سەرچاوەی زەڵم و ئەحمەد ئاوا بەناوبانگترین هاوینەهەواری كوردستان و عێراقە لە پارێزگای هەڵەبجە ئەمساڵ بەهۆی قەدەغەكردنی گەشتوگوزار و كەرتی گەشتیاری لەبەر نەخۆشی كۆرۆنا گەشتیار بەڕێژەیەكی كەم سەردانی ئەم هاوینەهەوارەی كردووە بەڵام لەم جەژنەدا ڕێژەی گەشتیار و سەیرانكەری بە ئاستێك بوو كە لەهەموو ساڵەكەدا هێندە گەشتیاری نەبووە.
ئەمڕۆ شەمو یەكی ئاب، عیسا حەسەن خاوەنی فرۆشگایەكە لەسەرچاوەی زەڵم بە "وشە"ی ڕاگەیاند، ئەمڕۆ جەنجاڵترین و بەبازاڕترین ڕۆژی ئەم هاوینە هەوارەیە و ژمارەیەكی زۆر گەشتیار هاتوونە بۆ زەڵم.
عەرەبەكان پێشی جەژن هاتوون پێش ئەوەی كە قەدەغەی هاتووچۆ بۆ ڕۆژانی جەژن ڕابگەیەنرێت
بە گوتەی عیسا گەشتیارە عەرەبەكان پێشی جەژن هاتوون پێش ئەوەی كە قەدەغەی هاتووچۆ بۆ ڕۆژانی جەژن ڕابگەیەنرێت.
وەهاب ئەمین بەڕێوەبەری بەڕێوەبەرایەتی گەشتوگوزاری هەڵەبجە بە "وشە"ی ڕاگەیاند، لەسەعات 11ی پێش نیوەڕۆ لە هاوینەهەواری زەڵم و ئەحمەد ئاوام لەگەڵ تیمەكانی گەشتوگوزار و هێزە تەناهییەكان لە پۆلیسی گەشوگوزار و هاتوچۆ و لیژنەكانی تایبەت بە هاوینەهەوارەكە ڕێنمای هاووڵاتییان دەكەین.
بەڕێوەبەری گەشتوگوزار گوتی، وێڕای هۆشیاری دان بە وانەی هاتوونەتە هاوینە هەوارەكە خاوەن باخ و چێشتخانەكانیشمان ئاگەدار كردوون كە پابەندی تەندروستی و خۆپارێزی بن و ڕێنوێنییەكانی تایبەت بە نەخۆشی كۆرۆنا جێبەجێ بكەن .
لەبارەی ڕێژەی گەشتیارانەوە بەڕێوەبەری گەشتوگوزاری هەڵەبجە ئاشكرای كرد، ڕێژەی گەشتیاران نازانین، بەڵام ژمارەیەكی زۆر زۆر سەیران كەر لە ناوچەكانی گەرمیان و خانەقین و سلێمانی و بەغداد هاتوون.
" ئەوەی هاتووە زۆربەی زۆریان گەشتیار نین بەڵكو سەیرانكەرن، چونكە بەشێكی زۆر كەمیان شەو ماونەتەوە یان دەمێننەوە لەناوچە گەشتیارییەكان " ئەوا وەهاب وای گوت.
خورماڵ/ شەفیق بانیشاری