بۆ ئێكه‌مجار ل قه‌زاییه‌كا دهۆكێ كچه‌ك په‌رتوكخانه‌كێ ڤه‌ دكه‌ت

:: PM:01:07:02/11/2020 ‌
بۆ ئێكه‌مجار د دیرۆكا ده‌ڤه‌ردارییا سێمێل یا سه‌ر ب پارێزگه‌ها دهۆكێ، كچه‌ك بناڤێ ئاره‌زو سه‌لاحه‌دین، په‌رتوكخانه‌ك ڤه‌كر، ئه‌و دده‌ت دیاركرن خێزان و مالباتا وێ پشته‌ڤانیا وێ دكه‌ت.

ئاره‌زو سه‌لاحه‌دین بۆ "وشه‌" گۆت، هزرا درۆستكرنا په‌رتوكخانه‌كێ ژ مێژه‌ ل ده‌ڤ من په‌یدابویه‌‌، به‌لێ ژبه‌ركو ئه‌ز قوتابى و خوانده‌ڤان بووم و پشته‌ڤانى وه‌كو پێدڤى نه‌بوو له‌وا نوكه‌ من دانا.

زێده‌تر گۆت "خێزانا من ب تایبه‌تى بابێ من باوه‌رى و هێزه‌كا زۆر دایه‌ من و ب ماددى و مه‌عنه‌وه‌ى پشته‌ڤانیا من كر بۆ دروستكرن و دانانا په‌رتوكخانه‌كێ، سوپاس بۆ خودێ شیام وه‌كو ئێكه‌م كچ ل ده‌ڤه‌رێ په‌رتوكخانه‌كێ بدانم، په‌رتوكخانا من كومه‌كا په‌رتوكێن جودا بخوڤه‌ دگریت و ئێكه‌م پێنگاڤ و ئه‌زموونه‌ مه‌ پشتى داوى ئینانا خواندنا كولیژێ ده‌ستپێكرى، ژبه‌ركو بێ كاربوم و من‌ خواست بڤێ رێكێ خزمه‌تا جڤاكێ خوه‌ بكه‌م"

ناڤبرى د درێژاهیا ئاخفتنێن خودا دیاركر ژى كو ژبلى خێزانا وێ هژماره‌كا جهـ و كه‌سان ژى پشته‌ڤانیا وێ كریه‌ و زێده‌تر گۆت "من ده‌رگه‌هـ هه‌مبه‌رى كچان ڤه‌كر كو ئه‌و ژى هێز و باوه‌ریێ بده‌ن خوه‌ و ببن خودان كار و خزمه‌تا جڤاكێ خوه‌ بكه‌ن، گرنگه‌ كچ ژى مینا هه‌ر تاكه‌كێ جڤاكى ببیته‌ خودان كار و شیانێن خوه‌ بۆ جڤاكى به‌رچاڤ بكه‌ت، هه‌موو كچان شیان یێن هه‌یى، به‌لێ دبیت هه‌مووان پشته‌ڤانى نه‌بیت، هنده‌ك كچ رێكێ ناده‌ن خوه‌ بهێنه‌ پێش و دترسن، ئارمانجا من ئه‌وه‌ كارێ خوه‌ به‌رفره‌هتر بكه‌م و هه‌تا ڤێره‌ ناراوستم، نابیت كچ گوهداریا ره‌خنه‌ و ئاخفتنێن شاش یێن جڤاكى بكه‌ت، به‌لكو دڤێت ئاخفتنێن وان بخوه‌ مفاى ژێوه‌ربگریت بۆ راستڤه‌كرنا شاشیێن خوه‌ و باشتركرنا كارێن خوه‌"

ئارزۆ ل سالا 1993 ژ دایكبویه‌ و نوكه‌ ل سه‌نته‌رێ باژێرێ سێمێلێ دژیت، ده‌رچویا كولیژا كارگێرى و ئابورى یه‌ ل زانكۆیا جیهانه‌ ل دهۆكێ و هه‌تا نوكه‌ ژیانا هه‌ڤژینیێ پێكنه‌ئینایه‌.

دهۆك/ نه‌وزاد هلۆرى


وشە - تایبه‌ت

ئه‌م بابه‌ته 153 جار خوێنراوه‌ته‌وه‌‌