كتێبی "بۆ مێژوو"ـی سەرۆك بارزانی، وەردەگێڕێتە سەر زمانی فڕەنسی، بڕیارە لە مانگی داهاتوو لەو وڵاتە بڵاو دەكرێتەوە و نوسخەی كتێبەكەش بۆ زۆرینەی سیاسییەكان بنێرێت.
سەرۆك بارزانی لە كتێبی بۆ مێژوودا ئامانجی هەموو شۆڕشەكانی كوردستان هەر لە شۆڕشی شێخ عەبدولسەلامی بارزانییەوە تا شۆڕشەكەی شێخ مەحموودی حەفید، دواتریش پێی وایە هەموویان لە پێناوی دامەزراندنی دەوڵەتی كوردستان بوون، لەمەش زیاتر بۆ یەكەمین جار ئەو بەڵگە مێژووییانەی خستۆتەڕوو لەبارەی هەوڵەكانی شێخ عەبدولسەلام بارزانی بە سەردانی بۆ رووسیای قەیسەری و پاشانیش كۆبوونەوەی لەگەڵ مەندووبی بەریتانی، بۆ ئەوەی سەردانی شا جۆرج بكات و پشتیوانی شۆڕشەكەی بكات، بۆ ئەوەی سەربەخۆیی كوردستان رابگەیەنێت.
بۆ مێژوو كتێبێكی بەڵگەیی، دۆكیومێنتاریی سیاسی و مێژووییە، باسی خەباتی كورد لە پێناو سەربەخۆیی كوردستان و ریفراندۆم لە ساڵی 2017 دەكات.
عەلی دۆڵەمەری نوێنەری حكوومەتی هەرێمی كوردستان لە فڕەنسا رای گەیاند، كتێبی "بۆ مێژوو"ـی سەرۆك بارزانی، بە زمانی فڕەنسی چاپ دەكرێت و لە مانگی ئەیلوولدا بڵاو دەكرێتەوە. هاوكات لەگەڵ چاپبوونی كتێبەكە بە دیاری دەدرێتە چەندان كەسایەتیی دیار و ئەندام پەرلەمان لە فڕەنسا.
كتێبی "بۆ مێژوو" پێشتر بە شێوەزاری كوردی سۆرانی و زمانی عەرەبی بڵاو كراوەتەوە، چاپی شێوەزاری كرمانجی بە رێنووسی لاتینیش كەوتووەتە بەردەستی خوێنەران.
كتێبی "بۆ مێژوو" لەلایەن د. بەختیار مامۆستای بەشی زمانی فڕەنسی لە زانكۆی سەڵاحەدین و مامۆستا عەبدولجەبار مەلاحەسەن وەرگێڕاوەتە سەر زمانی فڕەنسی.
لە دوای دەستپێكردنی شەڕی یەكەمی جیهان و داگیركردنی عێراق لەلایەن بەریتانیاوە، شیخ مەحموودی حەفید لە ناوچەی سلێمانی شانشینی كوردستانی راگەیاند، بەڵام ئەم شانشینە ماوەیەكی كورتی خایاند و لەلایەن حكوومەتی بەریتانیاوە رووخێنرا و شێخ مەحموودی حەفیدیش بە دیلی كەوتە دەستی داگیركاران، پاشان لە ژێر گوشاری جەماوەریدا ناچار بوون ئازاد بكرێت.
سەرۆك بارزانی لەبارەی ئەو شانشینەی شێخ مەحموود لە ناوچەی سلێمانی ئاماژەی بەوە كردووە، كە شێخ ئەحمەدی بارزانی پشتیوانیی ئەو شۆڕشەی كردووە، هێزێكیشی لە دوو قۆڵەوە بە سەركردایەتیی جەنابی مستەفا بارزانی بۆ پشتیوانیی شێخ مەحموود بردووە، بەڵام پێش گەیشتنی ئەو هێزە، حكوومەتی بەریتانیا هێرشی كردبووە سەر حكوومەتەكەی شێخ مەحموود، لەبارەی هۆكاری دژایەتیی حكوومەتی كوردستانیش لەلایەن بەریتانیاوە، هۆكارەكەی بۆ ئەوە گێڕاوەتەوە كە ئینگلیزەكان نەوتیان لە كەركووك دۆزیبووەوە، پێیان باش نەبووە كە كەركووك ببێتە بەشێك لە حكوومەتەكەی شێخ مەحموود.
هەر لەم چوارچێوە مێژووییەدا، سەرۆك بارزانی هەڵوەستەی لەسەر ئەو راپرسییە كردووە كە پێش بوونی عێراق بە ئەندام لە كۆمەڵەی گەلان ئەنجام درابوو، ئەوەی لەبارەی ئەو راپرسییە هەتا ئێستە گوتراوە، ئەوەیە كە لەو راپرسییەدا گەلی كوردستان بەشێوەیەكی ئارەزوومەندانە دەنگی بۆ ئەوە داوە، كوردستانی باشوور بلكێنرێت بە عێراقەوە، بەڵام لە كتێبەكەدا ئەو بەڵگەیە خراوەتەڕوو كە راپرسییەكە تەنیا بۆ ئەوە بووە، ئایا دەتانەوێت ئەم بەشەی كوردستان بەشێك بێت لە دەوڵەتی توركیا، یان دەوڵەتی عێراق؟ دیارە گەلی كوردستانی باشووریش كە ستەمێكی زۆریان بە دەستی خەلافەتی عوسمانییەوە بینیبوو، پێیان باشتر بوو كە ببنە بەشێك لە دەوڵەتی عێراق.
كتێبی "بۆ مێژوو" باس لە كۆنگرەی قاهیرە دەكات، چۆن شا فەیسەڵی یەكەمیان هێنا بۆ عێراق و بووە یەكەم شا لە شانشینی عێراقدا، بەڵام لەبەرئەوەی حكوومەتی پاشایەتی بڕوای بە شەراكەتی كورد و عەرەب نەبوو، دەیویست كورد هەر پاشكۆ بێت، ئەوا لە ماوەی ساڵانی پاشایەتی تا رووخاندنی بە شۆڕشی 14ی تەمووزی ساڵی 1958، عێراق سەقامگیریی بە خۆیەوە نەدی.