ههر ئێك ژ رێكخراوێن ئهلند بو دیمكوراسیكرنا گهنجان و دهزگههێ خێرخوازى كوردستان، كونفرانسهكێ تایبهت ل بارا چونا وهلاتیان ب گشتى و گهنجان ب تایبهتى بۆ دهرڤهیێ كوردستانێ ب پشكداریا چهندین ماموستایێن زانكویێ و ئهندامێن پهرلهمانێ كوردستانێ و رهشهنبیر و چالاكڤان و تایبهتمهندێن سیاسى و ئابوورى و جڤاكى ل دهڤهرێن جودایێن پارێزگهها دهۆكێ ل ئوتێل ژیان ل باژێرێ دهۆكێ داوى ئینا و ههموو هوركاریێن ئهگهر و كارتێكرن و چارهسهریێن چونا وهلاتیان و گهنجان رونكرن.
شێرزاد پیرموس، سهرۆكێ رێكخراوا ئهلند بو دیموكراسیكرنا گهنجان بۆ "وشه" گۆت، ب مهرهما رێگرتن ژ زێدهچوونا وهلاتیان و گهنجان بۆ دهرڤهیێ كوردستانێ مه وهكو رێكخراوا ئهلند بو دیمكوراسیكرنا گهنجان ههڤكارى دهزگههێ خێرخوازى كوردستان، كونفرانسهكێ تایبهت ل بارا چونا گهنجان بۆ دهرڤهیێ كوردستانێ ئهنجام دا، كونفرانس ب دانوستاندن و ئازژراندنا چهند پرسان داوى ئینا و ئهنجامێن وێ د كونوسهكێ دا ههموو هێنه نڤیسان و ب نڤیسارهكا فهرمى دێ بۆ جهێن شولهژێ هێنه رهوانهكرن داكو ب مهرهما چارهسهركرنا پرسا چونا گهنجان بۆ دهرڤه"
د كونفرانسى دا ئێكهم راپرسى ل بارا چونا گهنجان ل ههرێما كوردستان و پارێزگهها دهۆكێ هاته بهلاڤكرن و كومهكا داتایێن تایبهت بخوڤه دگریت، 750 كهسان پشكدارى د وێ راپرسیێ دا كربوو ژ وانان 137 ژ رهگهزێ مێ بوون، پشكارێن راپرسیێ ژى دناڤبهرا ژیێ 16 سالى بۆ 36 سالى بوون ژ وانان 494 زوگورد بوون و ئهوێن دن ژى خێزانداربوون، دیسان 611 ژ وان ههلگرێن باوهرنامهێن جودا و دخواندهڤان بوون و 426 ژى خودان كار و داهاتێ تایبهت ب خوڤه بوون.
چهند ئهنجامهكێن راپرسیێ، ب گورهى راپرسیێ:
73% گوتیه ژ وان كهسێن پشكدارى تێدا كرى دخوازین بچینه ژ دهرڤه.
31% ژ چوونا خوه بۆ دهرڤه دزڤرینن بۆ ئهگهرێن ئابوورى و 11% ژ ئهگهرێن سیاسى و 27% ژ ئهگهرێن ساخلهمیێ و 25% ژ ئهگهرێن بێزاربوونێ و 5% ژ ئهگهرێن جڤاكى.
38% حوكمهتا ههرێما كوردستانێ خهتابار دكهن و 36% پارتێن سیاسى و 18% ژى ژ پهرلهمانێ كوردستانێ و 8% ژى ژ داب و نهریتێن جڤاكى.
48% ژ وان كهسێن پشكداربووى نوكه دهمێن خوه ل سهر تورێن جڤاكى و 8% ب خواندنا پهرتوكان و 36% ل كافیان و 8% ژى جهێن جودا دبورینن.
18% گهندهلى ئهگهرا سهرهكى یا چونا گهنجایه بو دهرڤه و 28% ژى نهدادپهروهرى و 26% نه ئێكسانى و22% ژ نهبوونا باوهریێ و 6% ژى ژ ئهگهرێ ململانێن دناڤبهرا پارتێن سیاسى.
ههر ب گورهى راپرسیێ كو ل سهر زارێ ئهندامهكێ پهرلهمانێ كوردستانێ هاتیه بهلاڤكرن، 14 هزار و 500 كهسان د نههـ ههیڤێن بورى دا قهستا دهرڤهیێ كوردستانێ كریه و 27 ژ وان بێ سهر و شوێنن و چارهنڤیسێ وان نهدیاره.
دهۆک/ نەوزاد هلۆری