سەحەر عەباس، خانمە پێشكەشكاری یەكێك لە كەناڵە عێراقییەكان، داوای یاسایی لە دژی مستەفا سەنەد پەرلەمانتاری عێراق بەرز كردەوە، چونكە سنووری بەزاندووە.
مستەفا سەنەد لە پۆستێكی فەیسبووكیدا ڕووی كردووەتە خانمە پێشكەشكارەكە و نووسیویەتی: سەحەر عەباس، بزانە من ناتوانم ڕەنج رۆڤەر و جی كڵاست بۆ بكڕم یان شوقەیەكت لە عەمان بۆ بكڕم" ئەمەش بەپێی ئەو داوایەی لە دژی بەرز كراوەتەوە، هێمایەكی ڕوونە بۆ سووكایەتی بە سەحەر و تۆمەتباركردنییەتی بەوەی ئەو شتانەی لە بەرپرسی تر وەرگرتووە.
داواكار لە شكاتەكەیدا نووسیویەتی، ناوبراو (سەحەر) هیچ پێوەندییەكی لەگەڵ داواكراودا نییە تا وای لێ بكات تۆمەتی لەو جۆرەی لەسەر بڵاو بكاتەوە و لە بەردەم ڕای گشتیدا ناوی بزڕێنێت و هەرگیز هیچ داوایەكی مادی لێ نەكردووە تا بەو شێوەیە لەسەری قسە بكات.
بەپێی دەنگۆی سۆشیاڵ میدیای عێراقی بێت، ئێستە پەرلەمانتار و بەرپرسەكانی حكوومەتی عێراق، لە ڕێی لەخشتەبردنەوە بە زەبری پارەی زۆر و كڕینی ئۆتۆمبێل، دیاردەی كچە مۆدێل و پێشكەشكاری مۆدێلستیان لە عێراقدا زیاد كردووە و خەریكە دەبێتە خێراترین پیشە بۆ پەیداكردنی پارە.