بوونی ئۆپۆزیسیۆن لە نەزمی نوێدا، پێویستییەکی حاشاهەڵنەگر و نیشانەی هەناسەدانی سیستمی دیموکراسی و ئازادییە، هاوکات چاودێرە بەسەر دەسەڵاتەوە، دەسەڵات هەر فۆرم و ناوەرۆکێکی هەبێت، دەبێت ڕەخنەی لێ بگیرێت و بەرچاوڕوونی پێ بدرێ، ئەمەیش نەک تەنیا تایبەتمەندییەکی سیاسیی نەزمی دیموکراسی و سیستمێکی کراوە و سەردەمییە، بەڵکوو پێویستییەكی عەقڵی مێژووییشە، چونکە بوونی ئۆپۆزسیۆن /هێزی ناڕازی و ڕەخنەگر و ململانێکار/ لە هەمبەر پۆزسیۆن /دەسەڵات، حوکمڕانی/ دیالیکتیک و ڕاگۆڕینەوەی ئەگەرچی توند و ڕادیکاڵیش بێت، دێنێتە ئاراوە. هەم بیری دەسەڵات دەخاتەوە کە ئەو هێزەی هەیەتی لە دەنگی خەڵکەوەیە و خۆی لێ نەگۆڕێت، هەمیش پشوودرێژی و سینگفراوانیی لەناو هەرەمی دەسەڵاتدا پەرە پێ دەدات، تا پێوەندیی خەڵک و دەسەڵات دوور بێت لە هەر جۆرە زەبروزەنگێكەوە.
بەڵام ئەمە لایەنە تیۆری و ئایدیالەکەی ئەرک و چالاکیی ئۆپۆزیسیۆنە، ئەزموونی یاریی ئۆپۆزسیۆن لەگەڵ دەسەڵات و لەناو پانتاپی گشتیدا، لە وڵاتانی پێشکەوتوو یاسای تایبەت بەخۆی هەیە، وا نییە هەر کەسێک دژی دەسەڵات قسە بکات بە ئۆپۆزسیۆن لە قەڵەم بدرێت و چەپڵەی بۆ بكوتن، ئەگەرچی بە گشتی کەشێکی سەرانسەری ڕێژەیی دروست بووە لە زۆربەی وڵاتانی جیهاندا، هاتوهاوار و تانەدان لە دەسەڵات و دروشم دژی جۆری حوکمڕانی، بووە بە جۆشێكی ڕواڵەتیانەی بەرگری و ئەخلاقێکی شۆڕشگێڕانە، بەڵام هەمدیس ئەم جۆرە جووڵە ڕەمزییانە بەرلەوەی بەشێوەی چڕوپڕ بەرنامەکانی دەسەڵات و لاوازییەکانی ڕەخنە بکەن، زیاتر وزە و تووڕەییەکی نەناسراوی جەماوەر پێشان دەدەن و بەو جۆرە چالاکیانە ئەو وزە و تووڕەییانە کاڵ دەبنەوە و دۆخەکە ڕێڕەویی ئاسایی خۆی وەردەگرێتەوە.
ئەمە لە وڵاتانی ڕۆژئاوا کولتوورێکی گشتیی جێگیر و کارلەسەرکراو پشتگیریی دەکات، بۆیە هەم چالاکیی ئۆپۆزسیۆن لە پانتایی گشتیدا، هەم یاریی حزبە ئۆپۆزسیۆنەکان، بە دەگمەن لە دیاردەی نەشیاو و ناتەندروستەوە دەئاڵێن. خاڵی جێ سەرنج ئەوەیە، لە یاسای هەموو ئەو وڵاتانەدا ئاسایشی وڵات و خەڵکەکە لە سەرووی هەر جۆرە پۆزسیۆن و ئۆپۆزسیۆنێکەوە دیاری کراون. ئەم وێنە گشتییەم بە دەستەوە دا، تا تۆزێک حیکایەتی ئۆپۆزسیۆنی کوردی باس بکەم.
ئەو لایەنانەی بە ناوی ئۆپۆزسیۆنی کوردییەوە لە کوردستان ئیش دەکەن و تەلەڤزیۆن و سەرمایەگوزاریی تایبەت بە خۆیان هەیە و لە وڵاتانی دەرودراوسێیشەوە بە نهێنی و ئاشکرا هاوكاریی دەکرێن، تا چالاکانە بە ئۆپۆزسیۆنی بمێننەوە، دوو ئاڕاستەی لاسەنگ و نالەبار پێک دێنن:
یەکەمیان ئاڕاستەیەکە هەر لە بنەمادا لەگەڵ بوونی کیانی کوردی و شوناسی کوردیدا کێشەی جەوهەریی هەیە. ئەمانە لایەنەکانی ئیسلامی سیاسی، لە سەرووی هەموویانەوە کۆمەڵ و یەکگرتوون. ئەگەر لە هەر ڕووداوێکدا چاوێک بە میدیا و چالاکییەکانیاندا بخشێنین، یەک ڕستەی ئومێدبەخش لە پێناو مافی کورد و کیان و شوناسی نەتەوەكەدا نابینیتەوە، مەگەر ئەوەی پێوەست بکرێت بە کۆمەڵێک مەرجی لێڵەوە کە لە پلانی ئیسلامی سیاسی و ئیخوانیزمەوە پێچرابێ و کورد وەک ئۆبژە و ملکەچ لە پاکێجێکدا پێشکەش بکات.
