د روودانا چەند رۆژێن بوری یا دهۆکێ، ژبلی زیانێن گیانی هەڤدەم، زیانێن زۆر یێن ماددی ژی ژبەر وەلاتیان و خودان کار و بازاڕان کەفتیە، ئێک ژ وان کەسێن کو ب ماددی زیاندار بوی کچەکا دهۆکێ یە بناڤێ هیڤی ئێحسان.
هیڤی دەربارەی بویەرێ دبێژیت: (دلگرانین ب روودانا چەند روژێن بوری یا باژێرێ دهۆکێ کو تێدا چەند کەس بوینە قوربانی کو پێکدهێن ژ جان فیدیایا پولیسان ل گەل قوتابی و کرێکاران، خودێ گیانێ وان ببەت بحەشتێ و سلامەتیێ بو برینداران دخوازین، دلگرانین کو روودانێن بڤی رەنگی ل دهوکێ و کوردستانێ روو ددەن).
زێدەتر گۆت: (ئەم ل بازاڕی بوین، مە هەست ب بێهنێ کر، پاشان ئەم ل بازاڕی دەرکەفتین و خوە دویر کر، پشتی بێهنەکێ، بێدەنگی ل دەوروبەرێن جهێ روودانێ دروست بو، خەلک جارەکا دی زڤرین جهێن خوە، بەلێ لێبورین ڤە ژ نیشکەکێڤە تەقینەکا ب هێز روویدا، سوپاس بۆ خودێ مە و هەڤپشکێن کارێ مە و چەندین کەسو قوتابی ب سلامەتی دەربازبوون، بەلێ ب مخابنڤە چەند کەسان گیانێ خوە ژ دەست دا و برینداربوون و دهوک و کوردستان ب گشتی خەمبارکر، روودانێ هەموو هیڤیێن مە ژ ناڤبرن کو پشتی دەرچونێ مە دخواست بحوە کار بکەین).
نڤبری ل بارا زیانێن روودانێ گۆت: (یا جهێ دلگرانیێ ئەوە کو زیانێن گیانی ل پەی روودانێ دروست بوون، دڤێت ب هەر رێیەکا هەبیت رێگریێ ل دووبارەنەبوونا وان بهێتەکرن، بەلێ ل گەل زیانێن گیانی، هەڤدەم زیانێن ماددی ژی ب چەندین مالو؟بازاڕ و ترومبێل و خەلکی ژی کەفت، ئێک ژ وان کەسێن کو ب ئەگەرێ روودانێ زیانداربووی. بازاڕێ مە ب هەڤپشکی ل گەل کەسەکێ دن، زیانێن بازاڕێ مە نێزیکێ 60 هزار دولاران ئانکو نێزیکێ 6 دەفتەر دولار، ژبەرکو بازاڕێ مە براندە و گرێدایی کوزماتیکێ یە و پرانیا بەرهەمێن مە ژ دەرڤە دهێن و تایبەتن، ئەڤە زێدەباری زیانێن ماددی ب سەدان کەسێن دی ژی کەفتیە هەر ل جهێ روودانێ و دەورۆبەران).
ژبلی زیانێن بازاڕێ هیڤیێ، زیان ب ئاڤاهیەکێ سێ نهومی و چەندین دوکان و مال و ترومبێلێن وەلاتیان و جهێن گشتی ل دەورۆبەرێ جهێ روودانێ کەفتیە.