بە حەق گوتراوە: "كەركووك دڵی كوردستانە"، بەڵام ڕاستییەكەی ئەم ڕستەیە لە زاری كەسانێكەوە دەبیستین كە هیچ باوەڕێكیان بە كوردستانیش نییە تا دڵەكەی بەپیرۆز بزانن و ببنە مایەی وزە و لێدانی زیاتری. كەركووك لە هەموو جیۆگرافیای كوردستاندا سەرەڕای ئەوەی كە دۆخێكی تایبەتی هەبووە، هەمیشە هەموو هەوڵێك دراوە تا بەشێوازی جۆراوجۆری ڕەقئامێزانەی وەك گۆڕینی باری دیموگرافی و ڕاگواستن و خاپووركردن و ئەشكەنجەی خەڵك و سەپاندنی كەشێكی تەواو تەناهی و... لە كوردستان داببڕێنرێت، بەڵام لەگەڵ ئەمەشدا ئینتیمای خەڵكی كەركووك بۆ كوردستان و كوردستانیبوونی كەركووك، لە زۆر لەوانەی كە لە كوردستانێكی ئازاددا دەژین و لە خێروبێرەكەی بەهرەمەندن، لە تەڕی دەخۆن و لە وشكی دەنوون و... كوردستانیانەتر بیر دەكەنەوە و باوەڕی راستەقینەیان بەو ڕستەیەی سەرەوە هەیە. دەربڕینی ئەو ڕستەیە ڕاستییەكەی تەنیا شایستەی زار و زمانی كەركووكییەكانە و لە پاش ئەوان، ئێمەش كە باوەڕمان بە ڕێبازی كوردستانیانە هەیە، دەبێت دووپاتی بكەینەوە.
دۆخی گۆڕینی دیموگرافیی كەركووك و ستەم و جەوری سیاسی و سەربازی و ئیداری، مێژوویەكی دوور و درێژی هەیە و هەر لە سەردەمی نووری سەعیدەوە تا نازم تەبەقچەلی توركمان و بەعسییەكانی تری دامەزراو لەوێ درێژەی هەبووە، زۆر بەداخەوە ئێستەش لە ژێر چاودێریی یەكێتیی نیشتمانی، ئەم پرۆسەی ڕادەستكردن و لە كوردستانیخستنەی كەركووك بەردەوامە. پاش ڕووداوەكانی گوندەكانی ئەو دەڤەرە و وەستانەوەی بوێرانەی كاك محەمەد دژی لەشكری ستەمكاری عێراق بۆ بەرگری لە خاك و خەڵكی ئەوێ، دیسانەوە خوێنی كوردانە و بوێرانەی كوردانی ئەوێ كە بە دەست ستەم و زۆری عەرەبی هاوردە و نەهاوردەوە! گیریان خواردبوو و تەمی بێدەسەڵاتی و كزی بە ڕووخساریانەوە دەبینرا، هەڵقوڵانێكی نوێی لە دەمارەكانی كوردانی هەموو كوردستان تەنانەت لە ڕۆژهەڵات و باكوریش دروست كرد. بەڵام بەداخەوە ڕاستیان گوتووە كە كورد لە مەیدانی شەڕ سەر دەكەوێت و لەسەر مێزی دانوستانەكاندا دەیدۆڕێنێت.
كەركووك دەیان و سەتان جار ئەم سەركەوتنەی بۆ ئێمە تۆمار كردووە، بەڵام سیاسەتی لێڵ و ملكەچانە و سەركزانە وایكردووە، دۆخی ڕەش و خەمگینی كەركووك بەردەوام بێت و ئەو دنیا بێگەرد و جوان و بێ كێشەیەی كەركووك و دۆخەكەی و خەڵكەكەی، تەنیا لەسەر شاشە و پەیجەكانی هێزی بەڕێوەبەری ئەوێوە بنوێنرێتەوە. ئەم میدیایانە دۆخێك دەنوێنن و پێشانی ئێمەی دەدەن، وەك بڵێی كەركووك تەواو كوردستانیبوونی لەلایەن فەوج و سوپای شۆڤێنییەوە قبووڵ كراوە و ئەوان تەنیا خزمەتی كورد و كەركووك دەكەن. هەر چەند مانگێك پێشتر بوو كە لە هەڵبژاردنەكاندا زۆرینەی دەنگ بە كوردەكان بوو و كوردستانیبوونی لەلایەن خەڵكی بەئەمەگ و وەفادارییەوە دووبارە سەلمایەوە، لایەنی شۆڤێنیی عەرەبی و هاوڕێ نزیكەكانی یەكێتی و كاك بافڵ لە ناو فراكسیۆنی عەرەبیدا، لەوانەش جەنابی قەیس خەزعەلی فەرموویان: ئێمە ناتوانین وەڵامی ڕای گشتیی عەرەبی بدەینەوە ئەگەر پارێزگاری كەركووك عەرەب نەبێت. وەك ئاگادارین پەرچەكرداری لایەنی توركمانیش لەمە كەمتر نەبوو.
