ئەنجامی هەڵبژاردنی ئەنجوومەنی نوێنەرانی عێراق، ڕەنگە لە ڕووی سنووردانانە یاساییەکان و ئەو گریمانە گونجاوانەی هەن، لە ئاستی عێراقدا گۆڕانکارییەکی ئەوتۆ لە دەرەوەی سازان و هاوپەیمانیی دروست نەکات، بەڵام لە ئاستی هەرێمی کوردستاندا قورسایی هێزی بە تەواوی یەکلا کردەوە و هەموو ئەو بانگەشە و پڕوپاگەندە ساختەیەی بەناو ئۆپۆزسیۆن و دەوڵەتۆکەی پووچەڵ کردەوە کە لە هاوپەیمانییەکی نەنووسراودا، دژی حکوومەتی هەرێم و پارتی دیموکراتی کوردستان بوون. سەرۆک بارزانی باشترین و پڕ بە پێستترین ناوی لە کۆڕبەندی مێپس خستە ڕوو بۆ ئەوانە كە گوتی، "دەوڵەتۆکە لەناو دەوڵەتدا".
ئەم دەوڵەتۆکە لە راستیدا نە ئۆپۆزسیۆنە و نە دەوڵەتیش، بۆیە ڕۆڵێکی تەواو خراپی گێڕاوە لە پێشخستنی هەرێمی کوردستان و پارێزگاکانیدا و بە ئاسانی دەتوانین بڵێین، ئەگەر نادادی و نایەکسانی لە ناوچەی ژێردەستی دەوڵەتۆکە هەیە، هۆکارەکە تەنیا و تەنیا ئەو دەوڵەتۆکە یان هەمان یەکێتی نیشتمانیی کوردستانە، یاخۆ دروستتر و تەواوترە بیڵێین، کاک باڤڵ تاڵەبانییە! بێگومان بەرژەوەندیی ئەو لەوەدا نییە دەوڵەتێکی بەهێزی کوردستانی بە تێڕوانینی پێشکەوتنی هەمەلایەنە و خواستی کوردستانیبوونەوە هەبێت.
سەرباری ئەوەی پارتی لە هەر حاڵەتێكدا هێزێکی سەرەکی و یەکلاکەرەوەیە لە هاوکێشە سیاسییەکان و دیاریکردنی سێ کۆڵەکەی حوکمڕانی لە هەموو عێراق، وەک وتم هاوکێشەكە لە کوردستان بە تەواوی گۆڕاوە، بۆیە ئاساییە پارتی بە خواستێکی ئازادانەترەوە مامەڵە بکات و دنیابینییەكانی خۆی بەرجەستەتر پەیگیری بکات.
پارتی ئەو حیکمەتە سیاسییەی تێدایە کە هەمیشە سەنگ و قورسایی خۆی دەزانێت و بەپێی ئەوە لە هاوکێشەکاندا دێتە ناوەوە. بە پێچەوانەی یەکێتی كە لەگەڵ هەبوونی ماڵێکی پڕووکاو و لێکترازاودا، دەیەوێت ململانێی هێزێک بکات کە ئێستە نوێنەرایەتیی پرسی کورد دەکات و هێزێکی کاریگەریشە لە هاوكێشە ئەمنی و سیاسی و ئابوورییەكانی ناوچەکەدا. ئەم ڕۆژانە هەندێ لە بەرپرسان یان وتەبێژانی نافەرمیی یەکێتیی باسیان لەوە کرد کە پارتی هەڕەشە دەکات، نەخێر ئەمە قسەیەكی ئاژاوەگێڕانە و هاوکات ترسنۆکانەیشە، چونكە ئەوە پارتی نییە هەڕەشە دەکات، بەڵکوو ئەوە دەنگ و قورسایی هەڵبژاردنە بووەتە هەڕەشە بۆ هەر هێزێک کە دەیەوێت بە زۆرەملێ و کەلەڕەقی شوێنی ناڕەوا بۆ خۆی بە ڕەوا بزانێ.
