکنیکی هاتینەکرن و چەند هونەرمەند دێ بەرهەڤبن و چەندین برگەیێن جودایێن هونەری و کەلتوری هاتینە بەرهەڤکرن بۆ هندێ دلێ وان کەسان و خێزانان خۆش بیت یێن دهێنە سەیرانا بەرێ سیلێ.
بەرێ سیلێ ب دوراتیا کیمتر ژ کیلمەترەکێ دکەڤیتە باکورێ سەنتەرێ باژێرێ ئامێدیێ و ناوچەیەکا سروشتی یا چیایی یە و دار و بار و کەسکاتیەکا نایاب و دلڤەکەر هەیە.