دوای سەرهەڵدانی ئۆپۆزسیۆن لە كوردستان و بەتایبەت دوای دروستبوونی بزووتنەوەی گۆڕان، شەپۆلی پۆپۆلیزمی سیاسی بە خێرایی ڕووی لە هەڵكشان كرد، لە كاتێكدا گۆڕان لە ئەنجامی ناكۆكی ناوخۆیی یەكێتی جیا بووەوە، كەچی هێز و توانای خۆی لە ڕكابەری و دژایەتیی پارتیدا تاقی كردەوە.
پاشان لایەنەكانی تری بەناو ئۆپۆزسیۆن كەوتنە ژێر كاریگەریی هەمان تەوژم و گوتاری گۆڕان و بارودۆخی كوردستانیان لە كاتێكی هەستیاردا، بە ئاقارێكی مەترسیداردا برد و ئەو بارودۆخە بووە هۆی لاوازبوونی پرۆسەی سیاسی و دیموكراسی، تێكدانی سەقامگیریی دامەزراوەكان و قووڵكردنەوەی ڕقوكینەی كۆمەڵایەتی، لە پێناو دەستكەوتی سیاسیی كورتخایەندا.
لەو سەروبەندەدا دیاردەیەك سەری هەڵدا و وا باو بوو كە هەر لایەنێك نەیاری پارتی بێت، بە خێرایی گەشە دەكات و ئەگەر دۆستی پارتی بێت، بە ئاگری پارتی دەسووتێ، بۆیە هەموو لایەنە خۆ بە ئۆپۆزسیۆنزانەكان، ڕوویان لە سلێمانی كرد و لەوێوە ڕاستەوخۆ یان ناڕاستەوخۆ كەوتنە دژایەتیی پارتی. بۆ ئەمە سەتان كەناڵی میدیا و سۆشیال میدیا خرانە گەڕ، بەجۆرێك هیچ پیرۆزییەك نەما و ئەوەی دوژمنانی كوردیش هەرگیز زەفەریان پێ نەدەبرد، ئەوان سووكایەتییان پێ دەكرد، ئەم دۆخە دەرفەتی دا هەندێك وڵاتیش بارودۆخەكەیان قۆستەوە بۆ زیاتر شڵەقاندنی ڕەوشی هەرێمی كوردستان.
ئەڵبەتە پارتیش بێدەنگ نەوەستا و بەرانبەر ئەم گەلەكۆمەكێیە درێغی نەكرد و ئەوەی پێی كرا كردی، بۆ ئەوەی ئەو گوشارانە لەسەر خۆی كەم بكاتەوە . بەڵام پارتی بەشێوەیەكی جیاواز لەو ململانێ سیاسی و رقاوییە، هەوڵی دا لە ڕێگەی حكوومەتەوە ناوچەكانی ژێردەسڵاتی خۆی زیاتر ئاوەدان بكاتەوە و ئاسایش و سەقامگیری بپارێزێت. ئەمە وایكرد خەڵك بەڕوونی هەست بە جیاوازیی گوتاری پۆپۆلیستی و كردار و خزمەت بكەن، ئەمەش بە ئەرێنی بۆ پارتی شكایەوە .
سەرەڕای ئەوەی یەكێتی لەوكاتە لە دۆخێكی زۆر خراپی ناوخۆیی و جەماوەریدا بوو، بەڵام پارتی یەكێتی بە تەنیا جێنەهێشت، كەچی یەكێتی سەرئەنجام بە خیانەتی ١٦ی ئۆكتۆبەر، وەڵامی چاكەی پارتی دایەوە و برینی كۆنی كولاندەوە و ناكۆكی لە مێژینەی بووژاندەوە. ئەو ڕووداوە بووە هۆی ئەوەی ئەو متمانەیەی لە دوا ساڵەكانی تەمەنی رەحمەتی مام جەلال و سەروك مەسعوود بارزانیدا بنیات نرابوو، جارێكی تر وەك خۆی نەمێنێت .
