وەرزی حەجی ئەمساڵ كۆتایی هات، بەڵام بەهۆی گەرمایەكی زۆرەوە وەرزێكی ئاسایی نەبوو و ژمارەیەك لەوانەی چوونە سعوودیە بۆ بەجێگەیاندنی فەریزەی حەج گیانیان لەدەست دا، وەزیری تەندروستیی سعوودیە رای گەیاند كە ژمارەی ئەوانەی لەم وەرزە گیانیان لەدەست داوە 1301 حاڵەتە بووە و زۆرینەی ئەوانەن كە مۆڵەتی حەجكردنیان نەبووە.
تەلەڤزیۆنی سعوودیە لە فەهد عەبدولرەحمان جەلاجل، وەزیری تەندروستیی سعوودیەی گواستەوە، 83%ی ئەوانەی لەم وەرزەی حەج گیانیان لەدەست داوە لەوانەن كە ڤیزەی حەج یان مۆڵەتی حەجیان نەبووە، ئەوانە ماوەیەكی دوورودرێژ بێ حەسانەوە و شوێن لەبەر خۆر رۆیشتوون و ژمارەیەكیان بەتەمەن یان نەخۆشی درێژخایەنیان هەبووە.
روونی كردەوە، ژمارەیەك لەوانە كارتی ناساندنیان پێ نەبووە، بۆیە كاتی پێویست كرد تا ناسرانەوە و خزمەتگوزاریی پێویستیان پێشكەش كرا، كە زیاتر لە 140 هەزار خزمەتگوزاریی تەندروستی و چارەسەری پێشكەش بەو حاجیانە كرا كە مۆڵەتیان نەبوو، جیا لەوە 95 نەخۆشی تر هەن كە چارەسەری وەردەگرن.
دوێنێ شەموو كاروان ستوونی، گوتەبێژی حەج و عومرەی هەرێمی كوردستان رای گەیاند، ئەمڕۆ تەرمی حاجییەكی تری هەرێمی كوردستان لە سعوودیە دۆزرایەوە، ناوی شاكر شكور عومەرە و خەڵكی شارۆكەی بەردەڕەشە، بە ڤیزەی گەشتیاری سەردانی سعوودیەی كردووە.
باسی لەوەش كرد، ژمارەی ئەو حاجییانەی كۆچی دواییان كردووە گەیشتە 24 حاجی لە هەرێمی كوردستان، بڕیارە دوو رۆژی داهاتووش گەڕانەوەی حاجیان بۆ هەرێمی كوردستان دەست پێ بكات.