مێژوو هەمیشە لە ڕێگەی قەیرانە گەورەكانەوە پێناسەی خۆی دەكاتەوە، ئەوەی ئەمڕۆ دنیایەكی نوێیە بۆ مەرگی دنیا كۆنەكە و (لەدایكبوونی سەردەمێكی تەمومژاوی تەكنەلۆجی)، كە تێیدا مرۆڤایەتی لە چاوەڕوانیی كۆتایی دنیادا كاتی خۆی دەكوژێت، وەلێ نازانێت كە ئەم توندوتیژییانە تەنیا وێستگەیەك و بڕبڕەی پشتی گواستنەوەیەكی مێژوویین بۆ دووبارە ڕێكخستنەوەی هەژموونی نێودەوڵەتی.
كاتێك سەیری ڕابردووی نزیك دەكەین، دەبینین باسی (كۆتایی دنیا) هەمیشە وەك ئامرازێك بۆ تۆقاندنی مرۆڤایەتی بەكار هاتووە، چ لە ڕێگەی پەتا جیهانییەكانەوە بێت یان هەڕەشەی جەنگی ئەتۆمی، بەڵام ڕاستییە نەبینراوەكەی پشتپەردەكە ئەوەیە كە ئەم قەیرانانە تەنیا خاڵی گۆڕانی شارستانییەتن؛ ڕێك وەك چۆن مرۆڤایەتی لە دوای ترسی كۆرۆناوە بە هێزێكی زیاتر و پشتبەستنێكی قووڵتر بە تەكنەلۆجیا هاتە دەرەوە، ئێستەش لە ناو گەردەلوولی جەنگی ئێراندا، هەمان ئەو ئەفسانانەی (كۆتایی دنیا) و (جەنگی سێیەمی جیهانی) دەبنەوە بە تەمومژێكی كاتی بۆ داپۆشینی سەرهەڵدانی دنیایەك كە تێیدا ژیریی دەستكرد و سەروەریی دیجیتاڵی، شوێنی هەموو پیرۆزییە جیۆگرافی و سەربازییە كۆنەكان دەگرێتەوە، چونكە هێزە گەورەكان و كۆمپانیا گەورەكانی دنیا هەرگیز نایانەوێ كڕیارەكانیان لە دەست بدەن و تەواوی دنیا وێران بكەن، بەڵكو دەخوازن سیستمێكی نوێ بچەسپێنن كە بەرژەوەندییەكانیان بۆ نیو سەدەی تر مسۆگەر بكات.
ئێران كە ساڵانێكی زۆرە لەسەر سەكۆی مووشەكەوە بە خەونی ئەتۆمەوە هەڕەشەی گۆڕینی هاوسەنگییەكانی دەكرد، لەم وەرچەرخانەدا پێگەكەی هێندە بچووك بووەوە كە تەنیا وەك چەتەیەكی دەریایی لە گەرووەكانی هورمز و بابولمەندەبدا دەردەكەوێت، ئەمەش نیشانەیەكە بۆ مەرگی ئەو وەهمەی كە پێی دەگوترا (جەمسەری بەرگری)، چونكە ئەوەی ڕووی دا هەر گورزێكی سەربازی نەبوو، هێندەی ئەوەی پرۆسەیەكی (دووبارە ڕێكخستنەوەی) هێز بوو كە تێیدا تاران لە دەوڵەتێكی خاوەن هەژموونەوە، گۆڕا بۆ هێزێكی پەراوێزخراو كە ڕۆڵەكەی هێندە بچووك كراوەتەوە، تەنیا دەتوانێ ئاسایشی ڕێڕەوە ئاوییەكان تێكبدات.
ئەگەر بە وردی لەم ململانێیە بڕوانین، دەبینین واشنتن بە ژیرییەكی ستراتیجییەوە زنجیرەیەك لە جەنگ و ئاگربەست و گفتوگۆی وەك تەڵە بەكار هێنا، تا كۆگەی نهێنیی چەكەكانی چین و ڕووسیا بەتاڵ بكاتەوە، چونكە هەر كاتێك ئاگربەستێك دەرفەتی بە تاران دەدا تا چەكی نوێ لە ڕۆژهەڵاتەوە هاوردە بكات، جەنگی دواتر دەبووە گۆڕستانێك بۆ ئەو تەكنەلۆجیایانە و شكستیان لە بەردەم دنیادا دەبووە یەقین، ئەمە جۆرێكە لە ڕێگریی دەروونی كە تێیدا نەیار تووشی بێهیوایی دەبێت پێش ئەوەی یەكەم فیشەكی جەنگە گەورەكە بتەقێنێت، ڕێك وەك چۆن جەنگی عێراق لە ساڵی ١٩٩١دا بووە وەفاتنامەی مەرگی یەكێتیی سۆڤییەت لە ڕووی سەربازییەوە پێش ئەوەی لە ڕووی سیاسییەوە هەڵوەشێتەوە، جەنگی ئێرانیش لەمساڵدا (٢٠٢٦) بووە مەرگی فەرمیی خەونی باڵادەستیی ڕووسیا و چین و كۆتاهێنان بەو وەهمەی كە دەیگوت؛ دنیا بەرەو فرەجەمسەری دەچێت.
