عێراق هێزێك بۆ سنووری توركیا ده‌جووڵێنێت

:: PM:03:20:12/08/2020 ‌
دوای ئه‌وه‌ی دوێنێ فڕۆكه‌كانی توركیا بۆردمانی هێزه‌كانی پاسه‌وانیی سنووری سه‌ر به‌ عێراقیان كرد و كوژراوی لێ كه‌وته‌وه‌، ئه‌مڕۆ عێراق هێزێكی بۆ سه‌ر سنووری توركیا جووڵاندووه‌.
هێزه‌كه‌ به‌ چه‌كی قورس و مامناوه‌ند به‌ره‌و سنوور جووڵێنراوه

پێگه‌ی "ئه‌لعه‌ره‌بیه‌" ئه‌مڕۆ چوارشه‌م 12ی ئاب بڵاوی كردووه‌ته‌وه‌، به‌رپرسانی عێراقی ئه‌مڕۆ رایان گه‌یاندووه‌، هێزێك بۆ سه‌ر سنووری توركیا جووڵه‌ی پێ كراوه‌ كه‌ ئه‌ویش كاردانه‌وه‌ی رووداوه‌كه‌ی دوێنێیه‌ كه‌ كوشتنی دوو ئه‌فسه‌ر و سه‌ربازێكی لێ كه‌وته‌وه‌.

زیاتر روونی كرده‌وه‌، هێزه‌كه‌ به‌ چه‌كی قورس و مامناوه‌ند به‌ره‌و سنوور جووڵێنراوه‌. به‌دغا مه‌به‌ستیه‌تی به‌رانبه‌ر به‌ رووداوه‌كه‌ی دوێنێ، هه‌ڵوێست بنوێنێ و كاردانه‌وه‌ی هه‌بێت.

ئه‌وه‌ له‌كاتێكدایه‌ وه‌زاره‌تی به‌رگریی توركیا چه‌ند گرته‌یه‌كی ڤیدیۆیی بڵاو كردووه‌ته‌وه‌ و گوتوویه‌تی، فڕۆكه‌كانمان له‌ عێراق چه‌ند ئامانجێكی كورده‌كانیان پێكاوه‌.

دوێنێ سیشه‌م 11ی ئاب، فڕۆكه‌كانی توركیا ھێزه‌كانی پاسه‌وانی سنووری سه‌ر به‌ حكوومه‌تی عێراقییان له‌ ناوچه‌ی برادۆست بۆردمان كرد، به‌وھۆیه‌وه‌ چه‌ند فه‌رمانده‌ و سه‌رباز شه‌ھید و بریندار بوون، دوای ڕووداوه‌كه‌ و وه‌ك كاردانه‌وه‌یه‌ك وه‌زاره‌تی ده‌ره‌وه‌ی عێراق سه‌ردانی وه‌زیری به‌رگریی توركیای بۆ به‌غدا هه‌ڵوه‌شانده‌وه‌ كه‌ بڕیار بوو سبه‌ی پێنجشه‌م 13ی ئاب ئه‌نجام بدرێت.



وشە - وشیار ئه‌حمه‌د ئه‌سوه‌د

ئه‌م بابه‌ته 294 جار خوێنراوه‌ته‌وه‌‌