بازاڕی هاوچەرخی سەوزە و میوەی ئاكرێ بە دووەم گەورەترین بازاڕی هاوچەرخی سەوزە و میوە لە عێراق دادەنرێت بە كوژمەی 28,600,000,000 دینار.
سەرۆكی حكوومەت لە گوتارێكدا دووپاتی كردەوە كە لە چوارچێوەی كارنامەی حكوومەتی هەرێمی كوردستاندا بۆ هەموجۆركردنی ئابووریدا، بەردەوام دەبین لە گرنیگدان بە كەرتی كشتوكاڵی و پاراستنی بەرووبوومی ناوخۆیی.
ئەمەش دەقی گوتاری سەرۆكی حكوومەتی هەرێمی كوردستانە:
بناڤێ خودێ یێ مەزن و دلۆڤان
ئامادەبوویێت بەڕێز:
سوپاس بۆ ئامادەبوونا هنگۆ، گەلەك بخێر بێن، جێی دلخۆشییە كو دبینین هەر رۆژێ ل جێیەكێ كوردستانێ، بەرێ بناخێ پرۆژەكێ دهێتە دانان یانژی پرۆژەك دێتە جێبەجێكرن و پێشكەفتن ل كوردستانێ یا بەردەوامە.
ئەز خۆشحاڵم جارەكا دی دێهێمە دەڤەرا ئاكرێ و بەردەڕەش و ل قەزا ئاكرێ بۆ دانانا بەرێ بناخێ پرۆژەیەكێ گرنگ كو پرۆژەی بازاڕێ هاڤچەرخێ فیقی و عەلوەیە.
ئاكرێ ئێكە ل كەڤنترین باژێرێت كوردستانێ و ئێكە ل كەڤنترین قەزایێت كوردستانێ و عێراقێ، مێژوویەكا گەلەك دێرین یا هەی. ل رویێ جوگرافیێ و ئابووریێ ڤە، ناڤچەیەكا زۆر گرنگ و دەوڵەمەندە، ب تایبەت ل بیاڤێ چاندنێ. ل رویێ گەشتوگوزاریێش، ناڤچەیەكا گرنگە و چەندین جهێت گەشتیاری یێت لێ هەی و پلانا حكومەتا مە ئەوە كو ل وان هەردو بوارادا ڤێ دەڤەرێ زۆرتر پێش بێخین و دەرفەتا كاری بڕەخسینین.
بەری بێمە ڤێرێ، ئەز چوم سەرەدانا هەندەك جوتیارا بكەم ل كێلگەها چاندنا پەتاتا و د گەل هژمارەكا وان جوتیارانە من ئاخفت و من گوێهێ خۆ دایێ، جهێ دلخۆشییە كو دبینین بەرهەمێ پەتاتەیا ل كوردستانێ ڕۆژ ب ڕۆژێ زێدە دبیت و گەلەك زێدەترە ل پێویستیا ناڤخۆیی، ڤێ گاڤێ ل كوردستانێ پەتاتە دهێنە بەرهەم هینان و شێوازێ چاندنێش بەرەڤ شێوازەكێ زانستی یێ پێشكەفتی دچیت. ئەڤ بەرهەمە نە بتەنێ كوردستانێ، بەلكی تێری هەموو عێراقێش كات و هەنگاڤێت پێدڤیش یێت هاتینە هاڤێتن بۆ هناردەكردنا بەرهەمێ پەتاتا خومالیا كوردستانێ بۆ دەرەڤەی وەلاتی، دیارە داخوازیەكا زۆریش یا ل سەر هەی.
دچارچویڤێ بەرنامێ هەمەجۆركرنا داهاتێ كوردستانێ ل ڤێ حكومەتێ، مە گەلەك پیتە و گرنگی ب بابەتێ چاندنێ و كشتوكاڵیێ ل كوردستانێ دای و مە شۆڕشەك ل چاكسازیا كشتوكاڵی ل كوردستانێ یا دەست پێ كری. بەس ئەڤە دەستپێكە، هێشتا زۆر پێنگاڤێت مای بۆ هندێ ئەم پێ چێبین كەرتێ كشتوكاڵی ل كوردستانێ بگەهینینە ئاستەكێ ستانداردێ جیهانی كو نە بتەنێ مفای بۆ جۆتیار و خەڵكێ ڤێ دەڤەرێ بدات، بەلكی ببیتە سەبەتا خۆراكی بۆ هەموو عێراقێ و بۆ ناڤچەش. ئەڤە دێ دیسان رێخوشكەر بیت بۆ كەرتێ پیشەسازیێ و دروستكردنا كارگەهاش و دەرفەتێ كارێ ل ڤان كەرتا زێدەتر بێتە بەرهەڤكرن.
