بەرەبەیانیی ئەمڕۆ تەقە لە بارەگای لقی سێی پارتی دیموكراتی كوردستان لە كەركووك كراوە و لەلایەن پاسەوانانی بارەگاكەوە وەڵام دراوەتەوە.
ئەمڕۆ شەموو 27ـی تەمووز، محەمەد كەمال بەرپرسی سێی پارتی لە كەركووك رای گەیاند، لە سەعات سێی بەرەبەیان لە دوو شوێنی جیاوازەوە بە قەناسە و دەستڕێژ، تەقە لە لقی سێی پارتی دیموكراتی كوردستان لە كەركووك كراوە و پاسەوانەكانیش وەڵامیان داونەتەوە و شەڕ ڕووی داوە.
ئەوەیش زانراوە، ئامانجی تەقەكەرەكان گرتنی خاڵێكی پاسەوانی بارەگاكە بووە، كە یەكەمجار تەقە لەوێ كراوە تا دواتر بێنە ناو لقەوە و كردەوەی تیرۆریستی بكەن.
محەمەد كەمال بەرپرسی لقی سێ دەڵێت، ڕووداوەكە هیچ زیانی گیانی نەبووە، بەڵام پێشهاتێكی خراپە و پێویستە لێكۆڵینەوەی ورد لە بابەتەكە بكرێت.