لەگەڵ كردنەوەی پێشانگەی نێودەوڵەتی سلێمانی بۆ كتێب، هەر لەناو پێشانگەكەدا نووسەر و ڕۆشنبیری دیاری كورد " فاروق ڕەفیق" بەدەنگی بەرز هاواری كرد، ئەمەپێشەنگەی كتێبی ئایینییە و هیچ كتێبێكی زانستە مرۆییەكانی تیێدا نییە، هاوكات لەگەڵ بڵاوبوونەوەی ئەم دیمانەیەی نووسەر بەهەزاران كەس لە سۆشیال میدیای كوردی دژی وەستانەوە و ئەوەیان بە بێڕێزی لەبەرامبەر پیرۆزی خەڵك دایە قەڵەم.
لەگەڵ كردنەوەی پێنجەمین پێشانگەی سلێمانی، ڕەخنەیەكی زۆر هاتە ئارا كە زۆرترین كتێبی ئاینیی تێدایە و كەمترین كتێبی زانستی و بوارەكانی فەلسەفە و ئەدەب و رۆشنبیریی تێدایە، لەمبارەیەوە هەر لە یەكەمین رۆژی پێشانگەكە نووسەر و ڕۆشنبیری كورد فارووق ڕەفیق لەناو پێشانگەكە و لە چاوپێكەوتنێكی تەلەڤزیۆنیدا ڕای گەیاند، ئەمە پێشانگەی نێو دەوڵەتی نییە، ئەوەی هەیە كۆمەڵێك كتێبی ئاینی و ئەو كتێبە كوردییانەی بەردەركی سەرای سلێمانین.
فارووق دەپرسێت ئەگەر پێشانگەی نێودەوڵەتییە، كوان كتێبە باشەكانی عەرەبی و فارسی و توركی و ئینگلیزی؟ ئەو هەموو سەرچاوە گەورەیە بەزمانی ئینگلیزی هەن، بۆچی لەم پێشانگەیەدا نین؟ هەر خۆشی وەڵامی دایەوە كە ئەوە پێوەندیی بەوە هەیە سەرپەرشتیارانی ئەم پێشانگەیە، دیدێكی ئایدۆلۆجییان سەپاندووە و هەلومەرجی ئەوەیان نەڕەخساندووە دەزگای چاپ و بڵاوكراوە گەورەكانی دنیا بێن بەشداریی پێشانگەكە بكەن.
عەتا هەڵەبجەیی خاوەن دەزگای هەژاری موكریانی، لە لێدوانێكی تایبەتدا بۆ"وشە" گوتی، ئەو دەنگۆیانە بەشێكی راست نین، پێشانگەكە كتێبی زۆری تێدایە، چ ئینگلیزی و چ ئەوانی تریش، بەڵام ڕەنگە بۆ دەزگایەك لە بواری ئابووری دەری نەهێنیت لە وڵاتانی ئەوروپییەوە بێن بەشداری بكەن، ئەوە بۆ ئەوان زۆر دەكەوێت، بەڵام پێشانگەكە هەموو كتێبێكی لە هەموو بوارێك و بەهەموو زمانێك تێدایە.
گوتیشی راستە كوردی و عەرەبی زۆرترن، ڕاستیشە بواری ئاینی زۆرترە لە پێشانگەكە، بەڵام ئەوە پێوەندیی بەوە هەیە كە خەڵك بۆ ئەو بوارە باشتر كتێب دەكڕن و دەخوێننەوە، بۆیە خواست لەسەر چی زۆر بوو، ئەوە لە بازاڕدا زۆرترە.
