بێگومان ئیداری خۆسەر كە بەشێكی زۆری ناوچەكانی باكور و ڕۆژهەڵاتی سووریای لە دەست بوو، بەداخەوە لە میانەی ڕووداوەكانی چەند مانگێك لەمەوبەر، حكوومەتی سووریا بە هۆی هێرشەكانیەوە دەستی بەسەردا گرتەوە، كە هەر لە سەرەتای شەڕی داعشەوە و دوای سەركەوتنەكانی پەیەدە و بەرخودانەكانی ئەوان لە دژی داعش و دواتریش نەمانی داعش، وەك دیفاكتۆیەكی كاتی دروست بووبوو. واتا ئەم ئیدارەیە، پێچەوانەی باشووری كوردستان، زەوینەیەكی نێودەوڵەتی پاڵپشت بە بڕیاری ئەنجوومەنی ئاسایش و نەتەوە یەكگرتووەكان دانەمەزرا، بۆیە هەمیشە بۆ كەسانێكی بە ئاگا و ژیر لە سیاسەت، ئەم ئیدارە خۆسەرییە وێڕای بەردەوامی بۆ ماوەی 14 ساڵ، بەڵام هەمیشە جێگەی گومان و دوودڵی بوو كە تا سەر بەردەوام نەبێت، چونكە هەلومەرجی جیوپۆلەتیكی و جیۆگرافی و سیاسی خۆرئاوا، جیاوازە لە باشوور.
ئەمەریكا تا ئەو كاتەی پێویستی بەو ئیدارە و هێزە شەڕكەرەكانی بوو هاوكاریكردن، دواتر لەگەڵ نەمانی مەترسییەكانی داعش و كۆتاهاتنی دەسەڵاتی بەعس لە سووریا، ئیتر نێردەی ئەمەریكا زۆر بە ڕوونی باسی لەوە كرد كە سەردەمی شەڕی كوردەكان نەماوە و ئەم ئیدارەیە دەبێ بە هەموو پێكهاتە سیاسی و فەرهەنگی و نەتەوەییەكەیەوە، ببێتەوە بەشێك لە خاكی سووریا و بەداخەوە حكوومەتی سووریا لەم ڕووەوە هێزی بەكار هێنا و وێڕای بەرگرییەكان و قوربانییەكان، كەچی دەرەنجام ئەوەی بە خوێنی هەزاران شەهید و چەندان ساڵ بنیات نرابوو، لە ماوەی كەمتر لە هەفتەیەكدا ئەم ناوچانە كەوتنەوە دەست حكوومەتی سووریا، ئیدارەی خۆسەر لە دروشمی دەوڵەت و سەربەخۆییەوە، هاتە سەر چەند مافێكی سادەی كولتووری و فەرهەنگی بێ ئەرزش.
لێرە لە باشووری كوردستان، بەردەوام لەشكرێك لە بە ناو چالاكانی سیاسی و ڕۆژنامەوانان و كادرە بێ هزرەكانی ئۆپۆزسیۆن و گەلێك كەسی تریش، بەردەوام حكوومەتی هەرێم و دەسەڵاتەكەیان، بەو ئیدارەیە دەشكاندەوە و لەو خەیاڵپڵاوییە بوون كە ئیتر دەوڵەتی كوردی لە سەردەستی عەبدی و شەڕڤانانی خۆرئاوا بنیات دەنرێ، هەرێمی كوردستان دەبێ لە هەموو ڕوویەكەوە چاو لەوان بكات، بەڵام بەداخەوە ئیدارەكە نەما و ئێستە حكوومەتی سووریا، زمانی كوردیش بەوان ڕەوا نابینێت، كە تەنانەت لەسەر تابلۆیەكی ئاسایی و بێ ئەرزشی فەرمانگەیەكی حكوومەتە پاشماوە داعشییەكەی شەرع هەڵبواسرێ!.
مەزڵووم عەبدی وەك ئەوەی خوێندمەوە گوایە لە میانەی چاوپێكەتنێكیدا، چەندان جار دەستەواژەی (باكوری عێراق)ی لە بری هەرێمی كوردستان بەكار هێناوە، وەك ئەوەی كە خۆی و هێزەكەی و ئیدارەكەشی بووەتەوە بەشێك لە حكوومەتی ناوەندی سووریا، ئیتر ئارەزوو بكات ئێمەش بكاتەوە بە عێراقی! ئەم دەستەواژەیە وێڕای ئەوەی لە ڕووی سیاسییەوە لای ئێمە هیچ بەهایەكی نییە، هاوكات جۆرە لە بیركردن و خۆبواردنێكی بە ئەنقەستی عەبدیشە كە هەر لەو شوێنەی ئەو ئامادە نییە بە باشووری كوردستان، یان حكوومەتی هەرێم ناوی بهێنێت، ڕێككەوتنێكیان لەسەر دەستی بارزانی بۆ كرا و ئەو مەترسییە ڕاستەقینەیەی لەسەر سڕینەوەی یەكجارەكی كورد لە سووریا هەبوو ڕاگیرا.
ئەم جۆرە شوناسە، ڕەنگدانەوەی ئەو عەقڵە شۆڤێنی و بە ناوەندگەرایەیە كە لێرەش لای بەشێكی خەڵك و ئەو عەرەبانەشی كە بە سەیران دێنە كوردستان، بەكار دەهێنرێت و دەبینرێت كە من خۆم دەیان جار پێم گوتوون ئێرە هەرێمی كوردستانە و باكوری عێراق نییە، چونكە ئێمە جگە لە ئاینەكەمان كە ئەویش بە زۆر بەسەرماندا سەپێنرا، هیچمان لە یەكتر ناچێت. ئەگەر كەس بەوپەڕی بڕِواوە، هەرێمی كوردستان بەكار نەهێنێت، دەبێ عەبدی بەكاری بێنێت، چونكە هیچ وڵات و دەسەڵاتێك ئەوەندەی هەرێمی كوردستان و حكوومەتەكەی لە خەمی ئەوان نەبوون و لە قڕكردنێكی ڕاستەقینە نەیپاراستن كە هیچ منەتێكی تێدا نییە، چونكە یەك نەتەوەین، بەڵام مرۆڤ دەبێ هەمیشە بیری بێت كە لە شەڕ و دۆخە نەخوازراوەكاندا، كێ لەگەڵیەتی و كێش لەگەڵی دەمێنێتەوە و و بێ نمەكی نانوێنێت.