ئەنجامەکانی ئەم هەڵبژاردنە نەک هەر لەم ئاستە، بەڵکوو لە چەندان ئاستی دیکەدا شکستی گەورەی بە یەکێتیی هێنا، لە ئاستی دیسکۆرسیڤدا گوتارێک کە بانگەشەی مەرکەزیەت و نەهێشتنی کیانی کوردیی دەکرد و عێراقی بە قووڵایی ستراتیجی خۆی دانابوو، هیچ سەرکەوتنێکی بەدەست نەهێنا و لە هەمبەردا حزبە ڕەسەنەكەی كوردایەتیی چەند پلەیەکی دیکە هەڵکشا. ئەمە شکستی گوتارێکی دەسکرد و خۆڕادەستکەرانەیە کە ئێمە بەناوی عێراقچێتییەوە باسمان کردووە، ئێستە ئەو زۆنەی ئەو دەوڵەتۆکە دەسەڵاتی بە سەریدا هەیە تەنیا بەهۆی هێزی سەربازی و هەندێ نمایشی کولتووری و هونەریی وەک فێستیڤاڵی گەلاوێژ و... خۆی گرتووەتەوە، بەڵام دەبێت ئەم پرسیارە لە خۆی بکات، تاکەی دەتوانێت بەم شێوەیە بەردەوام بێت؟ تا کەی دەتوانێت بەبێ گوتار و پلانێکی سیاسی و ئایدۆلۆجی دیاریکراو و عەقڵانی و گونجاو لەگەڵ کوردستاندا خێمەکەی لە بای کارەسات و گۆڕانکاریی بپارێزێت؟
بێگومان ئەم خێمە بێ کۆڵەکە و چوارچێوەیە بەم شێوەیە بەردەوام نابێت و کاتێکیش لە جێی خۆی هەڵکەنرا، مەترسییە گەورەکە بەر لەوەی ڕووبەڕووی خۆیان و نانخۆرەکانی بێت، ڕووبەڕووی هەرێمی کوردستان و خەڵکی سلێمانی و... دەبێتەوە. پەنابردنی دووبارە و چەندبارەی یەکێتی بۆ گوتاری عێراقچێتی و چەپڵەلێدان بۆ ڕەیان کلدانییەکی دۆڕاو و فاشیل، هیچ درزێکی ئەم ماڵۆچکە باگرتوو و بوومەلەرزەلێدراوە ناگرێت. ڕەنگە خەڵک جارێ ناڕەزایەتیی ئەوتۆی دژی گرتن و بۆردمانی سەركردەكانی ئۆپۆزسیۆندا دەرنەبڕێت، بەڵام وردەوردە ئەم دڵۆپەیە هێندە فرە دەبێت کە خێمەکە دەخاتە سەر ئاو.
ئەمە حیکایەتی ئەم حزب و ئەو حزب نییە، یەکێتیی لەو دەوڵەتۆکەیەدا شکستی هێناوە، بەڕای من تەنیا شتێک وایکردووە پارتی چاوپۆشی لەو دەوڵەتۆکە نایاساییە بکات، دیسیپلین و بەها سیاسی و نیشتمانییەکانی خۆیەتی، ئاخر پارتی ململانێ و ڕکابەرایەتیی تا باڵاترین ئاستی خۆی دەکات، بەڵام کاتێک گەیشتووەتە شوێنێک کە بۆنی شەڕی دژ بە خەڵکەکەی لێ هاتبێت، وازی هێناوە! ئەمە گرینگیی و بەرزیی جەوهەری پارتی دەگەیەنێت، چوار نووسەر و مووچەخۆری بندیوار کە لە چوار بنکەی کولتووری و دەزگای ڕاگەیاندندا بانگەشە بۆ سەرۆکی دەوڵەتۆکەیەك دەکەن كە تا ئێستەیش یەک وشەی لە بارەی زمان و فەرهەنگەوە نەوتووە! تەنانەت زمانە کوردییەکەی تەواو نییە و هەندێ جار بە ئینگلیزی لەگەڵمان دەئاخفێت!
دیارە مەبەستی من لەم دێڕانەی کۆتایی دەربڕینی ئاخ و ئۆفێکە بۆ شارێک کە بە ناوی ڕٶشنبیری دەمانناسی، ئێستە لە زۆر شوێن و شارۆچکەیدا ئێمە هەم لە ڕووی ئایدۆلۆجییەوە و هەم لە ڕووی شار و توانا و خزمەتگوزارییەوە، جگە لەوەی لەگەڵ بەجێماوان بەراوردی بکەین، زەینمان بۆ هیچی دیکە ناچێت! سڕینەوەی ناوی مەلا بەختیار و ڕەوانشاد سامی هادی لە فێستیڤاڵێکی وەک گەلاویژ کە دایانمەزراند و گەیاندیانە چلەپۆپە، دەرخەری ئەو سیاسەتە توندئاژۆ و سڕینەوەی سەرۆکی یەکێتییە کە لە پانتایی کولتووری و ڕۆشنبیریشدا ڕەنگی داوەتەوە.
ڕستەیەکی بەناوبانگ هەیە دەڵێت، هەمیشە دوعا بکەن ڕکابەرەکەتان هاوئاستی خۆتان بێت یان تەنانەت سەرووتر لە خۆتان بێت، چونکە لە هەر دوو حاڵەتدا هەر بە قازانجتانە، بەڵام ئەگەر ڕکابەرەکەت ئاستی نزم بێ، دەستوپێت گیرە، دەبێت هەم موراعاتی بکەی، هەمیش ئاگات لە خۆت بێت، چونکە تۆ بەپێی یاسای یارییەکە دەجووڵێیتەوە و ئەو بەپێی یاسای مێشکی تێكچووی خۆی!
هیوادارم سلێمانی لەو دۆخە دەرباز بێت کە هەمووان نیگەران و بە پەرۆشن بۆی، ئێمە ساڵان دەمانگوت هەولێر شاری سوننەتی و نامۆدێڕنە، کەچی ئێستە هەر بەراورد ناکرێت بە سلێمانی، شاری جاران ڕۆشنبیر و باڵابەرز و ئێستە گیرخواردوو و هەناسەسوار بە دەست یارییەکی گچکەی سیاسییەوە.