ژنه‌كا گوندێ ناوچه‌دارییا شێلادزێ، ئه‌ڤه پترى 20 ساله كارێن ده‌ستى دروست دكه‌ت مینا جلوبه‌رگ و لیفك و چه‌ند كه‌لوپه‌لێن دى، پرانیا جاران ژى بێ به‌رامبه‌ر دده‌ت خه‌لكى.
زه‌ینه‌ب موسته‌فا، ئه‌و ژنه بۆ "وشه" گۆت، چێكرنا كارێن ده‌ستى تشته‌كێ ساناهى نینه، به‌لكو پێدڤى ب شاره‌زایى و ده‌مه‌كێ زۆر هه‌یه، به‌لێ ئه‌نجام دلخوشى و ده‌ستڤه‌ئینانا به‌رهه‌مێ خومالى یه.
زێده‌تر گۆت "ئه‌ز كارێن ده‌ستى یێن مینا جلوبه‌رگێن زاروكا، گوره، لیفك، كیفێن قورئان و سه‌ر ترمزێن ئاڤێ و به‌رده‌ست و چه‌ندین كه‌لوپه‌لێن دى دروست دكه‌م، هنده‌كا د فروشم و هنده‌كا ب دیارى دده‌م خه‌لكى و هنده‌كان ژى هه‌ر بو مالا خوه دروست دكه‌م، به‌لێ هه‌تا نوكه نه‌بویه پێشه ژبه‌ركو كه‌لوپه‌لێن بیانى و هاورده بویه ئه‌گه‌ر كو خه‌لك زو ب زو یێن خومالى نه‌كرن، ئه‌وێن د كرن ژى پرانیا وان بو جوانیێ یه"
ناڤبرى دیاركر ژى كو كارێن ده‌ستى ناڤه‌رۆك و دیمه‌نێن جوان و سه‌رنجراكێش هه‌نه و تامه‌كا كورده‌وارى یه د مالا مرۆڤى دا و زێده‌تر گۆت "ئه‌ز ژ دایكا خوه فێرى كارێن ده‌ستى بویمه و هندى ژ من بهێت دێ به‌رده‌وام بم، هه‌ر چه‌نده وه‌كو به‌رێ دروس ناكم، به‌لێ رۆژانه كار دكه‌م، بۆ چێكرنا هه‌ر كاره‌كێ ژى پێدڤى ب ده‌مه‌كێ دیاركرى مه"
ئامێدیێ/ نه‌وزاد هلۆرى