لەكاتێكدا شاسوار و جووڵانەوەكەی داوا دەكەن هاووڵاتییانی هەرێمی كوردستان پارەی ئاو و كارەبا و باج نەدەنە حكوومەت، خۆی گوشاری بۆ سەر دانیشتووانی گوندی ئەڵمانی هێناوە و ئەوانەی سێ مانگ پارەی ئاو و كارەبا و خزمەتگوزاری نەدەن دەست بە رێكار و لێپرسینەوە بەرانبەریان دەكەن، دوای سێ جار ئاگەداركردنەوە ناویان دەخەنە لیستەوە و ئاو و كارەبایان لەسەر دەبڕن.
دیسان شاسوار تای هەڵبژاردنی لێ نیشتووە و دەستی بە هاشوهوش كردووە، وەك هەمیشە بەڵێنی بێ بنەما و بێ كردار بە خەڵك دەدات، لەولاشەوە دانیشتووانی گوندی ئەڵمانی بەدەست بڕانی ئاو و گرانیی پارەی خزمەتگوزارییەوە هەراسان بوون، جیا لەوەی مۆلیدەی ناو پڕۆژەكە بووەتە ژەهر بۆ دانیشتووانی، سەگی بەرەڵا و كڕینی ئاو بە تەنكەر بوونەتە دیاردەیەكی رۆژانەی ئەو بەهەشتەی شاسوار بەڵێنی دروستكردنی بە خەڵك دەدات.
هاووڵاتییەكی دانیشتووی گوندی ئەڵمانی كە نەیویست ناوی ئاشكرا بێت بە "وشە"ی راگەیاند، شاسوار كە لەم كاتەدا دەستی بە چەواشەكاری و خۆڵكردنە چاوی خەڵك و قسەی باقوبریق كردووە و داوا لە خەڵك دەكات پارەی ئاو و كارەبا و باج نەدەن، لە گوندی ئەڵمانی ئەگەر دانیشتووانەكەی سێ مانگ پارەی ئاو و كارەبا نەدەن، ماوەی 15 رۆژ مۆڵەتیان پێ دەدرێت تا پارەكە بدەن، دواتر ئاگەداركردنەوەیان بۆ دەنێرن و دەیانخەنە لیستی بڕینی كارەباوە.
زیاتر گوتی، شاسوار كە لەم كاتەدا دەستی بە بانگەشە كردووە و هەر رۆژەی لە شوێنێك ئاو بەسەر خەڵكی دابەش دەكات، دانیشتووانی گوندی ئەڵمانی بەهۆی بەردەوامیی كێشەی ئاوەوە، بە تانكەر ئاو دەكڕن، سەگی بەرەڵا بەناو پڕۆژەكە تەراتێن دەكەن و بوونەتە مەترسی بۆ سەر گیانی منداڵی خەڵك، موەلیدەی پڕۆژەكەش بەرانبەر عیمارەیەكە و دووكەڵی ژەهراوی دەرخواردی خەڵك دەدەن، سێ ساڵە داوا دەكەین لاببرێت تا ئێستە لا نەبراوە و ئیسراحەتی لە خەڵك هەڵگرتووە.
ئەو دانیشتووەی گوندی ئەڵمانی باسی لەوەش كرد، پارەی خزمەتگوزاریی پڕۆژەكە مانگانە 65 هەزار دینارە بەبێ هیچ شتێك و دەبێت مانگانە ئەو پارەیە بدرێت، پرسیارەكە ئەوەیە بۆچی لە دەرەوە ئاو دابەش دەكەن و دانیشتووانی پڕۆژەكەش دەبێت بە تانكەر ئاو بكڕن؟، بۆچی ئەوەی شاسوار بۆ خەڵكی دەرەوە دەیڵێت بۆ دانیشتووانی پڕۆژەكە جێبەجێی ناكات؟، بۆیە ئەو بەهۆی دوكەڵی ئەو موەلیدەوە ژینگەیەكی وێرانی لەناو پڕۆژەكە دروست كردووە و با بێت ئەوە چارەسەر بكات.
یەكێكی تر لە دانیشتووانی گوندی ئەڵمانی لەبارەی ئەو موەلیدەی پڕۆژەكەوە بە "وشە" دەڵێت، ژیانمان نەماوە و لەماڵی خۆمان بەند كراوین، خەڵك دێتە پڕۆژەكان تا پشوو بدات، بەڵام ئێمە بەدەست دوكەڵ و ژەهری ئەو موەلیدەیە هەراسان بووین، ناتوانین دەرگە و پەنجەرە بكەینەوە و بەهۆی دوكەڵەوە ماڵمان یەك پارچە رەش و دێز بووە.
هاووڵاتییەكی تری دانیشتووی پڕۆژەكە بۆ "وشە"ی دووپات كردەوە، وەك گوشارێك بۆ چارەسەركردنی كێشەكانی پڕۆژەكە، بەنیاز بووین هەموومان بەیەكەوە پارەی خزمەتگوزاری نەدەین، بەڵام لای كۆمپانیا قبووڵكراو نییە و دواتر مامەڵەی ترت لەگەڵ دەكەن، رەنگە ئێستە هەڵبژاردن بێ و نەوێرن هیچ بكەن، بەڵام سبەی لێپرسینەوەت لەگەڵدا دەكەن و دەست بۆ بڕینی ئاو و كارەباكەت دەبەن.
لای خۆیەوە تەحسین محەمەد، چاودێری سیاسی بۆ "وشە" ئاماژە دەكات، شاسوار دەیەوێت چەواشەكاری بەسەر خەڵكەوە بكات، ئەگەر ئەو راستگۆیە با بێتە سەر شاشە و بڵێ لە پارەی ئاو و كارەبا و خزمەتگوزاریی یەك ساڵی دانیشتووانی گوندی ئەڵمانی خۆش دەبین، ئەمە وەك هەنگاوێك و نیازپاكی.
روونی كردەوە، ئەو لەولاوە رەنگە چەندینجار زۆری بۆ دانیشتووانی گوندەكە هێنا بێت، بەڵام چونكە لەملاوە لە دەستی خۆی دەرناچێت خەریكی قسەی بێ مانایە، گوشاری بۆ هاتووە و نازانێت چۆن خۆی راست بكاتەوە و چۆن خەڵك چەواشە بكات؟، شتێكی بەدەستەوە نییە تا دەنگ و متمانەی خەڵك بەدەست بێنێت، بۆیە پەنا بۆ ئەو جۆرە قسانە دەبات.
وشە/ تایبەت