له ڕۆژانی ڕابردوو چەند کەس و لایەنێک و بە ڕوونتر بڵێین "شاسوار عبدولواحید" هەڵسووڕاو و هەڵسوڕێنراوی جووڵانەوەی نەوەی كۆن، لە لێدوانێکدا باسی لەوە كرد كە "دەبێت حكوومەت بەدڵی ئەوان بێت، ئەگینا هەرێمی کوردستان دەبێت هەڵبوەشێتەوە". ڕاستە كوردستان ئازادی سیاسیی و ململانێی تێدایە و جۆرێكە لە دیموكراسی، بەڵام كە هاتە سەر ئەوەی مناڵەوردكە باسی پیرۆزییەكان و شكۆی نەتەوەیی و دەستووری بكەن، ئیتر دەبێ بڵێین ستۆپ.
لێرەوە پێویستە حەڵکی هەرێمی کوردستان و هەروەها هەموو کورد لە سەرانسەری جیهان و پێکهاتە نەتەوەیی و ئاینیییەكانی دانیشتووی كوردستان، بە توندی بەرپەرچی ئەو فکر و کردارە دوژمنانەییەی شاسوار و هەموو ئەوانە ببنەوە لە پشتەوە هانی دەدەن و وەك بووكەڵە بەكاری دێنن، چونكە شاسوار خۆی لەو ئاستەدا نییە قسەی وا بكات، بەڵام دەرفەتە پشتەوەی ئەویش بدرێتە بەر تیر و تانەی كوردی نیشتمانپەروەر و نەتەوەیی، هەتا جارێكی تر كەس ڕێگە بەخۆی نەدات زیادەڕۆیی وا هەڵوەڕانە بەرانبەر كوردستان بكات.
مرۆڤ ئەگەر سیاسیش نەبێت، هەر كەمێك پەروەردە كرابێت لە خێزانەوە، خاك و وڵاتی خۆی لا پیرۆزە و هەرگیز ڕێگەی بەخۆی نادات ئەو وشە و رستانە بەكار بێنێ كە دژی مانەوە و شكۆی نەتەوەكەین، بەڵام ئەم هەرزەسیاسییانە لەوە تێناگەن و باكیان بە هیچ نییە، بۆیە دەبێت لە هەڵوێستێكی وادا ڕسوا بكرێن و بە كاردانەوەی جەماوەر پەروەردەیەكی وا بكرێن، لایەنی كەم بزانن ئەم هەرێمە بە خوێنی شەهیدانی کوردستان و قوربانیدانێکی زۆر و ماندووبوونێکی ساڵەهای ساڵی ماڵ بەماڵی ئەم خەڵكە و چەند كوێركردنەوەی گوند و سووتانی بەرهەمی رەنجی دەیان ساڵەی خەڵكەكەی بەدی هاتووە، نەك بە كاسپی و كەبابفرۆشی، كوردستان پیرۆزە و كەس بۆی نییە باس لە نەمانی بكات، بەڵام بڕوای تەواومان بە ئازادی سیاسیی و رەخنە هەیە و گۆڕەپانەكە بە یاسا ڕەخسێنراوە، ئیتر بۆچی ئەم هەلە دەقۆزنەوە بۆ بەرەڵایی و سووكایەتی بە پیرۆزییەكانی نەتەوەیەك؟
چەند ساڵێکە کەسانی وەک شاسوارە خۆفرۆش و خاکفرۆشەكان، لێرە و لەوێ لە هەر دەرفەتێكدا بۆیان هەڵكەوتبێ، هەمیشە هەوڵی شکستخواردووی خۆیان داوە بۆ لاوازكردنی ئەم هەرێمە تاقانەی كورد و سڵیان لە هیچ نەكردووەتەوە، بەڵام هەرگیز بوێری ئەوەیان نەبووە ئاوا لە بەردەم میدیادا هەموو تایبەتمەندییەكانی وڵاتێك ببەستنەوە بە حەزە هەرزەكارانەكانی خۆیانەوە و پێیان وابێت ئەگەر داهاتوو بە دڵی ئەوان نەبێ، ئەوا تێكی دەدەن، من بە مێژووی خۆم ئەم رەفتارەم تەنیا گەنجی سەرسەری دیوە، كاتێك لە كۆڵانێكدا دانەیەك هەڵدەكەوت و یاریی لەوانیتر تێكدەدا بەم دەربڕینە دەیوت "یاریی نەكەم تێكی دەدەم". بەڵام تووشی سەرسوڕمان بووم كە ئەم ئەزموونەی كوردستان سیاسیی سەرسەریشی تێدا دروست بووە.
