ئوپراسیوونا توركیا بۆ ناوچه‌یێن سنووریێن هه‌رێما كوردستانێ ب گشتی و پارێزگه‌ها دهۆكێ و ده‌ڤه‌را حه‌فته‌نین ل زاخۆ ب تایبه‌تی ده‌ربازێ 80ێ رۆژان بو، ژبلی زیانێن گیانی و ماددی هه‌ڤده‌م رێژه‌ییه‌كا زۆر یا جوگرافیا پارێزگه‌ها دهۆكێ كونترولكریه و خالێن نوو یێن سه‌ربازی ژلایێ توركیا هاتینه چێكرن، نڤیسه‌ره‌ك ل پارێزگه‌ها دهۆكێ به‌حسا ئه‌نجامێن ئوپراسیوونا توركیا بۆ پارێزگه‌ها دهۆكێ دكه‌ت.
ل پارێزگه‌ها دهۆكێ ب تایبه‌تی 80ێ رۆژ ده‌ربازكرن و یا به‌رده‌وامه ژی
نه‌زیر عه‌لی، نڤیسه‌ر ل باژێرێ دهۆكێ بۆ "وشه" گۆت، ئۆپراسوونا توركیا بناڤێ چه‌نگێ پلنگ بۆ ناوچه‌یێن سنووریێن هه‌رێما كوردستانێ ب گشتی و ده‌ڤه‌را حه‌فته‌نین ل سنوورێ قه‌زا زاخۆ ل پارێزگه‌ها دهۆكێ ب تایبه‌تی 80ێ رۆژ ده‌ربازكرن و یا به‌رده‌وامه ژی.
زێده‌تر گۆت "ئه‌ڤه پتری 36 ساله توركیا ل سه‌ر ئۆ‌راسیۆنێن خوه بۆ هه‌رێما كوردستانێ به‌رده‌وامه، د ئوپراسیوونا جه‌نگێ پلنگی دا له‌شكه‌رێ تركیا ب كوراتییا نێزیكی 40كم و درێژیا 50 كم ده‌ڤه‌را زاخۆ داگیركریه ب تایبه‌تی سنوورێ گونده‌وارێن نزدۆر- ده‌شته‌ته‌خ، به‌رامبه‌ر ژی دا گه‌ریلایێن پارتیا كاركه‌رێن كوردستانێ، ب ته‌كتیك و پلانێن نوو به‌رسڤا له‌شكه‌رێن تركیا دایه و به‌رده‌وامه ژی"
له‌شكه‌رێ تركیا 10 گرنگترین چیا و بلنداهیێن ده‌ڤه‌را حه‌فته‌نین ل سنوورێ ده‌ڤه‌ردارییا زاخۆ داگیركرنه و خالێن له‌شكه‌ری ل سه‌ر دامه‌زراندینه، ژ وانان ل چیایێ خامتیر، سێ خالێن له‌شكه‌ری داناینه كو ئێك ژ وان خالان جاش (قۆرۆجی)، ل گوندێ شه‌رانشا سه‌ری خاله‌ك دانایه ، ل گوندێ گرێ داواتییا خاله‌ك دانایه، ل گوندێ ئه‌ڤله‌هـ ژی خاله‌ك دانایه، دیسان ل گوندێ پیربلا خاله‌ك دانایه، ل گوندێ بانكا سه‌ری، دوو خال داناینه، دناڤبه‌را گوندێن كه‌شان و هه‌فته‌نین ژی خاله‌ك دانایه، ل نیزیك گوندێ ده‌شته‌ته‌خ خاله‌ك دانایه، د نوكه دا چوو جادده ناچنه وان خالان یێن تركیا تازه ل حه‌فته‌نین دامه‌زراندین، هه‌لیكۆپته‌رێن تركیا ژ باله‌فرا له‌شكه‌ری یا گرۆملی ل باژارێ سلۆپیا كو هه‌ڤسنووره ل گه‌ل زاخۆ، له‌شكه‌ران ڤه‌دگۆهێزنه وان خالان، پێدڤیێن له‌شكه‌ری ژی ب وان هه‌لیكۆپته‌ران د ده‌مێ 15 خۆله‌كان دا دگه‌هینن، نه‌زیری هوسا گۆت.
