سپێده‌هیا ئه‌ڤرۆ توپخانه‌یێن سوپایێ توركیا ده‌ست ب توپبارانكرنا گونده‌وارێن سنوورێ ناوچه‌دارییا ده‌ركار یا سه‌ر ب ده‌ڤه‌ردارییا زاخۆ كر، ب گوره‌ى پێزانینان ئه‌ڤرۆ پترى 100 توپ ب ده‌ڤه‌رێ كه‌فتنه.
ژێده‌ره‌كێ هایدار ل توپبارانكرنێ ل ده‌ڤه‌رێ بۆ "وشه" دیاركر كو سپێده‌هیا ئه‌ڤرۆ توپخانه‌یێن سه‌ر ب سوپایێ توركیا ده‌ست ب توپبارانكرنا گونده‌وارێن سنوورى یێن ناوچه‌دارییا ده‌ركارێ كر.
زێده‌تر گۆت "نێزیكێ 100 توپ د توپبارانكرنا ئه‌ڤرۆ ل وان ده‌ڤه‌ران كه‌فتنه، به‌لێ هه‌تا نوكه زیانێن وان نه‌دیارن، پرانیا توپان ژى ب چیایێ خامتیر كه‌فتنه كو ئێكه ژ زنجیره چیایێن درێژ و هژماره‌كا گوندان دكه‌ڤنه بن"
ناوچه‌دارییا ده‌ركارێ ئێكه ژ وان ناوچه‌داریێن كوردستانێ كو پترى 25 گوندێن وان ژ ئه‌گه‌رێ بۆردمان و توپخانه‌یێن توركیا هاتینه چولكرن و دده‌ما بورى دا پترى 30 وه‌لاتیێن سڤێل شه‌هید و برینداربووینه.
سوپایێ توركیا ژبلى ب رێیا باله‌فرێن شه‌رى و توپخانه‌یان، هه‌ڤده‌م ب رێیا هێزه‌كا كوماندو ب كوراتیا 40كم هاتیه ناڤا ده‌ڤه‌رێ و نێزیكێ 12 خالێن نوو داناینه.
زاخۆ، نه‌وزاد هلۆرى