یەكخستنی كورد وەك مەحاڵی لێ هاتووە، ڕاستییەكەشی هیچ شتێك مەحاڵ نییە و دەكرێ نەك هەولێر و سلێمانی، بەڵكو سنە و ئامەد و عەفرین بەیەكەوە گرێ بدرێن . كورد وەك سەرۆك بارزانی لە دهۆك و لە دیبەیتی داستانی كوردستان فەرمووی، "ئێمەی كورد مێژوویەكی زۆر دەوڵەمەندمان هەیە، بەڵام جێی داخە بۆ خۆمان بەدروستی مێژوویی خۆمان نازانین".
هەولێر و سلێمانی ئەمڕۆ لێك نەترازاون، بەڵكو ئەوە 60 ساڵە ئەم لێكترازانە هەیە و ئیستەش بەردەوام ئەو دابڕانە قووڵتر و خراپتر دەكرێت، بەجۆرێك گەیشتووەتە ئەو ئاستەی مەحاڵ بێت یەك بگرنەوە، بێگومان پێش ئەوەی باسی خۆمان بكەین، دەبێ ئەوە بزانین دوژمنەكان هەمیشە بەدوای خاڵی لاوازی ئێمەی كورددا گەڕاون، مێژوو شاهیدە و هەمیشە ئەو مێژووە خۆی دووبارە دەكاتەوە .
پێش ٦٠ ساڵی شۆڕشی كورد، ئەو ناكۆكییانە هەبوون و تا چەند ساڵێك پێش ڕاپەڕین بەردەوامییان هەبوو، دوای ئەو ماوەیەی كورد بەئارامی ژیا و لە ساڵی ١٩٩٤ وە دووبارە شەڕی خوێناوی دەستی پێ كردەوە، پاش چەند ساڵ كۆچكردوو مام جەلال گەیشتە ئەو بڕوایەی ئەمەی هەیە هەڵەیە و دەبێ كۆتایی پێ بێت، بەڕێككەوتنی ستراتیجی كێشەكانی نێوان پارتی و یەكێتی بەرەو كۆتایی چوو، چەند ساڵێك كورد یەكگرتوو بوو، هەرچەندە شوێنەواری شەڕی ناخۆ هێشتا هەبوون، بەڵام دەكرا ئەو ئاستەنگانەش تێپەڕێنرێن .
ئەوەی جێی داخە بەشێك لە سەركردایەتیی یەكێتی بەئاشكرا دژی ئەو ڕێككەوتنە بوون و بەجۆرێك كاریان لەسەر كرد، تا رێككەوتنەكە هەڵوەشایەوە و بە ئاشكرا و بەبێ سڵەمینەوە لە خەڵك، ماڵی كوردیان دوو لەت كردەوە، ڕێیان نەدا هێزی پێشمەرگە لە چوارچێوەی وەزارەتی پێشمەرگەدا یەك بگرێتەوە . دواتر هەردوو ئامۆزا دۆخی كوردستانیان بردەوە بۆ ساڵی شەستەكان و دڵەڕاوكێ و ترسیان خستەوە دڵی هاووڵاتیی كورد و هێندەی تر كوردیان پارچە پارچەتر كرد .
