قەڵەوی یەكێكە لە كێشە سەرەكییەكان، مرۆڤ لەپێناو تەندروستی خۆی و دوورخستنەوەی نەخۆشییەكان شەڕێكی دەستەویەخە لەگەڵ قەڵەوی و زیادبوونی كێش دەكات، پەنا بۆ وەرزشكردن و ریجیمی خۆراك و دەرمان و نەشتەرگەری و هیتریش دەبات، كێشەی قەڵەوی لەناو ژنان زۆر باوە و كەمتر دەتوانن كۆنترۆڵی بكەن، بەشێك لەوان كتوپڕ كێشیان زیاد دەكات و قەڵەو دەبن.
ماڵپەڕی
"ویب توب"ی پزیشكی لەوبارەوە دەڵێت، چەند هۆكارێك بۆ ئەو حاڵەتە هەن، لەوانە دەرمان، كە هۆكارێكی گرنگی زیادبوونی كتوپڕی كێشی ژنە، بەتایبەتی سترۆیدەكان لەوانە كۆرتیزۆن و هایدرۆ كۆرتیزۆن، واتە دەرمانی نەخۆشییەكانی سیستمی بەرگریی خۆیی مرۆڤ، وەك دژەهەوكردنی رۆماتیزمی جومگە و رەبوو و دەرمانی دژەخەمۆكی و تەمبەڵیی رژێنی دەرەقی.
لە هۆكاری تر تووشبوونە بە رارایی و خەمۆكی و دەمارگیری و شەكەتیی درێژخایەن، واتە شێوانی دەروونی كە ئاستی ئەدرینالین لە خوێن بەرز دەكەنەوە، جیا لە بەرزكردنەوەی ئاستی هۆرمۆنی كۆرتیزۆل، كە بەرپرسە لە ئەمباركردن و بەكارهێنانی وزە لە لەش، هەروەها ئەو كەسانە بۆ خۆلادان لە كێشەكان ئارەزووی خواردنیان زیاتر دەبێت.
لەپاڵ ئەوانەی سەرەوە، خەوزڕان و كەمخەوی چەوری زیاتر لە لەش كۆ دەكەنەوە، بۆیە نابێت خەوتن لە هەشت سعات كەمتر بێت، قەتیسبوون و كۆبوونەوەی شلە لە لەش هۆكارێكی ترە، پێش وەستانی یەكجاریی سووڕی مانگانەی ژن ئەوان بەهۆی شێوانی دەردانی هۆرمۆنەكان قەڵەو دەبن، یان لە حاڵەتی دروستبوونی كیس لە هێلكەدان، لە هۆكاری تر گەشەی وردە بەكتریای ریخۆڵەكان و نەخۆشی شەكرە و كێشەكانی دڵ و گورچیلە و جگەر یان تووشبوون بە چەند جۆرێكی شێرپەنجە.