كاروانێ دابینكرنا پرۆژێن خزمتگوزارى ل هه‌رێما كوردستان و پارێزگه‌ها دهۆكێ دچارچوڤێ كابینا نه‌هێ یا حوكمه‌تا هه‌رێما كوردستانێ به‌رده‌وامى هه‌یه، دڤان چوار سالێن بورى دا 959 پروژێن جودا ل ده‌ڤه‌رێن جودایێن پارێزگه‌ها دهۆكێ هاتینه چێكرن.
بیلال باشورى، ژ پشكا راگه‌هاندنا پارێزگه‌ها دهۆكێ دیاركر كو چوار سال ل سه‌ر پارێزگاربونا د. عه‌لى ته‌ته‌ر ده‌ربازبون و گۆت، كاروانێ ئاڤه‌دانیێ لسەر راسپاردە و رێنمایێن بەردەوامێن مەسرور بارزانی سەرۆکێ حکومەتا هەرێما کوردستانێ و ب رێڤەبەری و چاڤدێریا راستەوخوه یا د.عەلی تەتەر، پارێزگارێ دهوكێ د چوار سالێن ده‌ربازبوی دا و ده‌ربازبون ژ بارودوخێن سه‌خت دا وه‌كو خزمه‌ت بۆ خه‌لكێ ده‌ڤه‌رێن جودایێن پارێزگه‌ها دهۆكێ به‌رده‌وامن.
زێده‌تر گۆت، د ده‌ما چوارسالێن كابینه‌یا نه‌هێ یا حكومه‌تا هه‌رێما كوردستانێ دا، 959 پروژه ل سه‌نته‌رێ پارێزگه‌ها دهوكێ و ده‌وروبه‌ران هاتینه راوانه‌كرن بۆ بجهئینانێ، وان ژی پتری 485 پروژه هاتینه ب جهـئینان و یێن كه‌فتینه دخزمه‌تا گشتی و وه‌لاتیان دا، كار ل سه‌ر قوناغێن دوماهیێ یێن پروژێن دی دهێته‌كرن، رازه‌مه‌ندی ژى ل سه‌ر 51 پرۆژێن نوو بو ده‌ستپێكا سالا 2024ـێ تانوكه هاتیه‌كرن.
د سالا 2020ێ دا و دبارودوخێ سه‌خت یێ په‌تایا كورونایێ دا، 148 پروژه ل پارێزگه‌ها دهۆكێ هاتنه راگه‌هاندن و كار ل سه‌رهاته‌كرن و كه‌فتنه دخزمه‌تا گشتی دا،
سالا 2021- 2022ێ به‌رێ بنیاتی بو 586 پروژه‌یان هاته دانان و چه‌ندین ژوان چه‌ند پروژێن ستراتیجی و گرنگ بون، هه‌روه‌سان سالا 2023ـێ 101 پروژه هاتنه ره‌وانه‌كرن و بجهـئینان زێده‌باری 118 پروژێن هه‌رچار سالا یێن لسه‌ر بودجێ پارێزگه‌ها دهوكێ و یێن ڤێ دوماهیێ هاتینه ره‌وانه‌كرن بو قوناغ و رێكارێن ده‌ستپێكرن و راگه‌هاندنێ، بیلالى هوسا گۆت.
باشورى د درێژاهیا ئاخفتنێن خودا گۆتژى، د چوار سالێن ده‌ربازبوی دا پێشوازی ل 200 كونسول و شاندێن بیانی هاتیه‌كرن، 299 دیدار و خه‌لات هاتینه پێشكێشكرن بۆ ته‌خ و چینێن جودایێن پارێزگه‌ها دهۆكێ و گۆت، پارێزگه‌ها دهۆكێ ل سه‌ر بریارا سه‌رۆك بارزانى هه‌موو زیاندارێن له‌هیان ل دهۆكێ قه‌ره‌بوكرن، دیسان هه‌ڤكاریێن دارایى پێشكێشى بازارێ سوتیێ چه‌لێ ژى كرن، كاروانێ چێكرنا پرۆژێن خزمه‌تگوزارى بۆ هه‌موو ده‌ڤه‌رێن پارێزگه‌ها دهۆكێ به‌رده‌وامى هه‌یه.
پارێزگه‌ها دهوكێ پێكدهێت ژ قه‌زایێن دهۆك، ئامێدیێ، شێخان، به‌رده‌ره‌ش، ئاكرێ، ل گه‌ل ئیدارا سه‌ربخوه‌ى یا زاخۆ، پترى ملیونه‌ك و 500 هزار كه‌س تێدا دژین.