هەر دوای لێدوانەكەی فارووق رەفیق، هەڵایەكی زۆر لە سۆشیال میدیای كوردیدا دروست بوو، بەشێكی زۆر دژایەتییان بۆ قسەكانی فارووق دەربڕی و پێیان وابوو ئەوە سووكایەتییە بەموقەدەساتی خەڵك، لەمبارەیەوە حوسێن رابی نووسەر و مامۆستای زانكۆ نووسیویەتی، گوێم لە قسەكانی فارووق ڕەفیق گرت، كاك فارووق ڕۆشنبیرێكی مەیدانی ڕاستەقینەیە، خواروخێچی كە دەبینێت بە دەنگی بەرز هاوار دەكات، قسەكانی لێرەشدا ڕاستە. مەعریفەی ئاینی تەنگی بە هەموو مەعریفەكانی تر هەڵچینیوە، چونكە بەڕاستەوخۆ و ناڕاستەوخۆ لەلایەن دەرەبەگە نەخوێنەوارە ناڕۆشنبیرە گوناهبارە فەرامانڕەواكانەو، بۆ سووككردنی گوناهەكانیان و ئارامكردنەوەی ویژدانیان و هەڵخەڵەتاندنی خەڵك پشتگیری دەكرێت.
دەشڵێت، ئیزافە لەسەر قسەكانی كاك فارووق، تەنانەت هەندێك لە كتێبفرۆشەكان كە هیچ باوەڕێكی دینییان نییە، بەناچاری دەستیان كردووە بە فرۆشتنی كتێبی ئاینی و ڕێكلامی بۆ دەكەن، چونكە بازاڕی هەیە، ئەمە ئاساییە ئەوان بە پلەی یەكەم بازرگانن.
قەینا كتێبی ئاینی بخوێنرێتەوە، تەنانەت ئەگەر زۆریش بخوێنرێتەوە، بەڵام بەبەراورد بە بوارەكانی تر دەبێت كەمتر بێت، چونكە مەعریفەی سەردەم نییە، ئایین ٧٠ هەزار ساڵە هەیە (یەكەم بەڵگەكان لەسەر ناشتنی مردوو ئەوە دەردەخات)، بەڵام هیچ كێشەیەكی فكری و كردەكی ئەم دنیایەی بۆ چارسەر نەكرا، بۆیە مرۆڤایەتی بواری تری هێنایە ئاراوە، فكر و فەلسەفەی ڕەخنەیی و لە كۆتاییدا زانست، كۆمەڵگەیەك كە ڕووی لە پێشە بە پلەی یەكەم، زانستییانە بیر دەكاتەوە و بە پلەی دووەم فەلسەفییانە و ئاین و عیرفان( خۆ سڕكردن) دەچێتە پلەی سێیەم.
ڕابی وردتر دەبێـتەوە دەنووسێت، بەرپرس لە دروستكردنی ئەم بارودۆخە دەسەڵاتدارانی هەرێمن، خەریكن كوردستان بەرەو غەزە و مووسڵ و حەلەببوون دەبەن! جەنگاوەرانی ئەو شارانە بۆ ئەم دنیا و ژیانێكی باشتر لەم دنیا ناجەنگن، بەڵكو بۆ ژیانی دوای مەرگ دەجەنگان و دەجەنگن. باڵەخانە جوانەكانی كوردستان، جوانتر لە باڵەخانەكانی غەزە و مووسڵ و حەڵەب و سەنعا نین، شتی جێگیر لەسەر فكری جێگیر و پێشڕەو دادەمەزرێت.
پێشانگەكەی سلێمانی بۆ ساڵی پێنجەمە بەردەوامە، بەڵام تا ئێستە نەیتوانیوە وەك پێشانگەیەكی نێودەوڵەتی دەربكەوێـت، چونكە پێشانگەی نێودەوڵەتی دەبێت زۆربەی وڵاتانی دنیای تێدا كۆ بكەیتەوە، ئەوەی ئەمساڵ بووە جێی سەرسوڕمانی خەڵك، بەشداریی شیعەكانی عێراق بوو لەو پێشانگەیەدا تەنانەت دەزگایەك بەناوی حەشدی شەعبی، شوێنێكی گەورەی گرتووە و چوار كتێبی داناوە و خۆی نمایش دەكات، ئەوە لە كاتێكدا ئەو ناوە خۆی لە ئاستی ناوچەكە و دنیایش وەك میلیشیا ناسراوە و هیچ پێوەندیی بەكاری كتێب و رۆشنبیرییەوە نییە. ئاودێر ڕەحیم وای گوت.