ل ڤان چهند سالێن بوری رێژا كاركرنا ئافرهتان ل كهرتێ گشتی و تایبهت و كارێن سهربخوهیی دا بهر ب زێدهبوونێ ڤه چوینه، هندهك ژ وان پرۆژێن تایبهت داناینه و داهاتهكێ بۆ خێزانا خوه پهیدا دكهن، شههین ژی ئێك ژ وان كچایه كو ب رێیا كاركرن ل چهند كارێن چاندنێ داهاتهكێ پهیدا دكهت.
شههین عەبدلواحد، كچهكا دێرهلووكێ یا سەر ب دەڤەرا ئامێدیێ یه و كارهكێ تایبهت دكهت بۆ "وشە" گۆت: (پشتی كو ئهز ل كولیژا چاندنێ یا زانكۆیا دهۆكێ داوی هاتی، من خواست كارهكێ بكهم، بهلێ دهلیڤه نههاته پێش كو ل كهرتێ گشتی و تایبهت كار بكهم، لهوا نهچاربووم پهنایێ ببهم كارهكێ سهربخوه كو ئهو ژی ئهنجام دانا چهند پرۆژێن چاندنێ یه).
زێدهتر گۆت: (سالا بوری ب رێیا پرۆژهكێ ههڤپشك دناڤبهرا من و دوو دهرچویێن زانكۆیێ شیاین سهركهفتنێ بینین كو ئهو ژی پرۆژهكێ خیارێن پلاستیكی بوو، ئهڤ ساله من پرۆژهكێ دن یێ چاندنا كڤاركا ل مال دهستپێكریه و سوپاس بۆ خودێ نوكه هاتیه بهرههمی و تا رادهیهكێ باش پێگههشتیه و ئومێدهوارم بشێم خزمهتا خوه و مال و خێزانا خوه بكهم و ببمه بارسڤكی ژی بۆ حوكمهتێ و كهرتێ گشتی و داهاتهكێ بۆ خێزانا خوه پهیدا بكهم).
ناڤبری دیاركر ژی كو زێدهباری پرۆژێ خیار و كڤاركان، ههڤدهم پرۆژهكێ چاندنا بروكلی ب ههڤپشكی ل گهل ههڤالهكا خوه كریه و گۆت ژی: (كاركرن بۆ ههر كهسی گرنگه، ئافرهت ژی ب تایبهتی ئهگهر خودان زانستهكێ تایبهت بیت دڤێت رولێ خوه د خزمهتكرنا خێزان و جڤاكێ خوه ببینیت، دڤێت خێزان و دهروۆبهر ژی پشتهڤانیهكا تمام بۆ كهن، ژبهركو ئهم یێ ل سهر دهمهكێ دژین پێدڤی یه ههموو كهس تێدا كار بكهت و پشكداربیت د پێشڤهبرنا خێزانێ و وهلاتێ خوه).