ژ ئەگەرێ نەخوشیەکا هەتا نوکە نەهاتیە زانین، نێزیکێ 2000 کەس ددەما حەفتیەکێ دا ل دینارتە هاتنە ڕەوانەکرن بو نەخوشخانێ و پشکەکا هەری زور ژ وان قوتابی بوون.
فیراس زێباری، وەلاتییەکێ ناحیا دینارتێ یا سەر ب قەزا ئاکرێ یە بو "وشە" گوت، ب ئەگەرێ نەخوشیەکا هەتا نوکە نەهاتیە زانین نێزیکێ 2000 کەسان ل سەنتەر و دەوروبەرێ دینارتە هاتینە رەوانەکرن بو نەخوشخانا دینارتە کو هەمووان ژی ئێک جورە نەخوشی و ئازار هەبویە.
زیدەتر گوت، تووشبوو ، توشی زکچون و ڕەشاندنێ دبیت، ئەز و چەندین کەسوکار و نێزیک خوە ژی تووش بوینە، تشتێ نەخوش ئەوە کو پرانیا جارا دەرمان ل نەخوشخانێ نەماینە و خەلک ل دەرڤە دکریت، هەتا خوە ل هندەک دەرمانخانێن دەڤەرێ ژی نەماینە، ئەڤێ یەکێ کارتێکرن ل نەخوشان کریە، دیسان پرانیا وان کەسێن تووش بووی قوتاب نە، روژانە نێزیکێ 40 بو 50 قوتابی نەشێن بچنە قوتابخانێ.
وشە، پەیوەندی ب نەخوشخانا دینارتێ کر، بەلێ ژبەرکو لژنەیەک بو دۆڤچون ل سەر نەخوشیێ هاتیە پێکئینان، چوو زانیاری ل سەر نەخوشیێ نەدان.
ب گورەی پێزانینێن دەزگەهێ رۆژنامەڤانیا وشە، ئەڤ نەخوشیە ب ئەگەرێ گۆرانکاریێن کەشوهەوایی و ئاڤا ڤەخوارنێ و وەرزێ سەمایێ، دیسان ژ ئەنجامێ تێکەلیێ و ڤەگوهاستنێ ژ کەسەکێ بو کەسەکێ دن دروست دبیت، نەخوش توشی زکچون و رەشاندنەکا خراپ دبیت، ئەڤ نەخوشیە پرانیا وان کەس گرتینە کو دکەڤنە دناڤبەرا ژیێ چوار بۆ 16 سالی واتە زارۆک و سنێلەیان، چارەسەریا وێ هەر ل دینارتە دهێتەکرن، پرانیا نەخوشان ژی پشتی سێ روژان دهێنە رەوانەکرن بو مال، پشکەکا هەری زور یا وان کەسێن تووش بوی ل نەحخوشخانێ دهێنە نڤاندن.
دینارتە ئێک ژ ناحیێن سەر ب قەزا ئاکرێ یە و ژبلی سەنتەر نێزیکێ 85 گوند هەنە، نێزیکێ 30 هزار کەس تێدا دژین.