عومەر سەید عەلی چی بە لاهوور جەنگی گوت؟

:: PM:04:01:03/07/2020 ‌
نهێنییه‌كی‌ تری‌ كۆبوونه‌وه‌ی‌ نێوان تاقمه‌كه‌ی‌ لاهوور جه‌نگی‌ و بزووتنه‌وه‌ی‌ گۆڕان ئاشكرا بوو كه‌ رۆژی‌ چوارشه‌می‌ رابردوو له‌ گردی‌ زه‌رگه‌ته‌ی‌ مه‌كۆی‌ سه‌رۆكی‌ گۆڕان كۆبوونه‌وه‌.

لاهوور جه‌نگی‌ هاوسه‌رۆكی‌ یه‌كێتی‌ ڕۆژی‌ چوارشه‌می‌ رابردوو سه‌ردانی‌ بزووتنه‌وه‌ی‌ گۆڕانی‌ كرد، دوای‌ ئه‌وه‌ی‌ چه‌ندان جار داوای‌ كۆبوونه‌وه‌ی‌ كردبوو و پێش ئه‌وه‌یش چه‌ندان جاری‌ تر سه‌ردانی‌ گۆڕی‌ نه‌وشیروان مسته‌فای‌ رێكخه‌ری‌ كۆچكردووی‌ گۆڕانی‌ كردبوو، به‌بێ‌ ئه‌وه‌ی‌ به‌ فه‌رمی‌ پێشوازی‌ لێ‌ بكرێ‌.

لاهوور ددانى به‌ دزین و كارى نایاسایى له‌ مه‌رزه‌كاندا ناوه‌
هه‌ر له‌كاتی‌ كۆبوونه‌وه‌كه‌ی‌ ڕۆژی‌ چوارشه‌می‌ ڕابردوو، "وشه‌" ئه‌وه‌ی‌ ئاشكرا كرد كه‌ شوێنی‌ كۆبوونه‌وه‌كه‌ی‌ گۆڕان له‌گه‌ڵ لاهوور جه‌نگی‌ بۆ شه‌رمه‌زاركردنی‌ هاوسه‌رۆكی‌ یه‌كێتی‌ دانراوه‌، به‌ تایبه‌ت كاتێك له‌ پرۆتۆكۆڵی‌ دانیشتن شوێنی‌ خرابووه‌ به‌رانبه‌ر ئه‌و "ژووره‌ی‌" كه‌ له‌شه‌وی‌ 12ی‌ ئایاری‌ 2018 و هاوكاتی‌ هه‌ڵبژاردنه‌كانی‌ په‌رله‌مانی‌ كوردستان لاهوور ته‌قه‌ی‌ له‌ گرده‌كه‌ كردبوو.

جیا له‌وه‌، نهێنییه‌كی‌ تری‌ كۆبوونه‌وه‌كه‌ ئاشكرا كراوه‌ كه‌ ڕووبه‌ڕوو عومه‌ر سه‌ید عه‌لی‌ ڕێكخه‌ری‌ گشتیی بزووتنه‌وه‌ی‌ گۆڕان چه‌ند قسه‌یه‌كی‌ به‌ لاهوور جه‌نگی‌ گوتووه‌.

ماڵپه‌ڕی‌ "په‌یسه‌ر" كه‌ نزیكه‌ له‌ بزووتنه‌وه‌ی‌ گۆڕان رای‌ گه‌یاندووه‌، له‌ كۆبوونه‌وه‌ی بزوتنه‌وه‌ی گۆڕان و یه‌كێتی نیشتمانی كوردستان دا، عومه‌ر سه‌ید عه‌لی‌ داوای له‌ لاهوور جه‌نگی‌ كردووه‌ كه‌ كاری نایاسایی و قاچاغی خاڵه‌ سنورییه‌كان رابگرێت و له‌ به‌رانبه‌ردا شاندی‌ یه‌كێتی گوتویانه‌ هه‌وڵ ده‌ده‌ن ئه‌وه‌ چاره‌سه‌ر بكه‌ن.

ئه‌و زانیاریانه‌ی‌ له‌سه‌ر كۆبوونه‌وه‌كه‌ بڵاوكراونه‌ته‌وه‌ به‌ڕوونی‌ ددانپێدانانی‌ لاهوور جه‌نگی‌ ده‌رده‌خه‌ن له‌ دزی‌ و تاڵانكردنی‌ مه‌رزه‌كانی‌ سنووری‌ سلێمانی‌ كه‌ پێشتر به‌ ڕوونی‌ "وشه‌" رای‌ گه‌یاندبوو، لاهوور و ئاراس له‌ ڕێی‌ شه‌ش كۆمپانیاوه‌ ده‌ستیان به‌سه‌ر داهاتی‌ شه‌ش مه‌رزی‌ فه‌رمی‌ و نافه‌رمی‌ سنووری‌ سلێمانیدا گرتووه‌.

له‌وباره‌یه‌وه‌ سه‌رچاوه‌یه‌كی‌ به‌رپرس له‌ناو گۆڕان كه‌ پێی‌ باش نه‌بوو ناوی‌ بڵاوبكرێته‌وه‌ به‌ "وشه‌"ی‌ ڕاگه‌یاند، زۆر پرس هه‌بوون كه‌ پێش هاتنی‌ شانده‌كه‌ی‌ یه‌كێتی‌ بۆ لای‌ گۆڕان بڕیار درابوو ڕووبه‌ڕوویان بكرێته‌وه‌ و یه‌كێك له‌وانه‌ پرسی‌ مه‌رزه‌كان و كاری‌ نایاسایی بوون كه‌ گۆڕان داكۆكی‌ له‌سه‌ر ده‌كات.




وشە - وشه‌

ئه‌م بابه‌ته 2292 جار خوێنراوه‌ته‌وه‌‌