بالیوزێ فەرەنسا ژ نێزیک سەرەدانا ئامێدیێ کر و پشتی گەریانەک بۆ جهێن شینواری بریاردا هژمارەکا جهێن شینواریێن ئامێدیێ نوژەن کەت ژ وانان زانینگەها قوبەهان.
وارشین سەلمان، قایمقامێ ئامێدیێ دیارکر کو ئەوان پێشوازی ل بالیوزێ فەرەنسا و شاندەکێ ل گەل دا کر و گوت، شاندەکێ پێکهاتی ژ ئیرك شوڤالیێ، بالیوزێ کومارا فەرهنسا ل عیراقا فیدرال و ئۆلیڤیێ دیکۆتنى، کونسوڵێ گشتى یێ کۆمارا فەرەنسا ل هەرێما کوردستانێ و نوینەرێ رێڤەبەریا شینوارێن دهوکێ و چەند کەسانێن دی سەرەدانا جهێن شینواری ل ئامێدیێ کر، گەنگەشە ل سەر چاوانیا نویژەنکرنا هژمارەکا جهێن شینواری هاتەکرن.
زێدەتر گوت، شاندێ ناڤهاتی بریار دا چەند شینواران نوژەن بکەت ژ وانان زانینگەها قوبەهان، منارا مزگەفتا ئامێدیێ، کەنیسا کەڤنا ئامێدیێ، ئەڤە دێ رویەکێ جوانتر دەت ئامێدیێ.
پێشتر ژی بالیوزخانا ئەمریکا بریاردا کو دەرگەهێ سەرەکیێ ئامێدیێ کو ب دەرگەهێ بەهدینان دهێتە نیاسین نوژەن بکەت و نوکە کار تێدا دهێتەکرن.
ل سەنتەرێ ئامێدیێ چەندین جهێن شینواری هەنە و دیروکا وان دزڤریت بۆ سەردەمێ عوسمانی و پێش وان ژی، دیسان ئامێدیێ ب پایتەختێ میرگەها بەهدینان دهێتە نیاسین و وارگەهەکێ پرە ژ شینواران.