ئاڕاستەی دووەم، ئەو لایەن یا حزبانەن /بە ڕای من زیاتر دەبێت بڵێین چەند کەسێکن/ لەسەر بنەمای ڕق و قینی شەخسی یا لە حزبێك یان وەزیرێک یاخۆ لە کەسایەتییەکی ناو پۆزسیۆندا خۆیان بنیات ناوە، نموونەکانی وەک نەوەی نوێ و بەرەی گەل و هەڵوێست، دیارترینیان.
ئەمانەی دووەم ئەگەر لەوانەی یەکەم زیانیان زۆرتر نەبێت، ئەوا کەمتر نییە. ئەمانە تەنیاو تەنیا دژایەتیی حکوومەتی کوردی و قەوارەی کوردستان دەکەن، تەگەرەدروستکردن بۆ هەر جۆرە هەنگاوێکی باشی حکوومەت، بە ئۆپۆزسیۆنبوون تێگەیشتوون،
هەر لەم چەند ڕۆژەدا و دوای سەركەوتنی کارەی 24 ساعەتی، بە پلانێکی دیاریکراو و تێکدەرانەوە درۆیان بڵاو کردەوە و تێچووی کارەبایان بە جۆرێک خەمڵاند و بڵاویان کردەوە کە خەڵک بەرەو ئەو قەناعەتە ببەن کە دەسکەوتەکە بە خەم و پووچەڵ ببینن! ئاخر لە کوێی دنیا هەیە تۆ هێز و لایەن و مێدیایەکی زل و زەبەلاحت هەبێت و بە ئارەزووی خۆت دژی کورد و کوردستان قسە بکەیت و درۆ دەرخواردی خەڵک بدەیت و خۆت بە حەق بزانی و دەنگی ناڕەزایەتیت وەها دلێر بێت، وەک بڵێی لەمانە دەستپاکتر و ڕاستبێژتر لە گۆی زەویدا دەست ناکەوێت! گوزارەیەکی سەرەکیی لە دەربڕێنی میدیایی و گوتاری ئەمانەدا ئەوەیە کە "ئێمە عێراقین و لەناو جیۆگرافیای عێراقدا دەبێت یاری بکەین و..."
ئێ باشە مادام ئێوە هێندە بوێر و ڕاستبێژن، بۆچی لەم 15 ساڵەی رابردوودا جگە لە چەپڵەلێدان بۆ عێراق و میلیشیا و پرۆکسییەکانی ئەو وڵاتانەی کە هاوكارتانن و بنەما ئابووریی و ئەمنییەکانی کوردستان دەکەنە ئامانج، نقەتان لێوە نەهاتووە؟ مەگەر ئێوە عێراقی نین و عێراق نابێت بە پۆزیسیۆن و پێکهاتەی دەسەڵاتتان؟ ئەدی بۆچی ڕۆڵی ئۆپۆزسیۆن تەنیا بۆ حکوومەتی هەرێم و کیانی کوردی دەگێڕن؟ کوا ئەمە مەعقوولە کە حکوومەتەکەت بە دەیان دۆسیە و زۆرانبازیی لەگەڵ بەغدا بیەوێت مافە یاساییەکانی خەڵکی کوردستان وەربگرێت و لایەنی بەناو ئۆپۆزیسیۆن بڕوات بەغدا هان بدات کە نابێت وا بکەن و دەبێت ئەمە بکەن!
درۆ و چەواشەکاریی و ڕقی شەخسی و بەرژەوەندیی نهێنی و درێژماوە، مەکینەی سەرەکیی ئۆپۆزیسیۆنی کوردستان دەسووڕێنێت، باشترین کار ئەوەیە پەڕلەمانی کوردستان بۆ جۆگەماڵکردنی چالاکیی ئۆپۆزسیۆن بەشێوەیەکی خاوێن و جوان، لەسەر یاسایەک ئیش بکات کە درۆ و چەواشەکاریی سزا بدات، گێرەشێوێنی و تێکدانی ئاسایش و تەناهیی كۆمەڵایەتیی کوردستان ڕووبەڕووی دادگا بکاتەوە، ئەینا بەم شێوەیە ئەم بەناو ئۆپۆزسیۆنانە بەردەوام بن، بە دڵنیاییەوە ئێمە هیچ داگیرکەر و هێرشبەرێکی دەرەکیمان ناوێت و خۆمان بە بێزەحمەت و بە ئاسانی دەتوانین سەری خۆمان و خەڵک و وڵاتەکەمان لە گۆڕ نێین.