ماڵی موزیكیی زەهاوی بڕیارە كۆنسێرتێك لە بەغدا ساز بكات، لە كۆنسێرتەكەدا هونەرمەندانی كوردستان، بەغدا، مووسڵ و بەسرە بەشدار دەبن.
هەژار زەهاوی رای گەیاند، دوێنێ دووشەم 15ی تەمووز، د. ئەحمەد فكاك بەدرانی وەزیری رۆشنبیری و گەشتیاریی عێراق لە بەغدا بینیوە، گفتوگۆیان لەبارەی ماڵی موزیكیی زەهاوی و چالاكییە هونەرییەكانەوە كردووە.
زەهاوی ئەوەشی گوتووە، بڕیارە لە ماوەی داهاتوودا ماڵی موزیكیی زەهاوی بە پاڵپشتیی وەزارەتی رۆشنبیری و گەشتیاری كۆنسێرتێك لە بەغدا ساز بكەن، لە كۆنسێرتەكەدا هونەرمەندانی هەرێمی كوردستان، بەغدا، مووسڵ و بەسرە بەشدار دەبن و موزیكی كوردی و ناوچە جیاوازەكانی عێراقی، ئاوێتەی یەكتر دەكرێت.
زەهاوی ماڵێكی موزیكی لە باشووری كوردستان لە مێرگەپان كردووەتەوە و چالاكیی هونەری لەشارەكان ئەنجام دەدات، بڕیارە كۆنسێرتێك لە سلێمانی ساز بكات و لەم كارەشدا موزیكی جاز و موزیكی كوردی ئاوێتە دەكەن.