وێرای ئەوەی دەبێ ڕێز لە بژاردەی هێزە شیعەكان كە لە بەرەیەكدا بە ناوی چوارچێوەی هاوئاهەنگی خۆیان ڕێكخستووە بگرین، بەوەی كاندیدی سەرۆك وزیرانی داهاتوو كە مافی خۆیانە، دیاری كرد، بەڵام لەگەڵ ئەوەیشدا، دەبێ ئەوە بزانین كە ئەمە دەستاودەستكردنی دەسەڵات نییە، وەك ئەوەی سروە عەبدولواحید پەرلەمانتاری نەوەی نوێی فرۆشراو و عێراقچی، كردوویەتی بە بابەتی بانگەشە و كەرستەیەك بۆ هێرشكردنە سەر دەسەڵاتی هەرێم، بەڵكو ئەمە نیشانەی نەبوونی بنەمایەكی كارگێڕیی و ستراكتۆر و سیستمێكی بەڕێوەبردنە لەم وڵاتەدا.
كاندیكردنی گەنجێك كە تەمەنی چل ساڵە و هیچ شارەزاییەكی سیاسی و كارگێڕی و دیبلۆماسی نییە و ئەزموونی كرداریی لەو ڕووەوە نییە، بۆ پۆستی سەرۆك وزیران، ئاماژەیە بۆ ئەوەی ئەو پۆستە لەسەر بنەمای كارگێڕی و سیاسی دیاری ناكرێت، بەڵكو لەسەر بنەمای مەزەوییە، بۆیە شیعەكان كێیان مەبەست بێت، ئەو كاندید دەكەن. سپاردنی هەموو كێشە و قەیرانەكانی عێراق، بە سەرۆك وەزیرانێكی بێ ئەزموون، ئەوەندەی تر ئەم وڵاتە بە چارەنووسی نادیار دەسپێرێت و ئەگەر قەیرانەكان قووڵتر نەكاتەوە، بێگومان ئەگەری چارەسەركردنیشیان كەمتر دەبێتەوە.
ئەم وڵاتە، بە سروشت هەر لە سەرەتای دروستبوونییەوە، ناسروشتی پێكهاتووە و بەردەوام لە ململانێ و شەڕ و كودەتا و خوێنڕشتن و ململانێی مەزەویدا بووە، دوای بەناو عێراقی نوێیش، ئەم گرفتانە نەك چارەسەر نەكراون، بەڵكو قووڵتر بوون و شەڕی شیعە و سوننە، بۆ ساڵانێكی درێژ بەردەوامیی هەبوو، ئەمە وێرای ئەوەی ماف و بەخششەكانی هەرێمی كوردستانیش لەو وڵاتە بەناو فیدراڵییەدا كە گوایە بە دەستوور دیاری كراوە، بەردەوام پێشێل دەكرێت و كارتی بودجە و مووچە وەك شەڕێكی دەروونی بەرانبەر ئێمە بەكار دێنن. بۆیە ئەوەی لەم وڵاتەدا دەكرێت، دەستاودەستكردنی دەسەڵات نییە، بەڵكو درێژەدانە بە قەیرانەكان و سپاردنیانە بە یەكتری.
بێگومان ڕوونە ئەمەریكا ڕەزامەندی لەسەر مالیكی نەدا، سودانیش ئەگەر ی دانانەوەی نەبوو، بە تایبەتی مێژوویەكی ڕەش و ناشیرینی بەرانبەر بە كوردستان لەم ساڵانەدا تۆمار كرد، بەڵام ئەمە بەو مانایە نییە تۆ بێیت چارەنووسی نادیاری وڵاتێكی پڕ تەنگژە و قەیران، بدەیتە دەست گەنجێكی ناسیاسی كە هیچ ئەزموونێكی نییە، بەڵكو شیعەكان دەیانتوانی لەسەر كەسێكی بێلایەن، تەكنۆكرات، خاوەن بڕوانامە و سەركەوتوو لە بواری كارگێڕیدا، ڕێك بكەون و كاندیدی بكەن بۆ سەرۆك وەزیران.
هەرچۆنێك بێت، ئایندە دەریدەخات زەیدی، وەك سوودانی و ئەوانیترە، یان دەتوانێ ئەزموونێكی جیاواز پێشان بدات و ببێتە فاكتەری یەكگرتوویی عێراقییەكان و مافە دەستوورییەكانی ئێمەیش پێشێل ناكات؟ خۆم گومانم هەیە، بەڵام با پێش ڕووداوەكان نەكەوم.