بەرەو وەرزی هاوین دەڕۆین و پلەكانی گەرما بەرز دەبنەوە، هاوینی كوردستانیش گەرماكەی تاقەتپروكێنە و كێشە و لێكەوتەی تەندروستیی هەیە، پزیشكێكی كورد دەڵێت: پێویستە لە وەرزی گەرمادا گرنگیی زیاتر بدرێت بەم خۆراكانە.
دكتۆر كامەران رەسووڵ ژاژڵەیی پزیشكی پسپۆڕی زانستی خۆراك، لە بڵاوكراوەیەكیدا ئاماژە بە دیارترین ئەو خۆراكانە دەكات، ئەوانیش بریتین لە:
1.شووتی و كاڵەك: نزیكەی ٩٠٪ ی ئاوە، بێجگە لە بوونی بڕێكی لە مادە ڕیشاڵییەكان و دژە ئۆكسانە بەهێزەكانی وەك لایكوپین و ڤیتامین A ، C ، ئەو ڤیتامینانەش زۆر گرنگن بۆ پاراستنی خانەكانی پێست.
2. زەڵاتەی وەرزی: لە تەماتە، ترۆزی، خەیار و كاهوو پێكدێت، تەماتە دەوڵەمەندە بە لایكۆپین كە دژە ئۆكسانێكی بەهێزە، ترۆزی و خەیار و كاهوو ٩٥٪ لە ئاو پێكدێت، هەروەها كانزای پۆتاسیۆم و ڤیتامین C و مادە ڕیشاڵییەكانیان تێدایە.
3_ بلۆبێری، شلیك، توو، شاتوو: بڕێكی كەم لە كالۆری و بڕێكی باش لە مادە دژە ئۆكسانەكان و ڤیتامینەكان و پۆتاسیۆمیان تێدایە.
4_ ماسیی سەلموون: دەوڵەمەندە بە چەورییە سوودبەخشەكان و ئۆمێگا سێ كە كاریگەریی ئەرێنیی لەسەر جەستە دروست دەكەن.
5. گێلاس: دەوڵەمەندە بە مادە دژە ئۆكسانەكان كە گرنگن بۆ پاراستنی پێست و پێكهاتنی مادەی كۆلاجین، بێجگە لە بوونی پۆتاسیۆم و بڕێكی زۆر لە ئاو و بڕێكی كەم لە كالۆری.
6. ماست: سەرچاوەیەكی گرنگی پرۆتین و پرۆبایتكەكانە، بژاردەیەكی باشە لە كاتی ڕێجیم و خۆپاراستن لە قەڵەوی.
7_پاقلەمەنییەكان: سەرچاوەیەكی گرنگی پرۆتین و مادە ڕیشاڵییەكان و وزەن.
8_. ئەو خۆراكانەی كە دەوڵەمەندن بە كانزای پۆتاسیۆم كە ڕۆڵێكی باڵایان هەیە بۆ ڕێگریكردن لە وشكبوونەوەی جەستە و كەمكردنەوەی هەستی تینوویەتی وەك پرتەقاڵ، ئەڤۆگادۆ، فاسۆڵیا، سپێناخ، پەتاتە، تەماتە، ماست و مۆز.