سەرئەنجام ئەو ململانێیەی ئۆپۆزسیۆن دەستی پێ كرد و یەكێتی دواتر راستەوخۆ و ناڕاستەوخۆ لاسایی كردەوە، زیانی گەورەی بە پرۆسەی سیاسی و دیموكراسی و یەكڕیزیی گەلی كورد گەیاند، بە زیانی گەورە بۆ هەرێمەكەمان شكایەوە و پێگەی كوردی تووشی پاشەكشەیەكی گەورە كرد لەسەر ئاستی عێراق و نێودەوڵەتی .
ئێستە دوای تیپەڕبوونی نزیكەی دوو دەیە بەسەر ئەو ئاراستە سیاسییەی كە پێی وابوو دژایەتیی پارتی بەرەو سەركەوتنیان دەبات، كاتی ئەوە هاتووە ئەو پرسیارە بكەین، ئایا ئەو بۆچوونە تا چەند ڕاست دەرچوو كە پێی وابوو بە دژایەتیی پارتی، پێشڕەوی دەكەن و دەگەنە دەسڵات؟
بۆ نموونە، ئەوانەی دژایەتی یان ركابەریی پارتییان دەكرد:
- گوڕان تەنیا بەناو ماوە .
- كۆمەڵ تەواو بچووك بووەتەوە.
- یەكگرتوو هەموو هەوڵی بۆ ئەوەیە بگاتەوە مایەی خۆی .
- نەوەی نوێ چووەتە ناو سەرەتای كۆتایی خۆیەوە .
- یەكێتی لە هێزێكی نیمچە سۆشیال دیموكراتەوە بووەتە هێزێكی خۆسەپێن و لە ركابەریی پارتییەوە بووە بە نیوەی پارتی .
لە بەرانبەردا پارتی زیاتر گەورە بووە، بەشێوەیەك لە دوا هەڵبژاردنی عێراقدا سەرووی ملیۆنێك و 100 هەزار دەنگی بەدەست هێنا كە بەتەنیا زیاتر بوو لە دەنگی هەموو حزبە كوردییەكان. كەواتە ئەوانەی پێیان وابوو بە دژایەتیی پارتی گەورە دەبن، دەركەوت لە سیاسەتدا كڵۆڵن و توانای خوێندنەوە و پێشبینی دروستیان نییە، چونكە ڕۆژگار پێچەوانەی بیركردنەوەی ئەوانی سەلماند.
بەبڕوای من، كۆتا هەوڵی پۆپۆلیستی سیاسی بۆ دژایەتیی پارتی، ڕێككەوتنی نێوان یەكێتی و نەوەی نوێیە كە سەرئەنجام سەری نەوەی نوێ دەخوات و ئۆپۆزسیۆنیش لە كوردستان دەبێتە ڕابردوو، چونكە ئۆپۆزسیۆن بەگشتی شكستی خوارد لە پێشكەشكردنی ئەزموونێكی سەركەوتوو بە خەڵك، لە ڕێگەی گۆڕانكاریی مەدەنی و دیموكراسییەوە، لە كاتێكدا خەڵكێكی زۆر هیوایان لەسەر بنیات نابوو.
ئێستەیش پێم وایە ململانێی سیاسی لە كوردستان، لە ژێر كاریگەریی عەقڵی زاڵی ناو یەكێتی بۆ دواوە دەگەڕێتەوە، ئەمەیش وادەكات قۆناغێكی نوێی ململانێ و ركابەریی دەست پێ بكات كە جگە لە زیان، هیچ سوودێكی بۆ خەڵكی كوردستان نییە، چونكە پرۆسەی سیاسیی كوردستان پێویستی بە دیموكراسی و كێبەركێی ڕاستەقینە و یەكدەنگیی ستراتیجی هەیە لەسەر پرسە نەتەوەیی و دەستوورییەكان، ئەمەش بە ڕێككەوتنی پارتی و یەكێتی دێتە دی، نەك یەكێتی و نەوەی نوێ.