حه‌فته‌نین، گونده‌كه دكه‌ڤیته باكوورێ ده‌ڤه‌ردارییا زاخۆ ل پارێزگه‌ها دهۆكێ، هه‌ڤسنوره ل گه‌ل باكوورێ كوردستانێ و نێزیكه ل سێگوشا سنوورى یا توركیا و عیراق و سووریا، ئه‌ڤه دوو روژه بزاڤێن خورت ژلایێ توركیا د چارچوڤێ ئوپه‌راسیوونا "ده‌نوكێ بازى" دا دهێنه‌كرن كو داگیر بكه‌ت، شه‌ڤا بورى هێزه‌كا كوماندویا خوه گه‌هانده نێزیك حه‌فته‌نین، نڤیسه‌ره‌ك ل دهۆكێ به‌حس ل پێگه‌هێ حه‌فته‌نین دكه‌ت.
نه‌زیر عه‌لى، نڤیسه‌ر ل باژێرێ دهۆكێ بۆ "وشه" گۆت، گوندێ حه‌فته‌نین ل هه‌رێما كوردستانێ، پێگه‌هه‌كێ سیاسى و جوگرافیێ گرنگه و دكه‌ڤیته سێگوشا سنوورى یا دناڤبه‌را توركیا، عیراق و سووریا، هه‌ر ئێك ژ گوندێن بێجهـ ، هودان و روبوسكێ ل ئالیێ باكوورێ كوردستانێ دگه‌هنه حه‌فته‌نین، بۆ هه‌رێما كوردستانێ پێگه‌هه‌كێ گرنگه ب تایبه‌تى ژ روویێ جوگرافى و بازرگانى ڤه.
زێده‌تر گۆت "توركیا حه‌فت ئوپه‌راسیون بۆ سه‌ر حه‌فته‌نین هه‌تا نوكه ئه‌نجام داینه، به‌لێ نه‌شیایه داگیر بكه‌ت، داوى ئوپه‌راسیوون ب پشكداریا هژماره‌كا كوردێن باكوورێ كوردستانێ ژلایێ توركیا بۆ سه‌ر حه‌فته‌نینێ هاته ئه‌نجامدان، به‌لێ نه‌شیان كونترول بكه‌ن و د ئه‌نجام دا توركیا هێزێن خوه ڤه‌كێشانه روبوسكێ ل باكوورێ كوردستانێ"
نڤیسه‌رێ ناڤبرى دیاركر ژى كو حه‌فته‌نین بۆ توركیا ژ ناوچه‌یا قه‌ندیل گرنگتره كو داگیر بكه‌ت و زێده‌تر گۆت "ئوپه‌راسیونا نوكه یا توركیا تمامكه‌را ئوپه‌راسیوونێن به‌رى نوكه‌یه بۆ داگیركرنا حه‌فته‌نین، ئه‌ڤه نێزیكێ سێ هه‌یڤایه توركیا ڤه‌كولینێ ل سه‌ر چه‌وانیا گرتنا وێ دكه‌ت، ئه‌ڤه زێده‌بارى هێزێن عیراقى ژى ئاگه‌هداركرینه كو ئه‌و دێ هێزێن خوه ئینن حه‌فته‌نین، توركیا دخوازیت باره‌گایێن خوه ل نێزیك هه‌ردوو گوندێن شه‌رانش و كه‌شانێ وه‌كو هێزه‌كا پالپشت دروست بكه‌ت، هژماره‌كا زۆرا تانك و زریپوش و سه‌باز ل سه‌ربازگه‌ها گرێ بێى ل نێزیك سنورێ ناوچه‌دارییا ده‌ركار یا سه‌ر ب ده‌ڤه‌ردارییا زاخۆ بنه‌جهكرینه و باره‌گا ل وێرێ سالا 1996 دامه‌زراندیه"
نه‌زیر عه‌لى، نڤیسه‌ر ل دهۆكێ د درێژاهیا ئاخفتنێن خودا دیاركر ژى كو بزاڤێن توركیا هه‌ر ب داگیركرنا حه‌فته‌نینێ ل باشوورێ كوردستانێ داوى ناهێن، به‌لكو قه‌ندیل دێ بیته داوى خالا داگیركرنێ و گۆت ژى "ژبه‌ركو پێگه‌هێ حه‌فته‌نین گرنگه و خالا ڤه‌گوهاستنا دناڤبه‌را رۆژئاڤا و شنگال و باكووره، وه‌كو دیاره بزاڤێن توركیا بۆ داگیركرنا ده‌ڤه‌رێن باشوورێ كوردستانێ هه‌ر نوكه نینه، به‌لكو توركیا رژده ل سه‌ر بجهكرنا شه‌ش خالێن میساقا مللى یا سالا 1918 بو 2023 كو پشكه‌ك ژ وێ میساقێ باشوورێ كوردستانێ و موسل بخوڤه دگریت، له‌وا توركیا ل سه‌ر داگیركرنا حه‌فته‌نین ناراوستیت و ل ئاینده ده‌ڤه‌رێن به‌رفره‌هتر بخوڤه گریت، ئه‌گه‌ر هات و كوردان هه‌لویستێن ئێكگرتى هه‌مبه‌رى توركیا نه‌بن"
نڤیسه‌رى داویێ گۆت "لاوازیا عیراقێ و بێده‌نگبوونا جڤاكێ نیڤده‌وله‌تى هه‌مبه‌رى له‌شكركێشا توركیا، ره‌وشێ ئالوزتر دكه‌ت، دنوكه دا گرنگه كورد هه‌ڤگرتى بن ب تایبه‌تى هه‌رێما كوردستانێ داكو ئاخ و نیشتمانێ وان پاراستى بیت، چونكى هه‌ر گوند و ده‌ڤه‌ره‌كا هه‌رێما كوردستانێ بهێته داگیركرن زیانێن زۆر بو هه‌رێما كوردستانێ هه‌نه"
ئه‌ڤ ساله و دده‌ما شه‌ش هه‌یڤێن بورى دا، پترى 40 جاران ده‌ڤه‌رێن جودایێن پارێزگه‌ها دهۆكێ هاتینه بۆردمان كرن ژلایێ باله‌فر و توپخانه‌یێن سوپایێ توركیا، سێ وه‌لاتى شه‌هیدبوینه و هه‌شت ژى برینداربوینه، سه‌دان ملیار دینار زیان ب ره‌ز و بیستان و گونده‌وار و ژینگه‌هێ گه‌هاندینه.