بەڵام با بپرسین چی ڕووی دا لە هۆتێل ڕەشید كە ئاوەها هەڵوێستێكی شۆڤێنیی توند و تۆڵ ملی بە بوونی پارێزگارێكی كورد لە كەركووك دا؟ ئێمە تا ئێستەش نازانین بە وردی چی ڕووی دا لە هوتێل ڕەشید و بۆچی لەگەڵ ئەوەی كە پارێزگار كوردە، دەبێت شاخەوان عەبدوڵا لەسەر ئەو كێشە و ئاڵۆزییانەی بۆ كورد دروست دەكرێن، بێتە دەنگ و بێتە سەر خەت؟ كەركووكی ڕادەستكراو و موزایەدە لەسەركراو، تا كەی دەبێت باجی ئەو سیاسەتە لێل و دروشمزەدە و دیماگۆلۆگە بدات كە ئەو حزبە لەو سنوورە پراكتیزەی دەكات؟ من پێم وایە دەنگدانی ئەوان بە یەكێتی لەوێ بەهۆی ئەوە بووە كە پۆرتی شۆڤێنیییەكان بشكێنن، بەڵام مەزەندەی ئەوەیان نەدەكرد كە خۆیان ببن بە هاوپەیمان و برابەشی شۆڤێنییەكان لە داگیركاری و لێدان و ملبادان!.
ماوەیەك پێش ئێستە جەنابی سەرۆك وەزیران لە بەسەركردنەوەیەكی كەركووك و بەربانگكردنەوە لەگەڵ كۆمەڵێك لە چین و توێژەكانی شاری كەركووك، دەستی لەسەر بابەتێكی جەوهەری دانا، ئەویش ناونانی هەڵە لەسەر ناوچە كوردستانییەكانی دەرەوە هەرێم بووە كە ناویان ناوە ناوچە كێشە لەسەرەكان، لە حاڵێكدا ئەمانە ناوچەی دابڕێنراون و هەر دەبێت بگەڕێنەوە ئامێزی كوردستانی پیرۆز. ئێستە سەردانەكەی كاك بافڵ بە دروشمی قەبە و بێ كاریگەر هاوشێوەی دروشم و بەڵێنەكانی كاتی هەڵبژاردنی مسۆگەركاری، هیچ خواستێكی خەڵكی ئەو شارە نابێت و كێشە و قەیرانەكانی كورد لە كەركووك نەك تەنیا چارەسەر ناكات، بەڵكو زیاتریشی دەكات و چارەنووسی كەركووك دەخاتە قوڕگی شێرەوە.
ئەگەرنا چۆن دەبێت كە تۆ زۆرینەی دەنگ و كورسیت لە كەركووك هەبێت، بەڵام كەمترین فەرمانبەری وەزیفی و دامەزراویت لە ئیدارەكاندا هەبێت؟ ئایا ئەمە هەر جێبەجێكردنی ئەو ڕێككەوتنە گوماناوییە و نەزانراوەی هۆتێل ڕەشید نییە كە لە هەمبەر پۆستێكی كارتۆنیی سیاسیدا، كۆی چارەنووسی كەركووك و كوردستانیبوونەكەی قوربانی دەكرێت؟ وا دیارە پێشتر دەستیان لە خانەقین شوشتووە، بەداخەوە ئەمە مەترسییەكی گەورەیە و دەبێت خەڵكی كوردستان و بەتایبەتی كەركووك لێی بێنە دەنگ. مەگەر ئەوان دەسەڵاتداری ئەو شارە نین؟ كەواتە بۆچی لەبری سزادانی ئەندامانی سوپا و لەشكری میلیشیایی عەرەب بۆ ئەوێ كوردە بەرگریكار و نەبەزەكان دەبن بە داوی بەناو سزای یاساوە؟.
من پێم وایە تا ئەو جۆرە سیاسەتە و ئەو حزبە لەوێ كارا بێت، كەركووك زیاتر و زیاتر ناسنامەی كوردستانیبوونی خۆی لە دەست دەدات و پێ بەپێی ئەمەش كورد چەند قات زیاتر دەكەوێتە بەر ستمەوە. بۆیە دەتوانین پێشنیار بكەین كە ئەگەر عێراق و یەكێتی لە دەسەڵاتدارێتیی پارتی دیموكراتی كوردستان لەوێ فۆبیایان هەیە، لانیكەم با حوكمڕانیی ئەوێ بدرێتە حزبی سۆسیالیست و كاكە حەمە، مادام لە پارتی تۆقیون! بەدڵنیاییەوە كاكە حەمە بوێری و ئینتیمای ئەوەی تێدایە كە كوردستانیبوونی كەركووك و مافی كوردانی ئەوێ بپارێزێت. نوختە سەری دێڕ.