فهرماندێ هێزا ئێك یا پاسهوانی سنوور د كونگرهیهكێ رۆژنامهڤانی دا بهحس ل داوی گورانكاری و پێشهاتێن نوو ل دهڤهرا زاخۆ و ئهو لڤینێن ژلایێ وان و توركیا هاتیهكرن كرن.
دلێر فهرزنده زێباری، بهرپرسێ هێزا ئێك یا پاسهوانی سنوور ل زاخۆ د كونگرهی دا گۆت "پشتی كو فهرماندێ پاسهوانی سنوور ل عیراقێ ژ نێزیك هاتیه زاخۆ و سهرهدان بۆ چهند جهان كری، بریار دا كو لڤین ب پاسهوانی سنوور بهێتهكرن و هندهك جهێن گرنگ بهێنه گرتن داكو پاراستنێ ل سهر گیانێ وهلاتیان و دهڤهرێ بكهت، نوكه پێنج خالێن نوو ل ناوچهدارییا دهركار و ناوچهدارییا باتیفا ل زاخۆ ل زنجیره چیایێ كیره و كهلها شابانێ هاتنهدانان"
زێدهتر گۆت "هیچ هێزهكا نوو ل عیراقێ نههاتیه، بهلكو ئهڤ هێزا نوكه ههیی ژ مێژه ل دهڤهرێ ههیه، توركیا 12 خالێن نوو ل سنوورێ زاخۆ داناینه، لهوا داكو ئهڤ هێزه و پهكهكه ژی دهستدرێژی ل سهر دهڤهرێ نهكهن ب ههڤكاریا وهزارهتا پێشمهرگهی لڤین ب هێزا ئێك یا پاسهوانی سنوور كریه، ههر دهستدرێژیهك بهێتهكرن بێگومان دێ بهرسڤ ههبیت، ئهگهر پێدڤی كر و بریار هاتهدان دێ چینه خالا سفر ژی كو ئهو ژی سنووره"
ناڤبری د درێژاهیا ئاخفتنێن خودا دیاركر ژی كو درێژاهیا سنوورێ ههرێما كوردستانێ تنێ ل پارێزگهها دهۆكێ دبیته 245كم و ههر جههكێ پێدڤی بیت و بریار بو بهێتهدان دشیاندایه خالێن پاسهوانی بۆ بهێنهدانان و گۆت ژی " نوكه پاسهوانی سنوور تنێ ل زاخۆ و كانی ماسێ و سهرزێری ههیه، وهزارهتا نافخوه یا عیراقی توركیا ئاگههداركریه بۆ دانانا خالێن نوو ل سنوری"
هێزا پاسهوانی سنووری دهما 17 سالایه ل سنوورێ زاخۆ هاتیه دانان و بارهگایێ سهرهكی دكهڤیته ناوچهدارییا باتوفا.