ل پرانیا وەلاتێن جیهانێ کلینیکێن تایبەت ب چارەسەرکرنا ئاریشێن جڤاکی هەنە، بەلێ ل کوردستانێ ئەڤ یەک نینن، لەوا پرانیا ئاریشێن جڤاکی ژلایێ کلینیکێن یاسایی و دەرونی دهێنە دیتن، قوتابیێن پشکێن کومەلایەتی ژی دخوازن کو گرنگی ب کلینیکێن کومەلایەتی بهێتەدان.
دوعا محەمەد، قوتابیا زانکویا دهۆکێ و پشکا کومەلایەتی دیارکر کو پرانیا فەرمانگەهێن حوکمەتێ و کەرتێ تایبەت ژی دەرچویێن پشکێن کومەلایەتی نینن و گوت، دەرچویێن پشکێن کومەلایەتی ل زانکو و پەیمانگەهان رولەکێ هەری کارتێکەر بۆ دیتنا چارەسەریێن جودا یێن کومەلایەتی و جڤاکی هەنە، بەلێ وەکو پێدڤی گرنگی ب وان نەهاتیەدان، دیسان ل وەلاتێن جیهانێ دەرچویێن کومەلایەتی ب رێزا دەرچویێن پشکێن ئەندازیاری و ساخلەمی دهێت، بەلێ ل ڤێرە نە، لەوا دڤێت گرنگی ب وان بهێتەدان و ل شونا کەسانێن ب تەمەن دەلیڤە ب گەنجان بهێتەدان، مە کومەلناسێن زور شارەزا و خودان شیان هەنە و گرنگە دەلیڤە ب وان بهێتەدان خزمەتا جڤاکی بکەن، ئەم دشێن رولێ خوە ل قوتابخانە و پشکێن ساخلەمیا دەرونی و رێکخراوێن جودا ببینن یان کلینیکا ڤەکەن یێن تایبەت ب کومەلایەتی و جڤاکی، تێدا چارەسەریا ئاریشێن جودا یێن کومەلایەتی و جڤاکی بکەن و من ل بەرە پشتی داوی بهێم کلینیکەکێ دانم.
عەبدلجەبار محەمەد، قوتابیێ پشکا کومەایەتی ل زانکویا دهوکێ گۆت، زۆر گرنگە ب گورەی ئەو بسپوری و تایبەتمەندێن دناڤ جڤاکی دا هەیی مفا ل شیانێن جودا یێن جڤاکی بهێتە وەرگرتن، پشکێن کومەلناسی دناڤ زانکۆ و پەیمانگەهێن کوردستانێ هەیی نیشانە ل سەر هندێ کو پێدڤی یا ب وان هەیی، بەلێ جهێ داخێ یە زۆر ب کێمی روول ب وان دهێتەدان، دڤێت دناڤ قوتابخانان، جهەتێن یاسایی و مافێ مروڤی، دناڤ چاکسازیان و ساخلەمیا دەرونی زور گرنگی ب دەرچویێن پشکێن کومەلایەتی بهێتەدان، زور گرنگە گرنگی ب ڤەکرنا کلینیکێن کومەلایەتی وەکی هەموو کلییکێن دن ژی بهێتەدان.
پرشەنگ عومەر، ماموستا ل کولیژا زانستین مروڤایەتی پشکا کومەلناسی،دڤی واریدا گوت، هەبونا پشکێن کومەلناسی دناڤ زانکو و پەیمانگەهێن کوردستانێ بو پێگەهاندنا کاردەکێ پێشکەفتی ل سەر بنەمایێ زانستی زۆر گرنگە، ئەم وەکو پشک بەردەوام کار ل سەر پێگەهاندنا قوتابیێن خوە دکەین بو هندێ بشێن ل پاشەرۆژێ خزمەتا جڤاکێ خوە بکەن، بو نموونە ل روژێن بوری مە گەشتەکا زانستی بۆ رێڤەبەریا نەهێلانا توندۆتیژیا دژی ئافرەت و خێزانێ ل دهوکێ کر، قوتابیێن خوە ل نێزیک ئاشنایێ وێ یەکێ کر کا جەوا دوڤچون ل سەر ئاریشێن خێزانی و جڤاکی دهێنەکرن کر داکو قوتابی بزانن چەوا مافێن وان کەسان دهێنە وەرگرتن کو توندوتیژی هەمبەر وان دهێتەکرن، ئەم دێ ل سەر چالاکیێن خوە بو خزمەتا قوتابیان بەردەوام بین.
دهوک، نەوزاد هلۆری: