دوای ئەوەی لە تۆڕە كۆمەڵایەتییەكان، تۆماری ڤیدیۆیی چەند كەسێكی عەرەب لە سنووری شارۆكەی دوبز سەر بە پارێزگای كەركووك دەركەوت لە نزیك زەوی بە گەنمچێنراوی جووتیارانی كورد دەڵێن تاوانە ئەوە بۆ كورد بێت، گوتەبێژی هۆزە عەرەبییەكانی ناوچە كێشەلەسەرەكان دووپاتی دەكاتەوە، ئەوانە نوێنەری خۆیانن و مەبەستیان نانەوەی دووبەرەكییە لە ناوچەكە.
بەشێك لە سووتێنەرانی زەویوزاری كورد داعش نییە
وەك لە تۆمارە ڤیدیۆییەكەدا دیارە كەسێك بەناوی حەمید هلەیل شمەری، شێخێكی شمەرە و هەڕەشەی دەستگرتن بەسەر زەویوزاری كشتوكاڵی كورد دەكات لە سنووری دوبز، لەگەڵ چەند عەرەبێكی تر هەڵدەكەوتنە سەر زەوی بەگەنمچێنراوی جووتیارانی كورد و قسە بە كورد دەڵێن، تا رادەی بە تاوانی دەزانن كە جووتیارانی كورد ئەو بەرووبوومە بدوورنەوە.
موزاحم ئەحمەد حوێت، گوتەبیژی هۆزە عەرەبییەكانی ناوچە كێشەلەسەرەكان لەو بارەوە بە "وشە"ی گوت، ئەوانە لەگەڵ هەڵمەتی تەعریبەوە هاتوون لە دوای 1975، چونكە زۆرینەی ئەوانەی لەو ناوچەیەن لە تركەلان و دبس و داقووق و خورماتوو، دوای ئەو كاتە هاتوون، تەوانەت ناوچەكانی رۆژئاوای دیجلە و دەشتی نەینەوایش، پرۆسەی تەعریب دوای 1975 رووی داوە، كە حكوومەتی عێراق ژمارەیەكی زۆری عەرەبی هێنا بۆ ئەو ناوچانە.
زیاتر گوتی، بەشێكی ئەو تاوانانەی بە سووتاندنی زەویوزاری جووتیارانی كورد لە ناوچە كێشەلەسەرەكان روودەدات، بەمەبەستە و داعش نییە، بۆیە ئەوانە عەرەبی هاوردەن و نوێنەرایەتی خۆیان دەكەن و كارەكانیشیان ترسناكە كە نانەوەی دووبەرەكی و كێشەیە، ئەوانە خاوەن زەوی و ماف نین، هەمووان داوای دەركردنیان دەكەن، بەڵام بەهۆی نەبوونی یاسایەك ئەو كارە ناكرێت، بۆیە ئەوان مەبەستیان هەیە لەو كارانەیان.
دووپاتی كردەوە، ئەو كارانە مەترسیدارن و بابەتەكە گەورە دەبێت، چەندان رەهەندی هەیە، نەتەوەیی و هۆزایەتی و یاسایی، ئەوان هانی دەمارگیری دەدەن و هاوشێوەی داعش هەڵسوكەوت دەكەن، كە ئەویش دەست بەسەر موڵكوماڵی خەڵك دەگرێت.