ده‌ما دوو روژایه جووتیارێن هه‌رێما كوردستانێ گله‌یێ دكه‌ن ژ نه‌بوونا بازاڕی بۆ فرۆتنا به‌رهه‌مێن خوه ب تایبه‌تی بۆ به‌رهه‌مێ ته‌ماته، پشكه‌ك ژ جووتیاران دخوازن كارگه‌هێن چێكرنا دووشاڤا ته‌ماته‌یێ بهێنه دانان، ئه‌ندازیاره‌كێ چاندنێ ل دهۆكێ دیاركر كو ب دوو رێیا دشیاندایه ئاریشا جووتیاران و به‌رهه‌مێ خومالی بهێته چاره‌سه‌ركرن و د پلان ژی دایه كارگه‌ها چێكرنا دووشاڤێ ل دهۆكێ بهێته دروستكرن.
د پلاندایه هژماره‌كا كارگه‌هان بۆ چێكرنا دووشاڤا ته‌ماتێ و عه‌سیرا ل دهۆكێ بهێته دروستكرن
فه‌رهاد محه‌مه‌د تاهیر ئه‌ندازیار و بسپوورێ چاندنێ ل پارێزگه‌ها دهۆكێ بۆ "وشه" گۆت، دنوكه دا بابه‌تێ گه‌رمێ روژه‌ڤا كوردستانێ گله‌یی و چاره‌سه‌ركرنا ئاریشا جووتیارایه و په‌یداكرنا بازاڕه‌كێیه بۆ فرۆتنا به‌رهه‌مێن وان ب تایبه‌تی ته‌ماته.
زێده‌تر گۆت "ب گوره‌ی ستاندارێن جیهانی، پرانیا ئه‌و ته‌ماته‌یێن ل هه‌رێما كوردستانێ و جووتیارێن مه دچینن ب كێری وێ یه‌كێ ناهێن بكه‌نه دووشاڤا ته‌ماته‌یان و ئه‌م نه‌شێن پشتربه‌ستنێ ل سه‌ر بكه‌ین، به‌لێ ب دوو رێیا ئه‌م دكارین ئاریشا جووتیاران چاره‌سه‌ر بكه‌ین، ئه‌و ژی ب پلانێن درێژخایه‌ن و پلانێن كورتخایه‌ن"
پلانێن كورتخایه‌ن، وه‌كو جوداكرن و كوگه‌هكرنا به‌رهه‌مێ جووتیاران دناڤ كوگه‌هێن سار دا، داكو رێژه‌یه‌كا باش بهێته هه‌لگرتن بۆ ده‌ما پێدڤی، هه‌لبه‌ت ئه‌و ژی لژێرچاڤدێرییا كه‌سانێن شاره‌زا و تایبه‌تمه‌ند، دیسان بریار ل سه‌ر قه‌ده‌غه‌یا ب ئێكجاری یا هاورده‌كرنا به‌رهه‌مێن بیانی بهێته‌دان هندی به‌رهه‌مێ خومالی هه‌یه، كاركرن ل سه‌ر هه‌ستا نیشتمانیا خه‌لكی بۆ كرینا به‌رهه‌مێن خومالی و كونترولكرنا بازاڕی، پلانێن درێژخایه‌ن ژی دێ ب دانانا كارگه‌هێن پێشه‌سازیێن تمامكه‌ر بۆ پرانیا به‌رهه‌مێن چاندنێ ژلایێ كه‌رتێ تایبه‌ت ڤه هێته چاره‌سه‌ركرن، دیسان دانانا پلانه‌كا چاندنێ ل سه‌ر بنه‌مایێ خواست و داخوازییا خه‌لكی بۆ به‌رهه‌مێن چاندنێ، هه‌ردیسان ڤه‌كرنا بورسه‌كا تایبه‌ت ژلایێ حوكمه‌تێ ب هه‌ڤپشكی ل گه‌ل كه‌رتێ تایبه‌ت. فه‌رهادی هوسا گۆت.
پێشتر چه‌ندان جاران سازیێن پێوه‌ندیدار ب كه‌رتێ چاندنێ ڤه، پلان بۆ چێكرنا چه‌ندان كارگه‌هێن چێكرنا دوشاڤا ته‌ماته و عه‌سیرا دایه ده‌ست جهێن شوله‌ژێ بۆ چێكرنا وان ب تایبه‌تی ب رێیا كه‌رتێ تایبه‌ت، به‌لێ هه‌تا نوكه چوو ژ وان كارگه‌هان نه‌هاتینه چێكرن، د نوكه دا تنێ حوكمه‌تێ باج دانایه سه‌ر به‌رهه‌مێ هاورده.
پێشتر كارگه‌ها چێكرنا دووشاڤا ته‌ماته‌یان ل دهۆكێ هه‌بوو، به‌لێ د نوكه دا چوو كارگه‌ه ئینن.