یەكێك لە كێشەكانی دڵ تەسكبوونەوە یان فرەوانبوونی دەمەوانەكانی دڵە، واتە ئەو دەمەوانانەی ئاراستەی رۆیشتنی خوێن لەناو دڵ رێك دەخەن، بۆیە بە دروستبوونی كێشە لەوان دڵ و هاتوچۆی خوێن تووشی كێشە دەبێتەوە، بەڵام بۆچی روودەدەن؟
د. ئەمیر عادل راوێژكاری نەخۆشییەكانی دڵ و لوولەكانی خوێن ئاماژە دەكات، نابێت نیشانەكانی كێشە لە دەمەوانەكانی دڵ پشتگوێ بخرێت، چونكە بە هێواشی پەرە دەستێنن، دڵی مرۆڤ چوار دەمەوانەی سەرەكی هەیە، ئەوانیش میترالی و سیانی و ئەبهەری و سییەكان، هەر هەموویان تێپەڕبوونی خوێن بە ناو دڵ بە یەك ئاراستە رێك دەخەن، بۆیە هەر كێشەیەك لەو دەمەوانانە كار لە پاڵنانی خوێن و گەیشتنی بۆ ئەندامەكانی لەش دەكات.
روونی كردەوە، دوو كێشە لە دەمەوانەكانی دڵ دروست دەبێت، تەسكبوونەوە و نەكرانەوەیان بە تەواوەتی و زیادبوونی پەستانی لەسەر ماسولكەی دڵ، فرەوانبوونی دەمەوانەكان و دانەخرانیان بە تەواوەتی و گەڕانەوەی بەشێك لە خوێن بۆ دواوە، هەندێك نەخۆش تووشی هەردوو حاڵەت دەبن، لە هۆكارەكانی، چوونە ناو تەمەن، كە بڵاوترین هۆكارە بەهۆی نیشتنی مادەی كلس لەسەریان بە تێپەڕبوونی كات، هۆكاری تریش هەن كە ئەگەری تووشبوون زیاد دەكەن، وەك كێشە زگماكییەكان و تای رۆماتیزمی و بەرزیی پەستانی خوێن و هەندێك نەخۆشی درێژخایەنی دڵ.
لە نیشانەكانی، هەستكردن بە ماندووبوونێكی بێ هۆكار، هەستكردن بە هەناسەتنگی لەكاتی بەجێگەیاندنی هەر كارێك، سەرسووڕان و سەرگێژخواردن، ئازاری سینگ و ئاوسانی پاژنە و قاچەكان بەهۆی كۆبوونەوەی شلە، دەستنیشانكردنی لە رێگەی پشكنینی ئیكۆی دڵ دەبێت، چارەسەركردنی دەوەستێتە سەر توندیی حاڵەتەكە، ئەگەر سووك بێت تەنیا پێویستی بە چاودێری و گۆڕینی شێوازی ژیان هەیە، ئەگەر توند بێت پێویستی بە وەرگرتنی دەرمان یان قەستەرە و چاككردن و گۆڕینی دەمەوانەكە هەیە.