پسپۆرێكی تەندروستیی وەرزشی رای گەیاند، سەماكردن تەنیا جووڵەیەك نییە بۆ خۆشی و كات بەسەربردن، بەڵكو بەپێی توێژینەوە تەندروستییەكان، سەما بەشێكە لە چارەسەری نەخۆشییە دەروونییە مەترسیدارەكان، بۆیە سەما سوودی زۆری بۆ مرۆڤ هەیە.
پێگەی "
شەفەق نیوز" لێدوانی ماریا تیخۆمیرۆڤای بۆ میدیاكان بڵاو كردووەتەوە كە پسپۆری تەندروستیی وەرزشییە و باس لەوە دەكات، سەماكردن بۆ مرۆڤ سوودەكانی تەنیا خۆی خۆشڕابوێری و بەسەربردنی كات نابینێتەوە، بەڵكو بەپێی توێژینەوە تەندروستییەكان، سوودەكانی سەماكردن بۆ ئەوانەی تووشی نەخۆشییە دەروونییەكان و گۆشەگیری دەبن، زۆر زیاترە. بۆیە ئامۆژگاری دەكات كە سەما فەرامۆش نەكەن و بایەخی زیاتری پێ بدەن.
ئەو پزیشكە زیاتر دەڵێت، سەماكردن باگڕاوندی سۆزداریی بۆ مرۆڤ هەیە و هەستە خۆشییەكانی تێكەڵ بە خۆشیی بەرانبەرەكانی دەبێت، بۆیە تەنیا بۆ خۆشی نییە، بەڵكو دڵەڕاوكێ ناهێڵێت و لەڕووی دەروونییەوە مرۆڤ ئاسوودە دەكات. بۆیە دەتوانرێ سەماكردن بكرێتە بەشێك لە چارەسەر بۆ چەندان نەخۆشیی مەترسیدار.
روونی كردەوە كە جووڵەكانی سەما زۆر بەسوودە و لە نەخۆشییەكانی خڵەفان و زەهایمەر و نەخۆشیی باركنسۆن و گۆشەگیری دوورتان دەخاتەوە. هاوكات دەتوانرێ بكرێتە ناو میتۆدی چارەسەر بۆ ئەوانەی تووشی شێرپەنجە دەبن و سوودی لێ ببینرێت. هەروەها مرۆڤ لە سەماكردندا هەست بە هاوسەنگیی جەستەی دەكات. لەڕووی فسیۆلۆجییەوە هۆڕمۆنەكانی دڵخۆشی بەرهەم دێنێت وەك ئیندۆرڤین و سیرۆتونین.
هەروەها ماریا تیخۆمیرۆڤا لەبارەی سەماكردنەوە جیا لە سوودەكانی بۆ نەخۆشییە دەروونییەكان، لەگەڵیدا جووڵەكانی سەما رۆڵی زۆر گرنگیان هەیە بۆ دڵ و دەمارە خوێنییەكان، بۆیە وا دەكات ئەركی دڵ باشتر بەڕێوە بچێت و ئۆكسجین باشتر بگاتەوە شەنەكانی تەواوی جەستە.