دادگهها تێههلچونا ناوچا دهۆكێ، ئامارێن كهیسێن گشتى یێن سالا بورى ل سنورێ پارێزگهها دهۆكێ و ئیدارا سهربخوهیى یا زاخۆ بهلاڤكرن، ب گورهى ئامارێن وان ئاماران مارهبرین كێم بویه و جودابوون ژى زێدهبویه.
ب گورهى ئامارێن دادگهها تێههلچونا ناوچا دهۆكێ، سالا بورى ل سنورێ پارێزگهها دهۆكێ و ئیدارا سهربخوهیى یا زاخۆ 12 هزار و 967 مارهبرین هاتینه توماركرن كوپ رانیا وان ژى دكهڤنه دهۆك و زاخۆ و ئاكرێ، كێمترین ژى دكهڤنه سنورێ قهزا باتیفا كو تنێ 65 مارهبرین بوون، دیسان ههر ل سالا بورى هزار و 992 ههڤژین ل ههڤدو جودا بوینه كو پرانیا وان ژى دكهڤنه دهۆك و زاخۆ و سێمێلێ، كێمترین ژى دكهڤنه سنورێ قهزا باتیفا چوار جودابوون بون، ژبلى ڤێ یهكێ 29 حالهتێن ههڤژینیا دوویێ و 815 حالهتێن پهسهندكرنا ههڤژینیا دوویێ ل دهرڤهیێ دادگههێ هاتینه توماركرن، ههر ب گورهى ئامارێن دادگهها ناڤبرى، 340 حالهتێن مارهبرینێ دناڤ ئاینێن دن ل سنورێ پارێزگهها دهۆكێ و ئیدارا سهربخوهیی یا زاخۆ هاتینه توماركرن، ل گهل 110 حالهتێن ژێكجودابوونا ههڤژینان، ب گورهى ئامارێن سالا 2021ێ، ل سنورێ پارێزگهها دهۆكێ 13 هزار و 441 حالهتێن مارهبرینێ و 887 حالهتێن ئینانا ههڤژینیا دوویێ، دیسان هزار و 796 حالهتێن جودابوونێ هاتینه توماركرن.
شارهزایێن بوارێ قانونى ئاماژه دكهن كو بهرچاڤترین ئهگهرێن جودابوونا ههڤژینان دزڤریت بۆ رهوشا دارایى و نه وهكههڤیا ئاستێ رهوشهنبیرى و خیانهتا ههڤژینیى و ئاریشهیێن جڤاكى و چهندین ئهگهرێن دى.
ههر ب گورهى ئامارێن دادگهها تێههلچونا ناوچا دهۆكێ، سالا بورى ل سنورێ پارێزگهها دهۆكێ و ئیدارا سهربخوهیى یا زاخۆ، هزار و 304 كهیس ل دادگهها تێههلچونا ناوچا دهۆكێ هاتینه توماركرن، هزار و 230 كهیس ل دادگهها تاوانان هاتینه توماركرن، 665 كهیس ژى ل دادگهها ناوجهوانان هاتینه توماركرن، دیسان ل دادگهها كهتنێ ژى نهه هزار و 182 كهیس هاتینه توماركرن، ل داگهها ڤهكولینێ ژى 22 هزار و 477 كهیس هاتینه توماركرن، دیسان ل دادگهها بارێ شارستانى سێ هزار و 476 كهیس و ل دادگهها بارێ كهسایهتى پێنج هزار و 344 كهیس و ل دادگهها كار ژى 70 كهس هاتینه توماركرن، ل ههر ئێك ژ دادگههێن بهرایى ههشت هزار و 122 كهیس و دادگهها كاروبارێن 281 كهیس و ل دادگهها بهرهنگاربوونا توندوتیژیا خێزانى یێن كهتن 296 كهیس و ل دادگهها بهرهنگاربوونا توندوتیژى خێزانى یێن ڤهكولینێ سێ هزار و 863 كهیس هاتینه توماركرن.