بێگومان ئەوانە بەرژەوەندی شەخسیی و ڕق و كینەی چەقبەستووی خۆیان و ناخە نەخۆشەكەیان لە پێش هەموو کورد و خاکی کوردستانەوە دەبینن، لە كۆتاییدا خەڵك و مێژوو ڕسوایان دەكات. ڕووداوەکانی 16ی ئۆکتەبەر و هێنانی میلیشیا بۆ سەر كەركووكی خۆشەویست و لەدەستدانی هەموو پێگەكانی كورد لەو شارە كە لە مێژوودا هەلی وا بۆ كورد نەڕەخسابوو، ستۆپی بەم گەنجە نابەرپرسیارانە نەكرد، بۆیە پیلانە یەک لە دوای یەکەکانیان لە دژی هەرێم خستە گەڕ و ئاستەكەیش ئەوەندە نزمە بە قسەی چەتەیەكی وەك رەیان كلدانی شاگەشكە دەبن و حەزدەكەن هەموو كوردستان بشێوێنن، ئاخر نەبووە تۆ خۆت پێگە و دەنگدەر و كورسیت لەو زیاتر بێت، كەچی لەژێر كەریگەریی سیاسییەكی گوێبڕدا بیت و پیرۆزی خاك و نەتەوەكەت بەلاوە گرنگ نەبێ.
بەڵام ئەم هستریا و شێتییەكی ئەو هەرزەكارە سیاسییانە شتێكی تری شاردووەتەوە كە ناوێرن ئەویان بڵێن و دێن بە كوردستاندا دەڕشێنەوە، راستییەكەی ئەم ڕقە ڕەگوڕیشەی مێژوویی هەیە و ئەوانە دوژمنایەتییەکەیان بەرانبەر پارتی دیموکراتی کوردستان و سەرۆک بارزانییە، لەبەرئەوەی بە كۆسپی بەردەم خەونە گڵاوەكانیانی دەبینن و ڕێگە نادەن ئەم گەنجە هەڵتۆقیوانە خەونی كورد لە گۆڕ بنێنن كە بە دووری نازانم هەر بۆ ئەو ئامانجە دەسەڵاتیان خراوەتە بەردەست و سنووری سلێمانییان بە بارمتە گرتووە.
ئێستە لای هەموو كەس تەنانەت ئەوانەی لە حزبەكەی مام جەلالدا رەنجیان بۆ كورد دا و ئێستە بێناز كەوتوون، ڕوون بووەتەوە كە تەنیا پارتی لە گۆڕەپانی سیاسیی ناوخۆ و ناوچەیی و نێودەوڵەتیدا داکۆکیکار و پارێزەری خاک و نەتەوەی کوردە بۆیە وەك لە میدیاكانەوە دەیبینین وردە وردە بنەماڵە و كەسایەتییە ناسراوەكانی یەكێتیش دەستبەرداری ئەو حزبە دەبن و نایانەوێ بەشێك بن لەم مێژووە نوێیە داچۆڕاوە خۆبەكەمزانە و هەر ئەوەیشیان لێ چاوەڕوان دەكرێت، چونكە خەڵكی سەنگین ناتوانێ لە ریزی هەرزەدا بمێنێتەوە و شانازیی مرۆڤ هەر ئەوەیە كە لەگەڵ نەتەوەكەی بێت و هەوڵ بۆ بەهێزیی بدات.