ههواڵى تێکچوونی باری تەندروستی، هونەرمەندی دێرینی بواری شانۆ و نواندنى كورد محەمەد غەریب ناجی، لهلایهن كچهكهیهوه بڵاوبوویهوه كه ناوبراو ئێسته لەژێر چاودێریی پزیشکدایە.
سۆلاڤ شەیدا هونەرمەندی سینەماکار و کچی هونەرمەند محەمەد غەریب له پێگهى تایبهتى خۆى له تۆڕى كۆمهڵایهتى فهیسبووك نووسیویهتى: "ئێسته باری تەندروستی باوکم ناجێگیرە و لە ژێر چاودێریدایە".
محمەد غەریب ناجی ساڵی 1946 لە سلێمانی لە دایکبووە، هونەرمەندێکی دێرینی شاری سلێمانییە، نزیکەی 46 ساڵ لە بواری هونەریدا کاری کردووە، لەچەندان کاری شانۆیی و فیلمدا ڕۆڵی بینیووە، لهوانهیش : "شانۆگەری نامەیەک لەخنکاو ساڵی 1979 دەرهێنانی ناسڕ حەسەن - شانۆگەری ڕاپۆرت ساڵی 1981 دەرهێنانی ئەحمەد سالار - شانۆگەری شیرین و فەرهاد ساڵی 1982 دەرهێنانی جەلیل زەنگەنە - فلمی سینەمایی کەواته چاوەڕێبن ساڵی 2008 دەرهێنانی جوان بامەڕنی - کورته فلمی فرمێسکێک بۆ تارا، ساڵی 2012 دەرهێنانی دیاکۆ جەواهیری" لهگهڵ چهندانى تریش.