شۆكی تەكنەلۆجی و تێكشكاندنی قەڵا كۆنكرێتییەكانی ژێر زەوی لە ئێران، پەیامێكی هێندە مەترسیداری گەیاندە پەكینی پایتەخت كە وای لێ كردن تەنانەت خەونی داگیركردنی تایوانیش فەرامۆش بكەن، چونكە كاتێك سەركردایەتیی چین بینییان چۆن فڕۆكە پێشكەوتووەكانی ئەمەریكا بە بێدەنگی و بەبێ ئەوەی ڕادارە ڕۆژهەڵاتییەكان هەستیان پێ بكەن، هەناوی قووڵترین بنكە ئەتۆمییەكانی تارانیان هەڵدڕی، تێگەیشتن كە جیاوازیی نێوان تەكنەلۆجیای ئەوان و ئەمەریكا چەند ساڵێك نییە، بەڵكو جیاوازیی نێوان دوو سەردەمی جیاوازە. ئەم جەنگە بۆ ئەمەریكا هەر ململانێیەكی سەربازی نەبوو، هێندەی ئەوەی تاقیگەیەكی زیندوو بوو بۆ تاقیكردنەوەی دواین داهێنانەكانی وەك ژیریی دەستكرد لە بەڕێوەبردنی پۆلە درۆنەكان و بەكارهێنانی بۆمبە زیرەكە هەژێنەرەكان و جەنگی سێبەر بۆ پەكخستنی تەواوی ژێرخانی وڵاتێك بەبێ تەقاندنی یەك فیشەك، بەمەش سەلماندی كە سەروەریی دیجیتاڵی جێگەی سەروەریی جیۆگرافی گرتووەتەوە، هێزی ئەتۆمی چیتر كارتی براوە نییە كاتێك ژیریی دەستكرد دەتوانێ سەكۆی هاویشتنی موشەكەكان پێش چركەساتی تەقاندن پەك بخات و ئیفلیجیان بكات.
لەم وەرچەرخانەدا ڕووسیا بەرەو گۆشەگیرییەكی كوشندە هەنگاو دەنێت و چینیش ناچار دەبێت لە خەونی حوكمڕانیی دنیا بكشێتەوە و زیاتر ڕوو لە ناوخۆی خۆی بكات، تا ئەو درزە تەكنەلۆجییانە پڕ بكاتەوە كە جەنگی ئێران ئاشكرای كردن، ئەمەش وادەكات كە دنیا بۆ چەندان دەیەی تر لە ژێر سێبەری تاكجەمسەرییەكی نوێبووەوەدا بژی كە تێیدا ئابووری و تەكنەلۆجیای باڵا (سوپەر تەكنەلۆژی) بڕیاردەری یەكەم و كۆتایین.
لێرەوە، بۆ گەلی كوردیش گرنگە لە هەموو كات زیاتر پێویستە لەم ڕاستییە تێبگەن و پراگماتییەت بكەنە میتۆدی خۆیان. ئێمە ئەمڕۆ لە بەردەم تاقیكردنەوەیەكی مێژوویی و هەستیارداین؛ تاقیكردنەوەی مانەوە یان توانەوە لە ناو ئەم تەمومژە تەكنەلۆجی و سیاسییە نوێیەدا. بۆیە پێویستە بەوپەڕی هۆشیارییەوە لە دەوری پڕۆژە نیشتمانییەكەی سەرۆك بارزانی كۆ ببینەوە كە تەنیا ڕێگەی دەربازبوونە بەرەو كەناری ئارامی.
ئەم پڕۆژەیە ستراتیجَكی نەتەوەییە بۆ پاراستنی نیشتمان و دەستكەوتە مێژووییەكانمان، تا بتوانین لە ناو ئەم گۆڕانكارییە گەورانەی دنیادا پێگەی خۆمان وەك بكەرێكی سیاسیی كاریگەر بپارێزین و چیتر نەبینە سووتەمەنیی جەنگەكانی دەوروبەرمان. تەنیا یەكڕیزی لە ژێر چەتری ئەم ڕێبازە نەتەوەییەدا دەتوانێ گەرەنتیی ئایندەیەكی پڕ لە شكۆ و كەرامەت بێت، چونكە لە دنیایەكدا كە تێیدا تەنیا "بەهێزەكان" و "هۆشیارەكان" شوێنیان دەبێتەوە، پەرتەوازەیی وەك خۆكوژی وایە. تەنیا هۆشیاریی سیاسی، دڵسۆزی بۆ نیشتمان و پێڕەوكردنی عەقڵانییەت، دەتوانێ نەتەوەكەمان لە ناو ئاگرە گەورەكانی مێژوودا بە سەلامەتی ڕزگار بكات و بەرەو سەربەخۆیی و سەرفرازیی هەمیشەیی ڕێنوێنیمان بكات.