پشتی دیاربونا بکەرێن سوتنا بازاڕێ وان، بریارە سوبەهی خودان بازاڕ و زیاندارێن بازاڕێ چەلێ ل دهوکێ سکالایێ تومار بکەن.
وەلات ئوزمانی، سەڕۆکێ سەندیکایێن کریکاران ل دهۆکێ بو "وشە" گوت، پشتی دیاربونا بکەر و ئەنجامدەرێن بازاڕێ سوتی یێ چەلێ ل دهۆکێ، وەکو ژلایێ وەزارەتا نافخوە یا عیراقێ هاتیە راگەهاندن، خودان بازاڕ و زیاندارێن بازاڕێ چەلێ ل دهۆکێ دێ سکالاییەکێ ل سەر ئەنجامدەران تومار بکەن داکو مافێ خوە دەستخوڤە بینن.
زێدەتر گوت، هەر دناڤ بازاڕێ چەلێ دێ دەست ب کومکرنا سکالا هێتەکرن، پاشی دێ هێنە بلندکرن بو دادگەها دهۆکێ و ئالیێن شولەژێ، بۆ هندێ بکەرێن وان بهێنە سزادان و مافێ خودان کار و بازاڕێن چەلێ ژی بهێتە زڤراندن.
ئێک ژ خودان بازاڕێن چەلێ دیارکر کو ئەو دلخوش بو کو بکەرێن سوتنا بازاڕێ وان هاتینە گرتن و گۆت، مخابن کو بکەرێن سوتنا بازاڕێ مە ئەندامێن پەکەکە و هێزەکا سەر ب ئیکەتی بون، ئەڤە پتری سێ هەیڤە ئەم ماینە بێ کار، زێدەباری کو بازاڕێ مە سوتی و زیانێن زور ب مە کەفتی.
زێدەتر گوت، پێشتر ئەم ل گوندی بوین، ژبەر شەرێ وان ئەم ل گوندی رەڤین و هاتینە دهوکێ، ل ڤێرە مە بخوە بازاڕەک دانا داکو بژین، بەلێ ئەو ژی ژلایێ وان هاتە سوتن، ئەم نوزانین چ بکەین و کیڤە ب رەڤین.
دهێتە زانین کو روژا 1-4-2024ێ نێزیکێ 260 دوکان ل بازاڕێ چەلێ ل سەنتەرێ باژێرێ دهۆکێ سوتن، پشتی هەیڤەکێ ژلایێ رێکخستنا پارتی ڤە هاریکاریێن مادی بۆ هاتنەکرن داکو دوبارە بازاڕێ خوە نوژەن بکەن و بچنە سەر کارێن خوە، نوکە هندەک ژ خودان بازاڕا دەست ب چێکرنا بازاڕێن خوە کرینە.