هاریكارێن تركیا بۆ شه‌ڕێ حه‌فته‌نین
نه‌زیر عه‌لی، نڤیسه‌ر ل باژێرێ دهۆكێ ل بارا ئه‌و هاریكاریێن بۆ له‌شكه‌رێ توركیا د ئوپراسیوونا چه‌نگێ پلنگی دا دهێنه‌كرن گۆت "جه‌نه‌رال كینیس ماكینزی، فه‌رمانده‌یێ ناڤه‌ندیێ هێزێن ئه‌مریكا، لدۆر ئۆپراسیۆنا تركیا بۆ سه‌ر باشوورێ كوردستانێ گۆتبو ئه‌و ئاگه‌هدارێ ئۆپراسیۆنا توركیانه واته ئه‌مریكا گلۆپا كه‌سك بۆ له‌شكه‌ركێشییا تركیا هه‌لكرییه، دیسان كوردێن باكوور ئانكو جاش (قۆرۆجی) ژ عه‌شیره‌تێن گۆیی و ژیركی ژ ده‌ستپێكا ئۆپه‌راسیۆنێ هاریكارییا له‌شكه‌رێ تركیا دكه‌ن، جه‌عفه‌ر به‌نه‌ك، ئه‌ندامێ پارتیا داد و گه‌شه‌پێدان ئێك ژ سه‌رۆك جاش و بازرگانێن دیارێن ده‌ڤه‌را قلابان و پارێزگه‌ها شه‌رنه‌خ- ه ل باكورێ كوردستانێ، نووكه گرێبه‌سته‌ك ل گه‌ل له‌شكه‌رێ تركیا ئیمزاكرییه و مه‌كینه‌یێن كۆمپانیێن وی رێیێن له‌شكه‌رێن تركیا بۆ حه‌فته‌نین ڤه‌دكه‌ن ب تایبه‌ت ئه‌و رێیا به‌ر ب چیایێ خامتیر دهێت، هه‌ر دیسان هه‌والگیریا عیراق و تركیا هه‌ماهه‌نگیه‌كا به‌رده‌وام هه‌یه، زێره‌ڤانێن سنووری یێن ئیراقێ بێ رازیبوونا تركیا نه‌شێن یه‌ك مه‌تر لڤینان ل ده‌ڤه‌رێن حه‌فته‌نین بكه‌ن، ل سه‌ر بڕیارا تركیا زێره‌ڤانێن سنووری یێن ئیراقێ جادده‌یێن بانك بۆ شه‌رانش و شه‌رانش بۆ ده‌شته‌ته‌خ و زرێزه بۆ شیلان و شلین و كه‌شان گرتینه، ئانكو دوورپێچ دانایه سه‌ر حه‌فته‌نین. ده‌رباره‌ی ئه‌و لڤینێن ڤێ داویێ زێره‌ڤانیێن سنووری یێن عیراقێ كرین، ئه‌وان دوو خال ل رۆژئاڤایێ بانكا ژێری و باشوورێ مه‌نینێ دامه‌زراندن و نێزیكی 200 زێره‌ڤانێن خوه ل هه‌موو خالان زێده‌كرن"
هه‌فته‌نین و كارڤه‌دانێن جیهانی
نڤیسه‌رێ ناڤبری د درێژاهیا ئاخفتنێن خودا دیاركر ژی كو واشنتۆن پشته‌ڤانییا ئۆپراسیۆنێ دكه‌ت و داخواز دكه‌ت هه‌ماهه‌نگی د ناڤبه‌را ئه‌نقه‌ره و به‌غدا و هه‌ولێر به‌رده‌وام بیت، فه‌ره‌نسا دوو جاران كۆنسلخانا خوه ب رێیا دوو تیمێن تایبه‌ت، دووڤچۆنا هێرشا تركیا ل سه‌ر حه‌فته‌نین كرییه، ب رێیا وه‌زیرێ ده‌رڤه و به‌ره‌ڤانیێ دژایه‌تیا خوه بۆ ئۆپه‌راسیۆنا تركیا راگه‌هاندییه، وه‌لاتێ مسرێ ژی ب رێیا وه‌زاره‌تا دره‌ڤه ب فه‌رمی پشته‌ڤانیا خوه بۆ سه‌روه‌ریا عیراقێ راگه‌هاندیه و دژی له‌شكه‌ركێشییا تركیایه.
حه‌فته‌نین گونده‌كه دكه‌ڤیته ناوچه‌دارییا باتوفا یا سه‌ر ب ده‌ڤه‌ردارییا زاخۆ، ناوچه‌یه‌كا ستراتیجی و گرنگه، هه‌رسێ پارچێن باكوور و باشوور و رۆژئاڤایێ كوردستانێ پێكڤه گرێده‌ت، ژ ئه‌نجامێ ئوپراسیوونا نوو یا توركیا شه‌ش وه‌لاتیێن سڤێل ل پارێزگه‌ها دهۆكێ شه‌هید بوینه و دوو ژی برینداربوینه، هژماره‌كا گوندان هاتینه چولكرن ژ وانان شه‌رانش و كه‌شانێ.