ناڕازییەكی ناو یەكێتی: بافڵ وەفای بۆ‌ نزیكەكانی نەبوو چۆن بۆ خەڵكی كوردستانی دەبێت

بافڵ تاڵەبانی، ئەو كەسەی كە هیچ شانازییەكی بۆ كورد و كوردستان نییە و بە گوتەی خۆشی دوای 16ی ئۆكتۆبەر كە واژووەكانی لەسەر نووسراوەكە بڵاو كردەوە، دەستی لە فرۆشتنی خاكی كەركووك هەبووە، كاری بۆ تێكدانی ئارامی و سەقامگیریی هەرێمی كوردستان كردووە و دەیەوێ هەرێم لە نائارامیدا بێت و خۆشی باكی بە هیچ شتێك نییە، ئەو كەسە لەگەڵ نەیار و دوژمنانی كورد و كوردستان دەست تێكەڵ دەكات بۆ ئەوەی هەرێمی كوردستان لاواز بكات.

بافڵ تاڵەبانی، ئەو كەسەی كە ماوەیەكە لە پێناو دوو دەنگ خۆی شین و مۆر دەكاتەوە و دەقیڕێنێت، خۆشی دەزانێت حزبەكەی متمانەی لای خەڵك نەماوە، بۆیە دەیەوێ بە هەندێك قسەی لابەلا و نەزانانە قەناعەت بە خەڵك بكات گوایە ئەوان خزمەت دەكەن، لە كاتێكدا لە سێ دەیەی رابردوو هیچ كەسێك دەستی ئەو حزبەی نەگرتووە و بگرە رێگریشیان لێ نەكراوە تا خزمەت بكەن، بەڵام نەیان كردووە، كەچی ئێستە هاتووە كە هیچ ماندووبوونی بە كوردستان نەچەشتووە دەیەوێت دۆخەكە تێك بدات.

بڵند فاتیح، چاودێری سیاسی لە سلێمانی بە "وشە"ی راگەیاند، هەر كەسێك یان لایەنێك لە شتێكدا ماندوو نەبووبێت قەدری نازانێت، نازانێت چ ماندووبوون و خوێن و شەهیدێك لە پێناو كوردستان دراوە، بافڵ كە هەمووی دوو ساڵە هاتووەتەوە كوردستان و رۆژێك بەو كوردستانەوە ماندوو نەبووە، كەواتە نازانن دڵسۆزی و خەمخۆری واتای چییە، بە راست و چەپدا بێباكن و هیچیان لا مەبەست نییە، ئەوەی دەیبینن تەنیا خۆیان و بەرژەوەندییەكانیانە، خەباتكردن بۆ هاووڵاتیی لای ئەوانە بوونی نییە، ئەوانە خەبات بۆ خۆیان دەكەن.

باسی لەوەش كرد، لایەنێك كار بۆ پاراستنی دەستكەوتەكان بكات و بەرگریی لە مافەكانی خەڵكی كوردستان بكات و رووبەڕووی پیلانی دوژمنان و نەیاران بێتەوە، بەرپرسیارێتیی هەڵبگرێت لە خۆشی و ناخۆشی و خزمەتی خەڵك بكات، لایەنێكیش تەواو پێچەوانە كار بكات و هیچ ئامانجێكی بۆ كوردستان نەبێت و لەگەڵ نەیارانیش پیلان دابنێت، ئەمە زۆر جیاوازن لە یەكتر، حزبێك خۆی بە خەمخۆر بزانێت دەبێت لە هەموو لایەكەوە تەنیا ئامانجی پاراستنی كوردستان بێت، ئەوانەی بە دەنگی بەرز دەقیڕێنن، هەموو كات ئامانجیان تێكدانی كوردستان بووە.

حەسەن مارف، مامۆستا و رۆشنبیر بۆ "وشە" ئاماژە دەكات، هەر مەترسییەك رووبەڕووی هەرێمی كوردستان ببێتەوە، مەترسییە بۆ سەر هەموو هاووڵاتییان بەبێ جیاوازی هیچ رەنگ و دەنگێك، مادام هەمووان لەو هەرێمە دەژین و كار دەكەن، كەواتە دەبێت هەمووان پێكەوە بیپارێزرێن، لەگەڵ یاسا بن و بەیەكەوە كار بۆ پاراستنی دەستكەوتەكان بكەن و هەرێم لە پیلانی دوژمنان بپارێزرێت.

روونی كردەوە، ئەگەر بەم جۆرە نەبن رووبەڕووی مەترسیی گەورە دەبنەوە، ئەگەر لە ناو بچن هەمووان پێكەوە لە ناو دەچین، پێش بكەون هەمووان پێكەوە پێش دەكەون، هیچ كەسێك لە هەر پلە و پۆست بۆی نییە بیریش لە تێكدانی ئەمنیەتی كوردستان بكاتەوە، بەڵام كەسێك كە هیچ شانازییەكی نییە ئەوە باكیشی بەوە نییە چی روودەدات.

لای خۆیەوە سامان جەعفەر، ناڕازییەكی ناو یەكێتی بۆ "وشە" ئاماژە دەكات، بافڵ وەفای بۆ‌ كەسە نزیكەكانی خۆی نەبوو كە چەندان ساڵ خزمەتیان كرد لە پێناو یەكێتی، ئێستە چۆن چاوەڕوانیت لێی هەیە وەفای بۆ خەڵكی كوردستان و خاكەكەی هەبێت، ئەو نازانێت سیاسەت چییە و هەر بەردەمی خۆی دەبینێت، كەسێك هیچ شانازییەكی نەبێت، هیچ خزمەتێكی نەبێت، كوا دەزانێت بەرژەوەندیی گشتی و خاك و نیشتمان چییە.

ئەو باسی لەوەش كرد،  ئەمانە بە چ هەقێك خۆیان كردووەتە دڵسۆز و خەمخۆری خەڵك، ئەوەی وەفا و هەق و راستی و خزمەت و ئارامی هەبێت لای ئەمانە بوونی نییە، ئەمانە هەر زمانی هەڕەشە و تیرۆر و زمان درێژی دەزانن، لە ناو یەكێتی بە شێوەیەكی هەڕەشەئامێزانە، دەستیشیان بەسەر یەكێتیدا گرتووە.

وشە/ تایبەت