وەکو دیارە ئەڤرۆ 44 سال ل سەر وەغەرکرنا بارزانی نەمر دەربازبوون، دڤێ روژێ دا ب چالاکیێن جودا خەلک سووز و پەیمانێن خوە نوو دکەن، سیاسەتمەدارەکێ کورد ل دهۆک ژی دیارکر کو بارزانی نەمر دەستکەفتێن هەری زور بو گەلێ کوردستانێ دەستخوڤە ئیناینە.
د. حەمید باڤی، سیاسەتمەدار و کەساتیێ پارێزگەها دهۆکێ دیارکر کو رێبەرێ گەلێ کوردستانێ، خودێ ژێ رازی بیت مەلا موستەفا بارزانی سەرکردەیەکێ زور مەزن بوو د دیروکا گەلێ کوردستانێ دا و گوت، بارزانی نەمر د ژیانا خوە دا زور کارێن مەزن کرینە، ژ وانان د هەوارا خودێ ژێ رازیی بیت شیخ مەحمود حفید زادە 1978- 1956 چوو بوو دەمێ بەڕەڤانی ژ سولەیمانیێ و ژ مللەتێ کورد دکر، د هەوارا کومارا کوردستانێ و خودێ ژێ رازی پێشەوا قازی محەمەد 1893- 1947 ژی چوو بوو ب لەشکەرەکێ زور مەزن ڤە، دیسان ل سالا 1947 سنورێن سێ دەولەتێن داگیرکەر بڕین عیراق، ئیران، تورکیا ب شەڕ وب بەڕەڤانی ول رویبارێ ئاراس دەرباز بوو بو ئێکەتیا سوڤیەت و خوە نەدا دەستێ رژێمێن داگیرکەر ودوژمن، 11-12 سالا ل پەنابەریێ دا ل سوڤیەت و دەست ژ خەباتێ و ژ مللەتێ خوە بەرنەدا هەتا ب سەرفەرازی ڤەگەریایە عیراقێ ل سالا 1958ێ، دیسان سەرەرای ئەو پیلانێن چەندین جاران دژی ژیانا وی هاتینە بجهئینان بتایبەتی ل سالا 1971ێ، بەلێ خودێ پاراست.
زێدەتر گوت، بارزانێ نەمر زور دەستکەفتێن گرنگ ب دەستخوەڤە ئینابوون بو گەلێ کوردستانێ ژ وانان هشیارکرنا مللەتی و ئاڤاکرنا روحەکا لێبورینی و پێکڤەژیانێ و دادپەروەریێ د ناڤبەرا هەمی تەخ وچین و پێکهاتێن کوردستانی یێن نەتەوی وئایینی ومەزهەبی وجڤاکی دا، ئاڤاکرنا لەشەکەرەکێ ئێکگرتی و بهێز ل سەرانسەری کوردستانێ هەر ژ خانەقین هەتا زاخو بەلکو ژ شنگال وزومار هەتا جەلەولا ومەندەلی، هەردیسان رێکەفتنا 11ی ئادارا سالا 1970ێ کو ببوویە بونیاتێ حوکمێ زاتی و شەنگستێ فیدرالیەتێ وب دەستڤەئینانا مافێن گەلێ کوردستانێ یێن رەوا.
سیاسەتمەدارێ ناڤبری د درێژاهیا ئاخفتنێن خودا گوت ژی، دەمێ ژدایکبوونا بارزانی یان وەغەرکرنا وی دهێتە بیرئانین وساخڤەکرن دڤیا چەند خالەک ل بەرچاڤ بهێنە وەرگرتن ژ وانان، دەستورەک و سیستەمەک بو حوکمرانیێ و برێڤەبرنا دەستهەلاتێ بهێتە دانانێ تێدا بەختەوەریا مللەتی ل بەرچاڤ بهێتە وەرگرن نەخاسمە دەربارا کەرتێ پەروەردێ وخواندنێ وساخلەمیێ وڤەدیتنا دەلیڤێن کاری وئاڤەدانکرنا وەلاتی ژ هەمی ئالیان ڤە، ئاڤاکرنا لەشکەر و پولیس و ئاسایشەکا ئێکگرتی ل سەرانسەری کوردستانێ کە بەڕەڤانیێ ژ کوردستانێ بگشتی و ژ هەمی مللەتی بکەن، رێکخستنا داهاتێ کوردستانێ گاز وغاز، وکومرک وخالێن سنوری، ناڤخوویی و کومکرنا وی ل خەزینا هەرێمی دا بهێتە دابەشکرن ل سەر وەلاتیان و پروژان ب دادپەروەرانە، دا ئەڤ پەیدابوون و ژێکڤەبوونا تەخێن جڤاکی زەنگین و هەژار کێم ببیت و نە مینیت، حکومەت بخوە بکارێ خوە ڕاببیت وکومپانیان ژ کارێ حکومەت ڤەدەر بکەن .. دا سامانی مللەتی بەس ب هەروە بچیت، دادپەروەریا جڤاکی پەیداببیت و یاسایەکا ب رێک وپێک بو فەرمانبەران ومووچەوەرگران بهێتە دانانێ ل سەر بنیاتێ خێزانداریێ، باوەرنامێ، سالێن خزمەتێ، پوست و پلە، ومەترسیا کاری کو نێزیکی 1l6ێ بیت جودایی دا مللەت هەمی ب خوشی وب بەختەوەری وب سەرفەرازی بژیت، ب دیتنا من بجهئینانا ڤان خالێن سەری دێ بیرەوەریێن ڤی سەرکردێ مەزن هێنە ساخڤەکرن.