تا ئێستە بڵاوبوونەوەی ڤایرۆسی كۆرۆنا و ژمارەی قوربانیانی لە زیادبوونن، هاوكات هەوڵێكی زۆری حكوومەت و كۆمپانیاكانی دەرمان بۆ دۆزینەوەی ڤاكسینی دژ بەو ڤایرۆسە بەر لە وەرزی زستان و دووەم شەپۆلی ڤایرۆسەكە هەیە، كۆمپانیای فایزەری ئەمەریكی دوایین ئەنجامی تاقیكردنەوەكانی لە سێیەم قۆناغی ڤاكسینەكەی ئاشكرا دەكات.
كاریگەریی لابەلای ڤاكسینەكە سووكە
بەرپرسانی كۆمپانیاكە لە رێگەی كۆنگرەیەكی تەلەفۆنییەوە بە وەبەرهێنەرانیان راگەیاند كە بەشدارانی تاقیكردنەوەی ڤاكسینەكەیان، كاریگەریی لابەلای سووك تا ناوەندیان لەسەر دەركەوتووە، دوای وەرگرتنی ژەمی ئەو ڤلاكسینە لە دوایین قۆناغەكانی تاقیكردنەوەدا، كاتێك زیاتر لە 12 هەزار بەشدار لەو تاقیكردنەوانە، دووەم ژەمی ڤاكسینەكەیان پێ درا و كاریگەرییە لابەلاكەی لەسەریان دەركەوتووە سووكە.
لەوكاتەی پێوەری سەركەوتنی هەر ڤاكسینێك سەلامی بەكارهێنان و دروستكردنی وەڵامدانەوەی سیستمی بەرگرییە دژ بە ڤایرۆسەكە، كۆمپانیای فایزەری ئەمەریكی زیاتر لە 29 هەزار كەسی وەك بەشدار لە تاقیكردنەوەكان تۆمار كردبوو بۆ تاقیكردنەوەی ڤاكسینەكەی بە هاوبەشی لەگەڵ كۆمپانیای بیۆنتیكی ئەڵمانی پەرەی پێ دەدات.
كۆمپانیایكە دووپاتی كردەوە كە لیژنەیەكی سەربەخۆ چاودێری ئەنجامی تاقیكردنەوەكان دەكات و هەركاتێك بڕیار بدات، ئەوان ئامادەن تاقیكردنەوەكان بوەستێنن، ئەگەر پێویست بكات، بەڵام تا ئێستە نەكراوە، لەوكاتەی كۆمپانیای ئسترازینیكا لە شەشی ئەم مانگە تاقیكردنەوەكانی لەسەر ڤاكسینێكی دژ بە كۆرۆنا وەستاند بەهۆی دەركەوتنی كاریگەریی لابەلای مەترسیدار لەسەر خۆبەخشێك لە بەریتانیا، دواتر كۆمپانیاكە دووشەمی رابردوو لە بەریتانیا و بەرازیل دەستی بە تاقیكردنەوەكانی كردەوە.