وەختێ من د گەل ڤان جۆتیارا دئاخفتی، وا هندەك گازندە هەبوون، ئێك ل گازندێت وان ئەو بی كو بەرهەمێ پەتاتا دەرڤە ل هەندەك سنوورا داخلی هەرێما كوردستانێ دهێتە كرن كو كاریگەریەكا نەرێنی ل سەر بەرهەمێ ناڤخۆیێ جۆتیارا هەی، ئەم وەكی حكومەت دێ دیڤچوونێ ل سەر وی بابەتەی دكەین، وەزیرا كشتوكاڵێ بەڕێز بێگەرد یا لێرە و د گەل وەزارەتا دارایی دێ دیڤچوونێ كەین بۆ هەندێ كو پاڵپشتی و پشتەڤانیا جۆتیارا بهێتە كرن، ئەڤ بەرهەمێت كو ل ناڤ هەرێما كوردستانێ تێنە بەرهەم هینان، ڕێكی نەدەین ل دەرڤە داخیل ببن، بۆ هندێ دا پشتیڤانیا جوتیارا یا بەردەوام بیت و ئەگەر ئەم ببینین كو ب شێوەیێت نایاسایی ئەڤ كارە تێتە كرنێ، دێ ئیجرائاتێ پێدڤیش بەرامبەری ڤان تشتا كەین. ل لایەكی دیڤە داخازا ڤان جۆتیاران ئەو بو كو بابەتێ ئاڤێ و بەنداڤان بێتە چارەسەر كرن. هەر د بەرنامەی حكومەتێ دایە كو ئەم چەندین بەنداڤێن دیش دروست بكەین، ئێك ل وان بەنداڤا ئیسماڤا باكرمان دبیت كو دێ گەلەك مفایێ بۆ دەشتا ناڤكوڕێ و جوتیارێت ڤێ دەڤەرێ هەی، دێ ئەڤ زەڤیێت زۆرێ ب خێر و بەرەكەت، بەرهەمێ وان گەلەك زێدەتر كەت ئینشائەڵا.
هەر د بەرناما حكومەتا هەرێما كوردستانێ ل چارچویڤێ گرنگیدانێ ب هەمی ناڤچەیێت كوردستانێ دا، گرنگییەكا زۆریش مە ب سنوورێ ئاكرێ دایە. ل سنوورێ ئاكرێ، چەندین پرۆژە ل بوارێت ڕێگەوبان و ئاڤێ و كارەبێ و دروستكرنا قوتابخانەیان و دروستكرنا زانكۆیا ئاكرێ هاتیە ئەنجام دان.
هاووڵاتیێت خۆشتەڤی، پێتڤی ب خزمەتكرنەكا پترن و ب پشتراستیڤە ل پاشەرۆژێ دێ گەلەك پڕۆژەیێت زێدەتریش بۆ وان هێنە جێبەجێ كرن.
ئارمانجا سەرەكی یا مە فرەجۆركرنا ئابووری و ژێدەرێت داهات و دروستكرنا ژێرخانەكا ب هێزە د چارچویڤێ گرنگیدان و پێشئێخستنا كەرتێ چاندنێ كو ئێك بوویە ل وان شۆلێت كو هەتا نوكە مە كری، بۆ ڤێ مەبەستێ ب هەڤكاری ل گەڵ كەرتێ تایبەت، مە دەست ب ئەنجامدانا چەندین پڕۆژەیێت گرنگ كر، ل وانا دروستكرنا چەند ناڤچەیێت پیشەسازیا خارنێ و ب بازاڕكرنا گەنمێ هەرێما كوردستانێ و هنارتنا بەروبوومێ جوتیارێت مە بۆ بازاڕیت دەرڤە. مە چەندین بەنداڤێت جۆراوجۆر ل ناڤچەیێت جوداجودا دروستكرینە، كو دبنە پاڵپشت بۆ بەرهەمێت خوماڵی و جوتیارا.
دەڤەرا ئاكرێ، یا بناڤ وبانگە ب چەندین بەرهەمێت چاندنێ، وەكی برنج و پەتاتە و تەحین و سماق مە هەندەكیش لێرە دیتن، ئەم بێگومان دێ هاریكاریا وان كەین كو ئەڤ بەرهەمە بۆ دەرڤەش بێنە هنارتن، هەرچەندە ئەز یێ ئاگادارم كو هەندەك ل وان بەرهەمان یێ دەست پێ كری و بو دەرڤە دچن. دێ ئەم هەوڵێت خو ددەین بۆ هندێ بازاڕەكێ زێدەتر بو بەرهەمێن ناڤخویی بو هەمو جوتیارێت كوردستانێ بێتە ڤەدیتن.
ئەز دووبارە دەستخوشیێ ل كۆمپانیا جێب ب جیكار دكەم بۆ ڤێ پرۆژێ گرنگ و پێویستە ل سەر ئاستێ ستانداردێت نێڤدەوڵەتی بیت، ئەزێ د ڤێ باوەڕێیدامە كو پشتیڤانیەكا زێدە بۆ جوتیارا بەرهەڤ دكەت و ئاڤاكرنا ڤی بازاڕەی، دبیتە پاڵپشتەك بۆ پێشڤەبرنا كەرتێ چاندنێ و كشتوكاڵێ ل سەر ئاستێ كوردستانێ.
جارەكا دی پیروزە ل مە هەمیا هەر بمینن د خێر و خۆشیێدا و كوردستانیش هەر یا ئاڤەدان بیت.