یەكشەم پێنجی تەمووزی 2026، سەرۆک مەسعوود بارزانی لە پەیامێکدا ڕای گەیاندووە، بەداخێکی زۆرەوە هەواڵی کۆچی دوایی پێشمەرگەی کۆماری کوردستان لە مەهاباد و یەکێک لە یاوەرانی بارزانیی نەمر لە یەکێتیی سۆڤیەت و پێشمەرگەی هەردوو شۆڕشی ئەیلوول و گوڵان، کازم شانەدەریی پێ گەیشتووە.
لە پەیامەکەیدا دووپاتی کردەوە، کازم شانەدەری قوتابی و شوێنکەوتووی ڕێبازی بارزانی بوو، لەو قارەمانانە بوو کە هەموو ساتەکانی ژیانی خۆی بۆ دۆزی ڕەوای گەلی کوردستان تەرخان کرد. هەروەها ئاماژەی بەوە داوە کە ژیان و کۆڵنەدان و بەردەوامیی ئەو لە خەباتدا، وانەیەکی پڕبەهایە بۆ هەموو تێکۆشەر و نیشتمانپەروەرانی کوردستان.
سەرۆک بارزانی پرسە و سەرەخۆشیی خۆی ئاراستەی خانەوادە و کەسوکاری کۆچکردوو و هەموو پێشمەرگە و خەباتگێڕ و نیشتمانپەروەرانی کوردستان کردووە و خۆی بە هاوبەشی خەمیان زانیوە، و لە خوای گەورە داواکارە ڕۆحی بە بەهەشتی بەرین شاد بکات و ئارامی بە هەموو لایەک ببەخشێت.