دچارچوڤێ ئوپه‌راسیوونا "ده‌نوكێ بازى" یا توركى بۆ ل باشوورێ كوردستانێ، شه‌ڤا بورى شه‌ش گوندێن زاخۆ و هژماره‌ك ژ گوندێن ده‌ڤه‌را ئامێدیێ هاتنه بۆردمان كرن، ئه‌ڤه زێده‌بارى كو هێزه‌كا كوماندو ژى ل سنورێ زاخۆ داخلێ هه‌رێما كوردستانێ بویه، ژێده‌ره‌ك بۆ وشه دیاركر نوكه ژى بۆردمانكرنا نه‌هـ گوندێن زاخۆ به‌رده‌وامه.
ب گوره‌ى ئه‌وان پێزانینێن "وشه" ل چه‌ند ژێده‌رێن خوجهى ل سنوورێ ده‌ڤه‌ردارییا زاخۆ ده‌ستكه‌فتى، شه‌ڤا بورى د چارچوڤێ ئوپه‌راسیوونا ده‌نوكێ بازى یا سوپایێ توركیا بۆ باشوورێ كوردستانێ، هه‌ر ئێك ژ گوندێن پیربلانێ، نزدورێ، دشێش، ریسێ، حه‌فته‌ن و گه‌لیێ پس ئاغا ل سنوورێ ده‌ڤه‌ردارییا زاخۆ هاتنه بۆردمان كرن، هه‌ڤده‌م ده‌ڤه‌را نهێل، نێروه‌ورێكان ژى ل سنوورێ ده‌ڤه‌ردارییا ئامێدیێ هاتنه بۆردمان كرن.
هێزه‌كا كوماندویا توركى داخلى هه‌رێما كوردستانێ بو
زێده‌بارى هێزێن ئه‌سمانى و باله‌فرێن شه‌رى و هه‌والگیرى، هه‌ڤده‌م توپخانه‌یێن توركیا ژى ب زه‌مینى پشته‌ڤانیا ئوپه‌راسیوونێ دكه‌ن، ل گوندێ حه‌فته‌نین هێزه‌كا كوماندویا توركى ب هژماره‌كا جه‌ندرمه‌ڤه داخلى هه‌رێما كوردستانێ و سنوورێ ده‌ڤه‌ردارییا زاخۆ بوویه.
هه‌ر ب گوره‌ى پێزانینێن "وشه" نوكه ژى بۆردمانكرنا نه‌هـ گوندێن سنوورێ ناوچه‌دارییا باتیفا و ده‌ڤه‌را گولیا به‌رده‌وامه و ترسه‌كا زۆر ل ده‌ڤ خه‌لكێ ده‌ڤه‌رێ په‌یدا كریه.
ده‌ما دوو روژایه توركیا ئوپه‌راسیونه‌كا به‌رفره‌هـ ل سنوورێ هه‌رێما كوردستانێ ب پشكداریا ده‌هان باله‌فرێن شه‌رى ده‌ست پێ كریه، د روژا ئێكێ دا هه‌رئێك ژ ده‌ڤه‌رێن مه‌خمور، قه‌ندیل، شنگال، نێروه‌ورێكان، باله‌كایه‌تى و سنورێ زاخۆ و چه‌ند ده‌ڤه‌رێن دن بخوڤه گرتن، به‌لێ هیچ زیانه‌كا گیانى ل په‌ى ئه‌وان بۆردمانان نه‌بوویه.
وه‌زاره‌تا ده‌رڤه‌یا عیراقێ د راگه‌هاندنه‌كێ دا ئیدانه‌یا ئوپه‌راسیوونێن توركیا بۆ ئاخا عیراق و باشوورێ كوردستانێ كر، پشته‌ڤانیا خوه بۆ توركیا ده‌ربرى بو ئاسایكرنا ره‌وش و پاراستنا سنوران.
ئه‌ڤ ساله و دده‌ما شه‌ش هه‌یڤێن بورى دا، پترى 40 جاران ده‌ڤه‌رێن جودایێن پارێزگه‌ها دهۆكێ هاتینه بۆردمان كرن ژلایێ باله‌فر و توپخانه‌یێن سوپایێ توركیا، سێ وه‌لاتى شه‌هیدبوینه و هه‌شت ژى برینداربوینه، سه‌دان ملیار دینار زیان ب ره‌ز و بیستان و گونده‌وار و ژینگه‌هێ گه‌هاندینه.
دهۆك - نه‌وزاد هلۆرى