چەند شەرمە شاندێك دێت، چۆن سەردانی هەولێر و داودەزگا فەرمییەكانی حكوومەت دەكات، ئاوهاش سەردانی سلێمانی و داودەزگا حزبییەكانی یەكێتیش بكات، لە بیرمە دوای ڕیفراندۆم كاتێك سەرۆكی هەرێم لە فڕەنسا بوو بەناوی هەرێمی كوردستانەوە، جێگرەكەشی وەك هەرێمی سلێمانی لەوێ بوو، بۆیە لەو سۆنگەیەوە هەست بەوە دەكەیت هێشتا بەدەست وەزیرێكی داراییەوە گیرمان خواردووە، هێشتا نیوەی كوردستان داگیر كراوە، هێشتا مافەكانی ئێمە وەك كورد بەپێی دەستووری عێراق جێبەجێ نەكراون و سەتان كێشەمان هەن، بەڵام دێین دڵی دوژمنەكانمان بەخۆمان خۆش دەكەین، دێین سلێمانی لە هەرێم جیا دەكەینەوە و مامەڵەی نیوە بە نیوە دەكەین، لە كاتێكدا یەكێتی پێگەی ساڵی نەوەتەكانی نەماوە، بەڵام دەیەوێ هەمان مامەڵەی لەگەڵ بكرێت، دەبێ ئەمە چ ناوێكی لێ بنرێت، بۆ ئێمەی كورد وەك خۆمان كە هەین مامەڵە نەكەین، بۆ كوردستان وەك یەك نەبینین، بۆ هەڵبژاردن و دەنگەكان هەقی خۆیان نەدەینێ، دەبێ كەی وانە لە مێژوو وەربگرین و وەك یەك هەرێم و یەك نەتەوە و هاوزمان مامەڵە بكەین و ئینتیمامان بۆی هەبێت؟ .
لەم كێشمەكێشە سیاسی و سەربازی و ئابوورییەدا، دەبینین هەولێر و دهۆك و زاخۆ و ئاكرێ و سۆران چ ئاوەدانی و پێشكەوتنیان بەخۆیانەوە دیوە، دەبینین سلێمانی و هەڵەبجە و گەرمیان و ڕاپەڕین و هەورامان لە چ دۆخێكی دژواردان، ناكرێ تاكی كورد ئەو جیاوازییە نەبینێ.
لەڕووی فكرییەوە بەجۆرێك كار لەسەر هزری تاكی كورد دەكرێت، بەبێ ئەوەی بیر بكاتەوە و بەبێ ئەوەی هیچ بەڵگەیەكی پێ بێت و لەگەڵ دیتنی ئەو جیاوازییە، بەڵام هێشتا جنێو بە پارتی دەدات و نایەوێ تێبگات و نایەوێ راستییەكان بزانێت، كاتێ باسی مێژووی پارتی و دەستكەوتەكانی و بەرنامە و ستراتیجی و پلانی حكوومەت و بەرنامەكانی بۆ ئایندە و ئەوەی تا ئێستە كراوە، بەهەندی وەرناگرێ و بڕیار دەدات تێنەگات و گوێ نەگرێ، كەواتە چۆن یەكگرتنەوەی هەولێر و سلێمانییان گەیاندووەتە خاڵی مەحاڵ، ئاوهاش تێگەیشتینان لابووەتە مەحاڵ، چونكە كاتێك ددانیان بەوەدا نا و تێگەیشتن، واتە ددانیان بە دۆڕان و هەڵەبوونی هەنگاوەكانی خۆیاندا نا كە ئەمەش هەرگیز ناكەن .بێگومان دوژمنەكانی كورد هەمیشە سوودیان لەم ناكۆكییانەی كورد وەرگرتووە تەنیا كورد خۆی سوودی لە مێژووی خۆی وەرنەگرتووە.
لە وتاری پێشترمدا باسم لەوە كرد دەبێ ئەم قۆناغە سەختە تێپەڕێنین و بەستەڵەكی ئەم مۆدێلە 60 ساڵییە بشكێنین، كوردستان بەفكر و بیر و كوردبوونیەوە یەك بخەینەوە و هەموو پێكەوە بەبیروڕا و ئایدیۆلۆجیای جیاواز و رەنگی جیاوازەوە، لە ژێر ئاڵای كوردستان كۆ ببینەوە و هەولێر و سلێمانی و هەڵەبجە و دهۆك، بۆ ئایندەیەكی گەش و پرشنگدار یەك بگرنەوە و بێ جیاوازی دەست لەناو دەست بۆ یەكگرتنەوەی كوردستان تێبكۆشین، ئەم هەڵبژاردنە بكەینە سەنگی مەحەك و یەكگرتنەوە و شكاندنی ئەو بەستەڵەكە سیاسییەی كە هەیە .